2020 September 21 Monday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

ചെങ്കടലിലെ തിറാന്‍, സനാഫിര്‍ ദ്വീപുകള്‍ ഇനി സഊദിക്കു കീഴില്‍

അബ്ദുസ്സലാം കൂടരഞ്ഞി

 

റിയാദ്: രാജ്യാന്തര കപ്പല്‍ ചാലിനടുത്തുള്ള ചെങ്കടലിലെ തന്ത്രപ്രധാനമായ തിറാന്‍, സനാഫിര്‍ ദ്വീപുകള്‍ ഇനി സഊദിക്കു കീഴില്‍. ചെങ്കടലിനു തെക്ക് ഭാഗത്തുള്ള സഊദി അധീനതയിലുള്ള ഫുര്‍സാന്‍ ദ്വീപ ശൃംഖലക്ക് ശേഷം പ്രദേശത്തെ എറ്റവും വലിയ ദ്വീപുകളാണ് സനാഫിര്‍, തീറാന്‍ ദ്വീപുകള്‍. അഖബ ഉള്‍ക്കടലിനെ ചെങ്കടലില്‍ നിന്നും വിഭജിക്കുന്ന തിറാന്‍ കടലിടുക്കിലാണ് ഈ രണ്ട് ദ്വീപുകളും സ്ഥിതി ചെയ്യുന്നത്.

80 ചതുരശ്ര കിലോമീറ്റര്‍ വിസ്തൃതിയുള്ള തിറാന്‍ ദ്വീപില്‍ നിലവില്‍ ജനവാസമില്ല. സൈനിക സേവനത്തിനു മാത്രമായാണ് ഉപയോഗിക്കന്നത്. ഈ ദ്വീപ് വഴിയാണ് നിര്‍ദ്ദിഷ്ട ചെങ്കടല്‍ പാലം (കോസ് വേ) കടന്നുപോകുന്നത്. സഊദി- ഈജിപ്ത് രാജ്യങ്ങളെ ബന്ധിപ്പിക്കുന്ന പാലമാണിത്. നിലവില്‍ ഒരു വ്യോമതാവളം മാത്രമുള്ള ഇവിടെയായിരിക്കും കോസ് വെയുടെ എമിഗ്രേഷന്‍.

33 ചതുരശ്ര കിലോമീറ്റര്‍ വിസ്തൃതിയുള്ള സനാഫിര്‍ ദ്വീപും ആള്‍ താമസമില്ലാത്തതാണ്. ഇരുരാജ്യങ്ങളും തമ്മിലുള്ള കരാര്‍ പ്രകാരം ഇരു ദ്വീപുകളില്‍ നിന്നുള്ള വിഭവങ്ങള്‍ ഇരു രാജ്യങ്ങളും തമ്മില്‍ പങ്കുവെക്കും.

2010 മുതലാണ് ഇരു രാഷട്രങ്ങളും സമുദ്രാതിര്‍ത്തി നിര്‍ണ്ണയ ചര്‍ച്ചകള്‍ തുടങ്ങിയത്. 1990ലെ പ്രസിഡന്‍ഷ്യല്‍ ഉത്തരവിന്റെ അടിസ്ഥാനത്തിലാണ് നിര്‍ണയം പൂര്‍ത്തീകരിച്ചതെന്ന് ഈജിപ്ത് പാര്‍ലമെന്റ് നേരത്തെ പുറത്തിറക്കിയ പ്രസ്താവനയില്‍ പറഞ്ഞു. ദ്വീപുകളുടെ നിയന്ത്രണം സഊദിക്കു ലഭിക്കുന്നതോടെ രാജ്യത്തിന്റെ പടിഞ്ഞാറ് മേഖലയില്‍ നിന്നുള്ള പ്രശ്‌നങ്ങളെ അതിജീവിക്കാന്‍ കഴിയുമെന്ന കണക്കു കൂട്ടലിലാണ് സഊദി ഭരണകൂടം.

നേരത്തെ, സഊദി ഭരണാധികാരി സല്‍മാന്‍ ഇബ്‌നു അബ്ദുല്‍ അസീസിന്റെ ഈജിപ്ത് സന്ദര്‍ശനം വിവിധ പദ്ധതികളെ കൊണ്ട് ചരിത്രത്തിലിടം നേടിയിരുന്നു. സമുദ്രാതിര്‍ത്തി നിര്‍ണ്ണയവും ഇതിലാണ് വീണ്ടും ചര്‍ച്ചയായത്. സമുദ്രാതിര്‍ത്തി കരാറിന് ഈജിപ്ത് മന്ത്രിസഭയുടെ അംഗീകാരം ലഭിച്ചെങ്കിലും ജനുവരി 16ന് കരാര്‍ ഈജിപ്ത് പാര്‍ലമെന്റില്‍ അവതരിപ്പിക്കുന്നതോടെയാണ് പ്രാബല്യത്തില്‍ വരിക.

 

 

Advt.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.