2020 October 28 Wednesday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

തൃണമൂല്‍ നേതാക്കള്‍ക്കെതിരേ ഇ.ഡി കേസെടുത്തു

ന്യൂഡല്‍ഹി: നാരദാ ഒളികാമറാ അന്വേഷണത്തില്‍പെട്ട തൃണമൂല്‍ കോണ്‍ഗ്രസ് നേതാക്കള്‍ക്കെതിരേ എന്‍ഫോഴ്‌സ്‌മെന്റ് ഡയരക്ടറേറ്റ്(ഇ.ഡി) സാമ്പത്തിക തട്ടിപ്പു നിയന്ത്രണ നിയമ(പി.എം.എല്‍.എ) പ്രകാരം കേസെടുത്തു. പശ്ചിമ ബംഗാള്‍ മന്ത്രിമാരും എം.പിമാരും ഉള്‍പ്പെടെയുള്ളവര്‍ക്കെതിരേയാണ് കേസ്.
ഒളികാമറാ വെളിപ്പെടുത്തലില്‍ പ്രാഥമികാന്വേഷണം നടത്തി സി.ബി.ഐ സമര്‍പ്പിച്ച എഫ്.ഐ.ആറിന്റെ അടിസ്ഥാനത്തില്‍ 13 തൃണമൂല്‍ നേതാക്കള്‍ക്കെതിരേയാണ് ഇ.ഡി കേസെടുത്തത്. പശ്ചിമ ബംഗാള്‍ മന്ത്രിമാരായ ഫര്‍ഹാദ് ഹക്കീം, സുവേന്ദു അധികാരി, സോവന്‍ ചാറ്റര്‍ജി, സുഭത്ര മുഖര്‍ജി, ലോക്‌സഭാ എം.പിമാരായ സുല്‍ത്താന്‍ അഹ്മദ്, സൗഗതാ റോയ്, കാകോലി ഘോഷ് ദസ്തിദാര്‍, അപരുപാ പൊഡ്ഡാര്‍, രാജ്യസഭാ എം.പി മുകുള്‍ റോയ് എന്നിവര്‍ കേസിലുള്‍പ്പെട്ടവരില്‍ പ്രമുഖരാണ്.
ഓപറേഷനില്‍ ഇവര്‍ക്കെതിരേ ഉയര്‍ന്ന കൈക്കൂലി ആരോപണം ഉദ്യോഗസ്ഥര്‍ അന്വേഷിക്കും. അടുത്ത ദിവസങ്ങളില്‍ ചോദ്യംചെയ്യാനായി നേതാക്കള്‍ക്ക് സമന്‍സ് അയക്കുമെന്ന് ഇ.ഡി അധികൃതര്‍ പറഞ്ഞു.
ചീഫ് ജസ്റ്റിസ് നിഷിത മഹാത്രെ, ജസ്റ്റിസ് ടി. ചക്രബര്‍ത്തി എന്നിവരുള്‍പ്പെട്ട കല്‍ക്കട്ട ഹൈക്കോടതി ഡിവിഷന്‍ ബെഞ്ചിന്റെ നിര്‍ദേശ പ്രകാരമാണ് ഒളികാമറാ ഓപറേഷന്റെ വെളിപ്പെടുത്തലില്‍ സി.ബി.ഐ അന്വേഷണം നടത്തിയത്. 2016ലെ നിയമസഭാ തെരഞ്ഞെടുപ്പിനു തൊട്ടുമുന്‍പാണ് നാരദാ ന്യൂസ് ഓണ്‍ലൈന്‍ പോര്‍ട്ടല്‍ ഒളികാമറാ ഓപറേഷന്‍ നടത്തിയത്.

 

Advt.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.