2023 June 05 Monday
പോരാട്ടങ്ങളും യാതനകളും മനുഷ്യനെ പൂര്‍ണതയിലെത്തിക്കുന്നു. ഇന്ദിരാഗാന്ധി

ചിറകടിക്കും മുമ്പേ നിലം പൊത്തുന്നു, പക്ഷി ജീവിതങ്ങൾ

മുഷ് താഖ് കൊടിഞ്ഞി
തിരൂരങ്ങാടി • കാറ്റും കോളും വന്നിട്ടും ചില്ലകളിൽ അള്ളിപ്പിടിച്ചിരുന്ന് അവർ മുട്ടയിട്ടു; കുഞ്ഞുങ്ങളെ വിരിയിച്ചു. ഒട്ടേറെ തലമുറകൾ പിറവികൊണ്ടു പറന്നു പോയി.
പക്ഷേ യന്ത്രക്കൈ പിടിച്ചുകുലുക്കിയപ്പോൾ പിടിച്ചു നിൽക്കാനായില്ല. ചുട്ടുപൊള്ളുന്ന ടാർപാതയിലേക്ക് എറിയപ്പെടുമ്പോൾ ഒന്നു പിടയാൻ പോലുമായില്ല. കണ്ടുനിന്നവരുടെ കരളലിയിച്ച് നിമിഷാർധത്തിൽ പിടഞ്ഞില്ലാതായി പക്ഷി കുഞ്ഞുങ്ങൾ. കുഞ്ഞുങ്ങൾക്ക് ചുറ്റും അമ്മക്കിളികൾ വട്ടമിട്ട് കരഞ്ഞു.
വ്യാഴാഴ്ച മലപ്പുറം എ.ആർ നഗർ പഞ്ചായത്തിലെ വി.കെ പടിയിലെ പക്ഷിക്കുരുതിയുടെ ദാരുണ ചിത്രം മനഃസാക്ഷിയെ ഞെട്ടിക്കും. ഇടിമൂഴിക്കൽ – കുറ്റിപ്പുറം ദേശീയപാത വികസനത്തിനാണ് പാതയോരത്തെമരങ്ങൾ മുറിച്ചത്. രാത്രിയും പണി നടക്കുന്നതിനാൽ മരങ്ങളിലെ പക്ഷികളുടെ ദുരവസ്ഥ ആരുമറിഞ്ഞില്ല. ദേശവാസികൾ മൊബൈലിൽ ദൃശ്യം പകർത്തിയതോടെയാണ് ഇക്കാര്യം പുറംലോകമറിഞ്ഞത്. കൂടുകൾ മാറ്റാതെ മരങ്ങൾ മുറിച്ചതോടെയാണ് പക്ഷികൾ നിലം പതിച്ചത്. നീർക്കാക്കകളും കൊക്കുകളുമടക്കം 60 ലേറെ പക്ഷിക്കുഞ്ഞുങ്ങളും അടയിരുന്ന 30 ലേറെ തള്ളപ്പക്ഷികളുമാണ് ചത്തത്.
കൂടുള്ള മരം പക്ഷി പറന്നു പോയ ശേഷമേ മുറിക്കാവൂ എന്ന ചട്ടമുള്ളപ്പോഴാണ് നിർദയം അധികൃതരുടെ നടപടി.
ജെ.സി.ബി ഡ്രൈവറെയും, മരംമുറി കരാറുകാരനെയും, തൊഴിലാളിയെയും എടവണ്ണ റേഞ്ച് ഓഫീസർ തറമ്മൽ റഹീസ് അറസ്റ്റ് ചെയ്തിട്ടുണ്ട്. ദേശീയപാത നിർമാണ കരാറുകാരന്റെ പേരിൽ കേസെടുത്തു. ഡ്രൈവറെ കസ്റ്റഡിയിലെടുത്തു.
കരാറുകാരനെതിരേ കർശന നടപടി സ്വീകരിക്കുമെന്ന് വനം മന്ത്രി എ.കെ ശശീന്ദ്രൻ തൊടുപുഴയിൽ പറഞ്ഞു.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Comments are closed for this post.