2022 August 12 Friday
നല്ല മനുഷ്യന്‍ സ്‌നേഹം മൂലം അനുസരിക്കുന്നു, അല്ലാത്തവന്‍ ഭയം മൂലവും.       അരിസ്റ്റോട്ടില്‍

ഗോണി കൊടുങ്കാറ്റ്; ഫിലിപ്പീന്‍സില്‍ 10 ലക്ഷം ആളുകളെ മാറ്റിപ്പാര്‍പ്പിച്ചു

 

മനില: ശക്തമായ ഗോണി കൊടുങ്കാറ്റ് ആഞ്ഞുവീശിയ ഫിലിപ്പീന്‍സില്‍ 10 ലക്ഷം പേരെ സുരക്ഷിത കേന്ദ്രങ്ങളിലേക്ക് മാറ്റിപ്പാര്‍പ്പിച്ചു. തലസ്ഥാനമായ മനില അടക്കമുള്ള സ്ഥലങ്ങളില്‍ കൊടുങ്കാറ്റിനോടപ്പം അതിശക്തമായ മഴയും അനുഭവപ്പെടുന്നുണ്ട്. കൊടുങ്കാറ്റ് അപകട മേഖലകളിലെ നിരവധി പേരെ ബാധിച്ചതായും കനത്ത നാശനഷ്ടങ്ങള്‍ പ്രതീക്ഷിക്കുന്നതായും ദുരന്ത നിവാരണ വിഭാഗംമേധാവി റികാര്‍ഡൊ ജലാഡ് അറിയിച്ചു. കാറ്റന്‍ഡൈ്വന്‍സ് പ്രവിശ്യയില്‍ മണിക്കൂറില്‍ 225 കിലോമീറ്റര്‍ വേഗതയിലാണ് കാറ്റ് ആഞ്ഞടിച്ചത്. കാറ്റഗറി അഞ്ചില്‍ ഉള്‍പ്പെട്ട കൊടുങ്കാറ്റ് 280കിലോമീറ്റ വരെ വേഗത കൈവരിക്കാനും സാധ്യതയുണ്ടെന്നാണ് നിഗമനം.
മനില അന്താരാഷ്ട്ര വിമാനത്താവളം അടച്ചിടാന്‍ നിര്‍ദേശിച്ചിരിക്കുകയാണ്.
മനില, അല്‍ബെയ് അടക്കമുള്ള സ്ഥലങ്ങളില്‍ നിന്ന് ജനങ്ങളെ മാറ്റിപ്പാര്‍പ്പിച്ചു. അതിശക്തമായ കാറ്റുണ്ടാകുമെന്നാണ് പ്രതീക്ഷിക്കുന്നത്. വ്യാപകമായ വെള്ളപ്പൊക്കത്തിനും മണ്ണിടിച്ചിലിനും സാധ്യതയുണ്ടെന്നും ദേശീയ ദുരന്ത നിവാരണ വിഭാഗം വക്താവ് മാര്‍ക്ക് ടിംബല്‍ മുന്നറിയിപ്പുനല്‍കി. മുന്‍കരുതല്‍ നടപടിയായി ദുരിതാശ്വാസ സംവിധാനങ്ങള്‍ ഊര്‍ജിതമാക്കിയതായി അധികൃതര്‍ അറിയിച്ചു.
കഴിഞ്ഞയാഴ്ച വീശിയടിച്ച മോലാവെ കൊടുങ്കാറ്റില്‍ 22 പേര്‍ കൊല്ലപ്പെട്ടിരുന്നു. 2013ലെ കൊടുങ്കാറ്റില്‍ ഫിലിപ്പീന്‍സില്‍ 7300 പേര്‍ മരിച്ചിരുന്നു.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

Advt.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.