2024 February 29 Thursday
രാജീവ് ഗാന്ധി വധക്കേസില്‍ ജയില്‍മോചിതനായ ശാന്തന്‍ മരിച്ചു

ടൈപ്പ് റൈറ്റിങ് താളം തിരിച്ചുവരുന്നു

വി.കെ പ്രദീപ്
കണ്ണൂർ • കംപ്യൂട്ടറിന്റെ വരവും പിന്നെ കൊവിഡും കാരണം നിലച്ചുപോയ ടൈപ്പ് റൈറ്റിങ്ങിന്റെ താളം തിരിച്ചുവരുന്നു. പി.എസ്.സി ടൈപ്പിസ്റ്റ് അടക്കമുള്ള വിവിധ തസ്തികകളിലേക്ക് ടൈപ്പ് റൈറ്റിങ് ലോവർ, ഹയർ, ഹൈ സ്പീഡ് സർട്ടിഫിക്കറ്റുകൾ ഉള്ളവർക്ക് മുൻഗണന നൽകിത്തുടങ്ങിയതോടെയാണ് സമീപകാലത്ത് പൂട്ടപ്പെടുമെന്ന് കരുതിയ ടൈപ്പിങ് മേഖല ജീവശ്വാസം തിരിച്ചുപിടിക്കുന്നത്. കഴിഞ്ഞ ദിവസങ്ങളിൽ സംസ്ഥാനത്താകെ നടന്ന ഹിന്ദി, മലയാളം, ഇംഗ്ലിഷ് ടൈപ്പിസ്റ്റ് പരീക്ഷകൾക്ക് ആയിരങ്ങളാണ് പങ്കെടുത്തത്.
കംപ്യൂട്ടറിന്റെ ആധിക്യത്തെ തുടർന്ന് ടൈപ്പ് റൈറ്റിങ് പരിശീലന കേന്ദ്രങ്ങൾ വലിയ പ്രതിസന്ധിയിലായിരുന്നു. പിടിച്ച് നിൽക്കാനാകാതെ നിരവധി സ്ഥാപനങ്ങൾ പൂട്ടി. ബാക്കിയുള്ളവ കൊവിഡ് അപഹരിച്ച രണ്ട് വർഷക്കാലം പൂർണമായും അടഞ്ഞു.

ഇപ്പോൾ ഓരോ ജില്ലയിലും പ്രവർത്തിക്കുന്ന പരിശീലന കേന്ദ്രങ്ങളിൽ മോശമല്ലാത്ത എണ്ണം വിദ്യാർഥികൾ പരിശീലനത്തിനെത്തുന്നുവെന്ന് കണ്ണൂർ മേലെചൊവ്വയിലെ ഫ്രണ്ട്സ് കൊമേഴ്‌സ്യൽ ഇൻസ്റ്റിറ്റ്യൂട്ട് ഉടമ കെ.എം ബാലരാമൻ പറയുന്നു. അതിവേഗതയിൽ ടൈപ്പ് ചെയ്യുന്നവരെ ആവശ്യമുള്ള മേഖലകളിലേക്ക് ഉദ്യോഗാർഥികളെ തെരഞ്ഞെടുക്കുമ്പോൾ പി.എസ്.സിയും, താൽക്കാലിക നിയമനങ്ങൾക്കും നിലവിൽ ടൈപ്പ് റൈറ്റിങ് സർട്ടിഫിക്കറ്റുകൾക്ക് മുൻഗണന നൽകുന്നുണ്ട്. ഇതോടെയാണ് ടൈപ്പ് റൈറ്റിങ് കോഴ്‌സിനൊപ്പം അനുബന്ധ കംപ്യൂട്ടർ കോഴ്‌സുകളുമായി പരിശീലന കേന്ദ്രങ്ങളിൽ ടൈപ്പ് റൈറ്റിങ് താളം ഉയർന്ന് തുടങ്ങിയത്.

ടൈപ്പ് റൈറ്റിങ് പഠിച്ചവർക്ക് അതിവേഗതിയിൽ ടൈപ്പ് ചെയ്യാൻ കഴിയുന്നത് മൂലം ജോലി അതിവേഗത്തിൽ തീർക്കാനാവും. ടൈപ്പിസ്റ്റ് പോലുള്ള തസ്തികകളിൽ പി.എസ്.സി ഉദ്യോഗാർഥികളെ നിയമിക്കുമ്പോൾ ടൈപ്പ് റൈറ്റിങ് സർട്ടിഫിക്കറ്റ് നിർബന്ധമാക്കുകയും നിലവിൽ വർഷത്തിൽ രണ്ടു പ്രാവശ്യം നടക്കുന്ന പരീക്ഷ മൂന്നോ, നാലോ തവണ നടത്തുകയും ചെയ്താൽ നിലച്ചുപോകുമെന്ന് കരുതിയ ടൈപ്പ് റൈറ്റിങ് പരിശീലന മേഖല കരകയറുമെന്നാണ് ഈ മേഖല മൂലം ഉപജീവനം നടത്തുന്നവർ പറയുന്നത്.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.