2020 October 20 Tuesday
ചെയ്യേണ്ടത് ചെയ്യാതിരിക്കുന്നതും ചെയ്യരുതാത്തത് ചെയ്യുന്നതും ഒരുപോലെ തെറ്റാണ് -തിരുക്കുറള്‍

ആളൊഴിഞ്ഞ വീട്ടിലെ കൊലപാതകം; സാമ്പത്തിക ഇടപാട് സംബന്ധിച്ച തര്‍ക്കത്തെ തുടര്‍ന്നെന്ന് പ്രതി

ഏറ്റുമാനൂര്‍: നഗരത്തില്‍ പ്രവാസിയുടെ ആളൊഴിഞ്ഞ വീട്ടില്‍വച്ച് മധ്യവയസ്‌കയെ കൊലപ്പെടുത്തിയത് സാമ്പത്തിക ഇടപാട് സംബന്ധിച്ച തര്‍ക്കത്തെ തുടര്‍ന്നെന്ന് പ്രതി. അറസ്റ്റിലായ പ്രതിയെ ദേഹാസ്വാസ്ഥ്യത്തെ തുടര്‍ന്ന് കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
കൊല്ലപ്പെട്ട ഉഷാകുമാരി തന്നോട് 34000 രൂപയും അവരുടെ ഭര്‍ത്താവ് 2000 രൂപയും കടം വാങ്ങിയിരുന്നെന്നും പലവട്ടം ആവശ്യപ്പെട്ടിട്ടും പണം തിരികെ തന്നില്ലെന്നും ചൊവ്വാഴ്ച ഇതുസംബന്ധിച്ചുണ്ടായ തര്‍ക്കമാണ് കൊലപാതകത്തില്‍ കലാശിച്ചതെന്നും അറസ്റ്റിലായ പ്രതി പ്രഭാകരന്‍ പൊലിസിനോട് പറഞ്ഞു.
കഴുത്തില്‍ തോര്‍ത്ത് മുറുക്കി ശ്വാസം മുട്ടിച്ചാണ് കൊലപ്പെടുത്തിയതെന്നും ഇയാള്‍ പറയുന്നു. എന്നാല്‍ പൊലിസ് ഈ മൊഴികള്‍ പൂര്‍ണ്ണമായി ഉള്‍കൊണ്ടിട്ടില്ല. പോസ്റ്റ്‌മോര്‍ട്ടം റിപ്പോര്‍ട്ട് കൂടി കിട്ടിയാലേ സംഭവത്തിന്റെ സ്ഥിതിഗതികള്‍ പൂര്‍ണ്ണമായി വിലയിരുത്താനാവൂ. ചൊവ്വാഴ്ച രാവിലെയാണ് കട്ടച്ചിറ കടവില്‍ രാജന്റെ ഭാര്യ ഉഷാകുമാരി(50)യുടെ മൃതദേഹം ഏറ്റുമാനൂര്‍ പാനൂര്‍ ടോമി ജോസഫിന്റെ വസതിയില്‍ കണ്ടെത്തിയത്. സൗത്ത് ആഫ്രിക്കയിലുള്ള ടോമിയുടെ ഏറ്റുമാനൂരില്‍ താമസിക്കുന്ന സഹോദരി വത്സമ്മയെ പ്രഭാകരന്‍ തന്നെയാണ് കൊലപാതകവിവരം വിളിച്ച് അറിയിച്ചത്. വത്സമ്മ അറിയിച്ചതനുസരിച്ച് മറ്റക്കരയിലുള്ള ബന്ധുക്കള്‍ എത്തിയ ശേഷമാണ് പൊലിസിന് വിവരം നല്‍കിയത്. തുടര്‍ന്ന് പൊലിസ് എത്തി വീട് തുറന്നു പരിശോധിക്കുകയായിരുന്നു.
നാല്‍പ്പതിലേറെ വര്‍ഷങ്ങളായി ടോമിയുടെയും ബന്ധുക്കളുടെയും വീടുകളില്‍ വിശ്വസ്ഥനായി ജോലി ചെയ്തു വന്നിരുന്നയാളാണ് മറ്റക്കര സ്വദേശിയായ പ്രഭാകരന്‍.
ചൊവ്വാഴ്ച കൃത്യം കഴിഞ്ഞ് വീട് പൂട്ടി വത്സമ്മയോട് 2500 രൂപയും വാങ്ങിയാണ് ഇയാള്‍ സ്ഥലം വിട്ടത്. കോഴിക്കോടിന് പോകുകയാണെന്നാണ് ടോമിയുടെ സഹോദരിയെ ഫോണില്‍ വിളിച്ചപ്പോള്‍ പ്രഭാകരന്‍ പറഞ്ഞത്. എന്നാല്‍ ഇടുക്കിയിലെ ബന്ധുവീട്ടിലേക്കാണ് പ്രഭാകരന്‍ പോയത്.
പൊലിസിന്റെ അന്വേഷണത്തില്‍ മൊബൈല്‍ റേഞ്ച് കാഞ്ഞിരപ്പള്ളി, എരുമേലി മേഖലയില്‍ കണ്ടെത്തിയിരുന്നു. വൈകിട്ട് പള്ളിക്കത്തോട്ടിലെ ബന്ധുവീട്ടില്‍ തിരിച്ചെത്തിയ പ്രഭാകരനെ പൊലിസ് അവിടെനിന്നും അറസ്റ്റു ചെയ്യുകയായിരുന്നു.
ഏറ്റുമാനൂര്‍ പൊലിസ് സ്റ്റേഷനില്‍ കസ്റ്റഡിയില്‍ ഇരിക്കെ ഇന്നലെ രാവിലെ പ്രഭാകരന് പനിയും ദേഹാസ്വസ്ഥ്യവും അനുഭവപ്പെട്ടു. ഇയാളുടെ രണ്ട് സഹോദരന്മാര്‍ ഹൃദ്രോഗത്താലാണ് മരിച്ചത്. ഹൃദ്രോഗി കൂടിയായ പ്രഭാകരനെ ആശുപത്രിയില്‍ നിന്നും വിട്ടതിനുശേഷമേ കൂടുതല്‍ ചോദ്യം ചെയ്യല്‍ നടക്കൂ എന്ന് പൊലിസ് പറയുന്നു.

 

Advt.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.