തിരുവനന്തപുരം: കൈത്തറി മേഖലയ്ക്ക് പുത്തന്‍ ഉണര്‍വ് പകര്‍ന്ന് സംസ്ഥാന സര്‍ക്കാരിന്റെ സൗജന്യ സ്‌കൂള്‍ യൂനിഫോം പദ്ധതി. നാല് വര്‍ഷം കൊണ്ട് 124 ലക്ഷം മീറ്റര്‍ തുണിയാണ് സൗജന്യ സ്‌കൂള്‍ യൂനിഫോം പദ്ധതികള്‍ക്കായി നെയ്‌തെടുത്തത്. 2017-18 വര്‍ഷം 2,689 സര്‍ക്കാര്‍ സ്‌കൂളുകളിലെ ഒന്നു മുതല്‍ അഞ്ച് വരെ ക്ലാസുകളിലുള്ള 2.2 ലക്ഷം വിദ്യാര്‍ഥികള്‍ക്ക് 9.6 ലക്ഷം മീറ്റര്‍ യൂനിഫോം തുണി വിതരണം ചെയ്തു. 2018-19 വര്‍ഷം 3,578 സര്‍ക്കാര്‍ സ്‌കൂളുകളിലെ ഒന്നു മുതല്‍ ഏഴ് വരെ ക്ലാസുകളിലെ 4.5 ലക്ഷം വിദ്യാര്‍ഥികള്‍ക്ക് 23 ലക്ഷം മീറ്റര്‍ തുണിയാണ് വിതരണം ചെയ്തത്. 2019 – 20 വര്‍ഷം സര്‍ക്കാര്‍ സ്‌കൂളുകളിലെ ഒന്ന് മുതല്‍ ഏഴ് വരെ ക്ലാസുകളിലെയും, എയ്ഡഡ് മേഖലയിലെ ഒന്ന് മുതല്‍ നാല് വരെയുള്ള ക്ലാസുകളിലെയും 8.5 ലക്ഷം വിദ്യാര്‍ഥികള്‍ക്ക് 41.56 ലക്ഷം മീറ്റര്‍ യൂനിഫോം തുണിയും വിതരണം ചെയ്തു. അടുത്ത അധ്യയന വര്‍ഷത്തേക്കായി 42 ലക്ഷം മീറ്റര്‍ യൂനിഫോം തുണി വിതരണത്തിന് തയാറായിട്ടുണ്ട്.
ആറായിരത്തോളം നെയ്ത്ത് തൊഴിലാളികള്‍ക്ക് നേരിട്ടും രണ്ടായിരത്തോളം പേര്‍ക്ക് അനുബന്ധമേഖലയിലും തൊഴില്‍ നല്‍കാന്‍ സൗജന്യ സ്‌കൂള്‍ യൂനിഫോം പദ്ധതിയിലൂടെ സാധിച്ചു.