2024 March 02 Saturday
രാജീവ് ഗാന്ധി വധക്കേസില്‍ ജയില്‍മോചിതനായ ശാന്തന്‍ മരിച്ചു

ജില്ലാ പഞ്ചായത്ത് ഇടത്തേക്കോ, വലത്തേക്കോ വയനാട്ടില്‍ ‘ഭാഗ്യം’ വിധിയെഴുതും

 

കല്‍പ്പറ്റ: യു.ഡി.എഫ് ഉരുക്കു കോട്ടയില്‍ വിള്ളല്‍ വീഴ്ത്തി എല്‍.ഡി.എഫ് നടത്തിയ മുന്നേറ്റം എട്ട് സീറ്റില്‍ ഒതുങ്ങിയതോടെ വയനാട് ജില്ലാ പഞ്ചായത്ത് ഭരണം നറുക്കെടുപ്പിനെ ആശ്രയിച്ച്.
ഇന്ന് നടക്കുന്ന പ്രസിഡന്റ്, വൈസ് പ്രസിഡന്റ് തെരഞ്ഞെടുപ്പില്‍ മുന്നണികളുടെ വോട്ടുകള്‍ അസാധുവായില്ലെങ്കില്‍ ജില്ലാ പഞ്ചായത്ത് പ്രസിഡന്റ് പദത്തിലേക്കെത്താന്‍ ഭാഗ്യത്തിന്റെ തുണ കൂടിയുണ്ടാകണം.
എല്‍.ഡി.എഫിന്റെ പ്രസിഡന്റ് സ്ഥാനാര്‍ഥി അമ്പലവയല്‍ ഡിവിഷനില്‍ നിന്നും വിജയിച്ചെത്തിയ സുരേഷ് താളൂരാണ്. ഏറെ പിടിവലികള്‍ക്ക് ശേഷമാണ് യു.ഡി.എഫ് തങ്ങളുടെ പ്രസിഡന്റ് സ്ഥാനാര്‍ഥിയെ ഇന്നലെ പ്രഖ്യാപിച്ചത്. കഴിഞ്ഞ ദിവസങ്ങളിലെല്ലാം നടന്ന മാരത്തണ്‍ ചര്‍ച്ചയുടെ തുടര്‍ച്ചയായിരുന്നു ഇന്നലെയും നടന്നത്. ഐ ഗ്രൂപ്പ് സ്ഥാനാര്‍ഥി പദം തങ്ങള്‍ക്ക് വേണമെന്ന നിലപാടിലുറച്ച് നിന്നതാണ് ചര്‍ച്ചകള്‍ നീളാന്‍ കാരണമായത്. ജനറല്‍ വിഭാഗത്തിന് മാറ്റിവെച്ച പ്രസിഡന്റ് പദത്തില്‍ നോട്ടമിട്ട് പ്രമുഖ നേതാക്കള്‍ വരെ മത്സര ഗോദയിലിറങ്ങിയിരുന്നെങ്കിലും ഇവരെല്ലാം പരാജയപ്പെട്ടു.
വിജയിച്ച് വന്നത് യൂത്ത് കോണ്‍ഗ്രസ്, കെ.എസ്.യു ജില്ലാ പ്രസിഡന്റുമാരായിരുന്നു. ഇവര്‍ രണ്ടുപേരും എ ഗ്രൂപ്പില്‍പ്പെട്ടവരാണ്. ജില്ലാ പഞ്ചായത്തില്‍ കോണ്‍ഗ്രസിന് ആറ് പ്രതിനിധികളാണുള്ളത്. ബാക്കി നാല് പേരും വനിതകളാണ്. പ്രസിഡന്റ് പദം ജനറല്‍ ആയത് കൊണ്ട് യുവ നേതാക്കളുടെ പേരാണ് തെരഞ്ഞെടുപ്പിന് ശേഷം ഉയര്‍ന്നു വന്നിരുന്നത്. യൂത്ത് കോണ്‍ഗ്രസ് ജില്ലാ പ്രസിഡന്റിനായിരുന്നു ഇതില്‍ കൂടുതല്‍ സാധ്യത കല്‍പ്പിക്കപ്പെട്ടതും.
എന്നാല്‍ ഐ ഗ്രൂപ്പ് തങ്ങളുടെ ഭാഗത്ത് നിന്നുള്ള വനിതാ അംഗത്തെ പ്രസിഡന്റ് സ്ഥാനാര്‍ഥിയാക്കണമെന്ന ആവശ്യം ഉന്നയിച്ചതോടെ കോണ്‍ഗ്രസിനുള്ളില്‍ പ്രസിഡന്റ് സ്ഥാനാര്‍ഥി പദത്തിനായി പിടിവലിയും ആരംഭിച്ചു. എ ഗ്രൂപ്പ് കൈവശം വെച്ചിരുന്ന കല്‍പ്പറ്റ നഗരസഭ ചെയര്‍മാന്‍ സ്ഥാനമടക്കം ഇത്തവണ ഐ ഗ്രൂപ്പിനാണ് നല്‍കിയത്. എന്നിട്ടും ജില്ലാ പഞ്ചായത്ത് പ്രസിഡന്റ് സ്ഥാനാര്‍ഥിത്വം എ ഗ്രൂപ്പിന് വിട്ട് നല്‍കാന്‍ ഐ നേതാക്കളില്‍ ചിലര്‍ തയ്യാറായില്ല. ഇതാണ് തെരഞ്ഞെടുപ്പിന് തലേദിവസവും സ്ഥാനാര്‍ഥി നിര്‍ണയ ചര്‍ച്ചകള്‍ നീണ്ടുപോകാന്‍ കാരണം. ഇന്നലെ വൈകിട്ട് ആറോടെയാണ് ഐ ഗ്രൂപ്പിന്റെ സമ്മര്‍ദങ്ങള്‍ അതിജീവിച്ച് യൂത്ത് കോണ്‍ഗ്രസ് ജില്ലാ പ്രസിഡന്റ് സംഷാദ് മരക്കാറിനെ പ്രസിഡന്റ് സ്ഥനാര്‍ഥിയാക്കാന്‍ ഡി.സി.സി തീരുമാനിച്ചത്. എല്‍.ഡി.എഫിന്റെ വൈസ് പ്രസിഡന്റ് സ്ഥനാര്‍ഥി സി.പി.ഐയിലെ ബിന്ദു ടീച്ചറാണ്. യു.ഡി.എഫില്‍ മുസ്‌ലിം ലീഗിലെ കെ.ബി നസീമയാണ് വൈസ് പ്രസിഡന്റ് സ്ഥാനത്തേക്ക് മത്സരിക്കുക. സുരേഷ് കാളൂര്‍ നറുക്കെടുപ്പില്‍ തോറ്റാല്‍ സി.പി.എമ്മിലെ ബിന്ദു പ്രകാശായിരിക്കും എല്‍.ഡി.എഫിന്റെ വൈസ് പ്രസിഡന്റെ് സ്ഥാനാര്‍ഥി. ആരൊക്കെ വാഴും ആരൊക്കെ വീഴുമെന്ന് ഇന്നറിയാം.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.