2022 January 27 Thursday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

Editorial

നോട്ട് മരവിപ്പിക്കലിന്റെ മറവില്‍ രാജ്യത്ത് നടക്കുന്നത്


ബി.ജെ.പി ബംഗാള്‍ഘടകത്തിന്റെ അക്കൗണ്ടില്‍ ഒരു കോടി 500 രൂപ നോട്ടുകള്‍ നിക്ഷേപിച്ചു കഴിഞ്ഞതിനുശേഷം 1000 , 500 രൂപാ നോട്ടുകള്‍ റദ്ദാക്കല്‍ നടപടി പ്രഖ്യാപിച്ച പ്രധാനമന്ത്രി നരേന്ദ്രമോദിയുടെ ഉദ്ദേശ്യശുദ്ധിയെ ചോദ്യം ചെയ്തു നിരവധി വിമര്‍ശനങ്ങളാണ് ഇതിനകം ഉയര്‍ന്നിരിക്കുന്നത്. കേന്ദ്രമന്ത്രിമാരെ ബന്ദികളാക്കി പ്രഖ്യാപിച്ച നോട്ട് റദ്ദാക്കല്‍ സര്‍ക്കാര്‍ നടപടിയുടെ വിശ്വാസ്യത സമൂഹത്തെ ബോധ്യപ്പെടുത്താനുള്ള ചെപ്പടിവിദ്യ മാത്രമായിരുന്നുവെന്നു തെളിഞ്ഞിരിക്കുകയാണ്.

നോട്ട് റദ്ദാക്കിയ നടപടിയില്‍ കോടീശ്വരന്മാര്‍ക്ക് ഒരു അങ്കലാപ്പുമില്ല. പാവപ്പെട്ട ജനത എ.ടി.എമ്മുകള്‍ക്കും ബാങ്കുകള്‍ക്കും മുന്‍പില്‍ ക്യൂ നിന്നു തളര്‍ന്നുവീഴുന്നു. ചിലര്‍ മരിക്കുന്നു. അതുകണ്ട് ഉള്ളാലെ ചിരിക്കുകയാണ് ഇന്ത്യയിലെ ശതകോടീശ്വരന്മാര്‍. രാഷ്ട്രം നേരിട്ടുകൊണ്ടിരിക്കുന്ന പൊള്ളുന്ന പല യാഥാര്‍ഥ്യങ്ങളില്‍നിന്നും ജനശ്രദ്ധ തിരിച്ചുവിടാനുള്ള അടവുമാത്രമായിരുന്നോ അഞ്ഞൂറിന്റെയും ആയിരത്തിന്റെയും നോട്ടുകള്‍ പിന്‍വലിക്കല്‍.

വിനിമയരംഗത്തെ 85 ശതമാനം കറന്‍സികള്‍ ഒറ്റയടിക്കു മരവിപ്പിച്ചതിലൂടെ സാധാരണജനങ്ങളാണു മരവിച്ചുപോയത്. മരവിപ്പിച്ച നോട്ടുകള്‍ക്കു പകരം മൂല്യമുള്ള നോട്ടുകള്‍ അമ്പതുശതമാനമെങ്കിലും ലഭ്യമാക്കിയിരുന്നെങ്കില്‍ സാധാരണജനങ്ങള്‍ ഇന്നു കാണുംവിധം 100 രൂപയ്ക്കുവേണ്ടി നെട്ടോട്ടമോടുകയില്ലായിരുന്നു. കള്ളപ്പണം പുറത്തുകൊണ്ടുവരാനായിരുന്നു ഈ നടപടിയെങ്കില്‍ പിന്‍വലിക്കുന്ന നോട്ടുകള്‍ക്കു പകരം പുതിയനോട്ടുകള്‍ എന്തുകൊണ്ട് ഉറപ്പുവരുത്തിയില്ല.

ആറു മാസംമുമ്പ് ആരംഭിച്ചതാണ് ഈ പ്രക്രിയയെന്നാണു സര്‍ക്കാരിന്റെ അവകാശവാദം. അതു ശരിയാണെന്നു പൊതുജനത്തിനു വിശ്വാസം വരുന്ന ഒരു നടപടിയും സര്‍ക്കാരിന്റെ ഭാഗത്തുനിന്നുണ്ടായില്ല. ഇന്ത്യയില്‍ തിളച്ചുമറിഞ്ഞുകൊണ്ടിരിക്കുന്ന പല പ്രശ്‌നങ്ങളില്‍നിന്നും സമൂഹത്തിന്റെ ശ്രദ്ധ തിരിച്ചുവിടാന്‍ ബി.ജെ.പി നേതൃത്വം കണ്ട ഒറ്റമൂലിയാണു നോട്ടു മരവിപ്പിക്കല്‍.

വാര്‍ധക്യസഹജമായ അവശതകള്‍ അനുഭവിച്ചുകൊണ്ടിരിക്കുന്ന 95 വയസ്സ് പ്രായമുള്ള സ്വന്തം മാതാവിനെപ്പോലും ഈ തന്ത്രത്തിനുവേണ്ടി നരേന്ദ്രമോദി ഉപയോഗപ്പെടുത്തിയെന്നതു ലജ്ജാകരമാണ്. അംബാനിക്കും അദാനിക്കും നോട്ടു മരവിപ്പിക്കുന്ന വിവരം ചോര്‍ത്തിക്കൊടുത്തുവെന്ന് ആരോപിച്ചതു മറ്റാരുമല്ല. രാജസ്ഥാനിലെ ബി.ജെ.പി എം.എല്‍.എയായ ഭവാനി സിങ് ആയിരുന്നു. ചോര്‍ത്തിക്കൊടുത്തതിന്റെ തെളിവു പ്രതിപക്ഷത്തോടു ചോദിക്കുന്ന കേന്ദ്രം സ്വന്തം എം.എല്‍.എയോടാണ് അത് ആവശ്യപ്പെടേണ്ടത്.

ജനാധിപത്യവിരുദ്ധവും ഭരണഘടനാവിരുദ്ധവുമായ നടപടികളാണു സര്‍ക്കാര്‍ നടപ്പാക്കിക്കൊണ്ടിരിക്കുന്നത്. വിജയ് മല്യയടക്കമുള്ള ശതകോടീശ്വരന്മാരുടെ 7,016 കോടി രൂപയുടെ കുടിശ്ശിക ബാങ്കുകള്‍ നിഷ്പ്രയാസം എഴുതിത്തള്ളിയിരിക്കുന്നു. വിജയ്മല്യ 17 ബാങ്കുകളില്‍ നിന്നായി എടുത്ത 6,963 കോടി രൂപ തിരിച്ചുപിടിക്കാന്‍ ബാങ്കുകള്‍ സുപ്രി ം കോടതിയെ സമീപിച്ച ഉടനെയായിരുന്നു ഈ എഴുതിത്തള്ളല്‍. നോട്ടു മരവിപ്പിക്കുന്നതിനെതിരേയുള്ള പ്രതിഷേധങ്ങള്‍ക്കിടയില്‍ ഈ എഴുതിത്തള്ളല്‍ ആളറിയാതെ പോകുമെന്നു കേന്ദ്രസര്‍ക്കാര്‍ കരുതിയിരിക്കണം. അതു സാധിക്കുകയും ചെയ്തു.

മുത്വലാഖിന്റെ മറപിടിച്ച് ഏക സിവില്‍കോഡ് നടപ്പാക്കാന്‍ അണിയറയില്‍ തകൃതിയായ പ്രവര്‍ത്തനങ്ങള്‍ നടത്തിക്കൊണ്ടിരിക്കുന്നുവെന്നതാണു മറ്റൊരു കാര്യം. ബി.ജെ.പി സഹയാത്രികരെ ഉള്‍പ്പെടുത്തി രൂപീകരിച്ച നിയമകമ്മിഷന്‍ ഇതിനുള്ള പ്രവര്‍ത്തനങ്ങള്‍ ദ്രുതഗതിയില്‍ നടത്തുകയാണ്. നിയമകമ്മിഷന്റെ ചോദ്യാവലിയോടു വലിയ പ്രതികരണമില്ലാത്തതിനാല്‍ പ്രതികരണം അറിയിക്കാനുള്ള കാലാവധി നീട്ടിയിരിക്കുകയാണ്. വ്യക്തിനിയമബോര്‍ഡ് അധ്യക്ഷനായി ആറാംതവണയും തെരഞ്ഞെടുക്കപ്പെട്ട റാബിഅ് നദ്‌വി മോദി സര്‍ക്കാരിന്റെ ഗൂഢനീക്കങ്ങള്‍ക്കെതിരേ മുന്നറിയിപ്പു നല്‍കിയിട്ടുണ്ട്.

ലോകപ്രശസ്ത ഇസ്‌ലാമിക പ്രബോധകനും പണ്ഡിതനുമായ ഡോക്ടര്‍ സാക്കിര്‍ നായിക്കിന്റെ സംഘടനയായ ഇസ്‌ലാമിക് റിസര്‍ച്ച് ഫൗണ്ടേഷന്റെ(ഐ.ആര്‍.എഫ്) നിരോധനമാണ് മോദി സര്‍ക്കാരില്‍നിന്നുണ്ടായ അവസാനത്തെ അസന്തുഷ്ടിപ്രകടനം. എന്താണു കുറ്റമെന്നു പറയാതെയാണ് ഭരണഘടന ഉറപ്പുനല്‍കുന്ന മതപ്രബോധന സ്വാതന്ത്ര്യം കശാപ്പുചെയ്തിരിക്കുന്നത്. നോട്ടു മരവിപ്പിക്കലിനെത്തുടര്‍ന്നു മരവിച്ചുപോയ പൊതുമനഃസാക്ഷിക്കു മുന്‍പില്‍ ഇത്തരം കിരാതനടപടികള്‍ വിലപ്പോവുമെന്നു സര്‍ക്കാര്‍ കരുതുന്നുണ്ടാവണം. ഇസ്‌ലാമികസ്ഥാപനങ്ങളെയും ഉന്നതരായ വ്യക്തികളെയും ഇകഴ്ത്തിക്കൊണ്ടിരിക്കുന്നതും ഇസ്‌ലാമിക വിദ്യാഭ്യാസസ്ഥാപനങ്ങളെ തകര്‍ത്തുകൊണ്ടിരിക്കുന്നതും ഇതിന്റെ ഭാഗമാണ്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.