2024 February 28 Wednesday
രാജീവ് ഗാന്ധി വധക്കേസില്‍ ജയില്‍മോചിതനായ ശാന്തന്‍ മരിച്ചു

താജ്മഹലിലെ മുറികൾ തുറക്കണമെന്ന ഹരജി ബി.ജെ.പി നേതാവിന് അലഹബാദ് ഹൈക്കോടതിയുടെ രൂക്ഷവിമർശനം

ലഖ്‌നൗ
താജ്മഹലിന്റെ 22 മുറികൾ തുറന്ന് പരിശോധിക്കണമെന്നും അവിടെ ഹൈന്ദവ വിഗ്രഹങ്ങളുണ്ടോയെന്ന് അറിയണമെന്നുമുള്ള ബി.ജെ.പി നേതാവിന്റെ ഹരജി അലഹബാദ് ഹൈക്കോടതി രൂക്ഷവിമർശനത്തോടെ തള്ളി.
ഹൈക്കോടതിയുടെ ലഖ്‌നൗ ബെഞ്ചാണ് കേസ് പരിഗണിച്ചത്. ഹരജിക്കാരൻ ഈ വിഷയത്തിൽ ചരിത്രകാരന്മാരിൽനിന്ന് അറിവ് നേടണമെന്നും ബിരുദാനന്തര ബിരുദമോ പിഎച്ച്.ഡിയോ എടുക്കട്ടെയെന്നും കോടതി പറഞ്ഞു. ഏതെങ്കിലും സർവകലാശാല ഗവേഷണത്തിനു തടസം നിന്നാൽ കോടതിയെ സമീപിക്കാം.
നാളെ ജഡ്ജിമാരുടെ ചേംബറും പരിശോധിക്കണമെന്ന ഹരജിയുമായി എത്തുമല്ലോയെന്നും കോടതി ചോദിച്ചു.
പൊതുതാൽപര്യ ഹരജി സംവിധാനത്തെ കൊഞ്ഞനംകുത്തരുതെന്നും ജസ്റ്റിസുമാരായ ഡി.കെ ഉപാധ്യായ, സുഭാഷ് വിദ്യാർഥി എന്നിവർ ഹരജി തള്ളിക്കൊണ്ട് പറഞ്ഞു. ബി.ജെ.പി യൂത്ത് മീഡിയ ഇൻ ചാർജ് രജനീഷ് സിങ്ങാണ് ഹരജി ഫയൽ ചെയ്തത്.
മുറികൾ തുറന്ന് വിഗ്രഹങ്ങളുണ്ടോയെന്ന് പരിശോധിക്കാൻ ആർക്കിയോളജിക്കൽ സർവേ ഓഫ് ഇന്ത്യക്ക് നിർദേശം നൽകണമെന്നായിരുന്നു ഹരജി. താജ്മഹൽ പഴയ ശിവക്ഷേത്രമാണെന്ന് ചില ചരിത്രകാരന്മാരും ഹിന്ദു ഗ്രൂപ്പുകളും അവകാശപ്പെടുന്ന കാര്യവും ഹരജിയിൽ ചൂണ്ടിക്കാട്ടിയിരുന്നു.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.