2020 September 29 Tuesday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

തലസ്ഥാനത്ത് തെരുവുയുദ്ധം; കണ്ണൂരില്‍ യുവമോര്‍ച്ച-ഡി.വൈ.എഫ്.ഐ ഏറ്റുമുട്ടല്‍

 
 
തിരുവനന്തപുരം/കണ്ണൂര്‍: ആരോപണങ്ങളില്‍ കുടുങ്ങിയ മന്ത്രിമാരായ കെ.ടി ജലീലിന്റേയും ഇ.പി ജയരാജന്റേയും രാജി ആവശ്യപ്പെട്ട് തുടര്‍ച്ചയായ നാലാം ദിവസവും സംസ്ഥാന വ്യാപകമായി പ്രതിപക്ഷ സംഘടനകളുടെ പ്രതിഷേധം. മിക്കയിടങ്ങളിലും പ്രതിഷേധ മാര്‍ച്ചുകള്‍ തെരുവുയുദ്ധത്തില്‍ കലാശിച്ചു. പലയിടത്തും പൊലിസ് ജലപീരങ്കിയും കണ്ണീര്‍വാതകവും പ്രയോഗിച്ചു. കണ്ണൂര്‍ പാപ്പിനിശ്ശേരിയില്‍ മന്ത്രി ഇ.പി ജയരാജന്റെ വീട്ടിലേക്കു മാര്‍ച്ച് നടത്തിയ യുവമോര്‍ച്ച -ഡി.വൈ.എഫ്.ഐ പ്രവര്‍ത്തകര്‍ ഏറ്റുമുട്ടി. 
 തിരുവനന്തപുരത്ത് യൂത്ത് കോണ്‍ഗ്രസ് സെക്രട്ടേറിയറ്റിലേക്ക് നടത്തിയ മാര്‍ച്ചിനു നേരെ പൊലിസ് ജലപീരങ്കിയും കണ്ണീര്‍വാതകവും പ്രയോഗിച്ചു. എം.എല്‍.എമാരായ ഷാഫി പറമ്പില്‍, കെ.എസ് ശബരീനാഥന്‍ ഉള്‍പ്പെടെയുളളവര്‍ക്കു നേരെ ലാത്തിച്ചാര്‍ജുമുണ്ടായി.  സെക്രട്ടേറിയറ്റിലേക്ക് യുവമോര്‍ച്ച, എസ്.ഡി.പി.ഐ സംഘടനകളും മാര്‍ച്ച് നടത്തി. യുവമോര്‍ച്ച മാര്‍ച്ചിലും സംഘര്‍ഷവും ലാത്തിചാര്‍ജുമുണ്ടായി.   
പത്തനംതിട്ട, മലപ്പുറം, കോഴിക്കോട്, വയനാട് കലക്ടറേറ്റുകളിലേക്ക് കെ.എസ്.യു പ്രവര്‍ത്തകര്‍ മാര്‍ച്ച് നടത്തി. വയനാട് കോഴിക്കോട് ദേശീയപാത കെ.എസ്.യു പ്രവര്‍ത്തകര്‍ ഉപരോധിച്ചു. കൊല്ലത്ത് എം.എസ്.എഫ് പ്രവര്‍ത്തകര്‍ കലക്ടറേറ്റിലേക്ക് മാര്‍ച്ച് നടത്തി. ആലപ്പുഴയില്‍ നടത്തിയ കലക്ടറേറ്റ് മാര്‍ച്ചില്‍ എം.എസ്.എഫ് പ്രവര്‍ത്തകര്‍ മന്ത്രി കെ.ടി ജലീലിന്റെ കോലം കത്തിച്ചു.    കണ്ണൂര്‍ പാപ്പിനിശ്ശേരി അരോളിയിലെ മന്ത്രി ഇ.പി ജയരാജന്റെ വസതിയിലേക്ക് യുവമോര്‍ച്ച ജില്ലാ കമ്മിറ്റിയുടെ നേതൃത്വത്തില്‍ നടത്തിയ മാര്‍ച്ചിനിടെയാണ് ഏറ്റുമുട്ടല്‍.  യുവമോര്‍ച്ച നടത്തിയ മാര്‍ച്ച് മന്ത്രിയുടെ വസതിയുടെ ഒരു കിലോമീറ്റര്‍ അകലെ പൊലിസ് തടഞ്ഞതോടെ പ്രവര്‍ത്തകര്‍ ബാരിക്കേഡ് മറികടക്കാന്‍ ശ്രമിച്ചപ്പോള്‍ പൊലിസ് ജലപീരങ്കി പ്രയോഗിച്ചു. തുടര്‍ന്ന് തിരിച്ചു പോയ പ്രവര്‍ത്തകര്‍ ദേശീയ പാത ഉപരോധിക്കാന്‍ ശ്രമം നടത്തി.

Advt.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.