2019 June 20 Thursday
നീ നിനക്കുതന്നെ ദീപമായി വര്‍ത്തിക്കുന്നുവെങ്കില്‍ നീ നിന്നില്‍തന്നെ അഭയം കണ്ടെത്തുന്നുവെന്ന് സാരം – ബുദ്ധന്‍

തിരുവനന്തപുരം വിമാനത്താവളം സ്വര്‍ണക്കടത്ത് കേന്ദ്രം: ഉദ്യോഗസ്ഥബന്ധം അന്വേഷിക്കാന്‍ സി.ബി.ഐ എത്തുന്നു

തിരുവനന്തപുരം: വിമാനത്താവളത്തിലെ സ്വര്‍ണക്കടത്തുമായി ബന്ധപ്പെട്ട് കസ്റ്റംസ് ഉദ്യോഗസ്ഥന്‍ അറസ്റ്റിലായതോടെ ഇതുസംബന്ധിച്ച് കൂടുതല്‍ അന്വേഷണത്തിന് സി.ബി.ഐ തലസ്ഥാനത്തെത്തും. തിരുവനന്തപുരം വിമാനത്താവളത്തില്‍ കഴിഞ്ഞ 18 മാസത്തിനിടെ 5,000 ത്തിലധികം പവന്‍ സ്വര്‍ണമാണ് പിടികൂടിയത്. സ്വര്‍ണക്കടത്തിന്റെ പ്രധാന കേന്ദ്രമായി ഇവിടം മാറിയതിനാലാണ് സി.ബി.ഐ തന്നെ നേരിട്ട് അന്വേഷണത്തിനെത്തുന്നത്.

തിരുവനന്തപുരം വിമാനത്താവളം രാജ്യത്തെ ഏറ്റവും വലിയ സ്വര്‍ണക്കടത്ത് കേന്ദ്രമായതിന്റെ പിന്നിലെ ഉദ്യോഗസ്ഥബന്ധമാണ് പ്രധാനമായും സി.ബി.ഐ അന്വേഷിക്കുക. സര്‍ക്കാരിനുണ്ടായ നഷ്ടത്തിന് പുറമെ, സ്വര്‍ണക്കടത്തിന് പിന്നിലെ അഴിമതിയും സി.ബി.ഐ അന്വേഷിക്കും. സി.ബി.ഐ കൊച്ചി യൂനിറ്റോ, ചെന്നൈയിലെ ദക്ഷിണ മേഖല ജോയിന്റ് ഡയരക്ടറുടെ മേല്‍നോട്ടത്തിലോ ആയിരിക്കും അന്വേഷണം. കസ്റ്റംസ്, വിമാനത്താവള അതോറിറ്റി ജീവനക്കാര്‍, എമിഗ്രേഷന്‍ ബ്യൂറോ, സി.ഐ.എസ്.എഫ് തുടങ്ങിയവയെല്ലാം അന്വേഷണ പരിധിയില്‍ വരും.

തിരുവനന്തപുരം വിമാനത്താവളം വഴി സ്വര്‍ണം കടത്താന്‍ സഹായിച്ച കസ്റ്റംസ് എയര്‍ ഇന്റലിജന്‍സ് സൂപ്രണ്ട് വി. രാധാകൃഷ്ണനെ(52) കഴിഞ്ഞ ദിവസം ഡയറക്ടറേറ്റ് ഓഫ് റവന്യൂ ഇന്റലിജന്‍സ് (ഡി.ആര്‍.ഐ) അറസ്റ്റ് ചെയ്തിരുന്നു. കോഫെപോസ ചുമത്തി കൊച്ചിയിലെ സാമ്പത്തിക കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തിരിക്കുകയാണ്.
സംഭവത്തില്‍ കൂടുതല്‍ ഉദ്യോഗസ്ഥര്‍ക്ക് പങ്കുണ്ടെന്നാണ് കേസന്വേഷിക്കുന്ന റവന്യൂ ഇന്റലിജന്‍സിന്റെ വിലയിരുത്തല്‍. ഉന്നത ഉദ്യോഗസ്ഥര്‍ക്ക് ജുവലറികള്‍ പങ്കുകച്ചവടമുണ്ടെന്നും ഡി.ആര്‍.ഐ കണ്ടെത്തിയിട്ടുണ്ട്. ഈ സാഹചര്യത്തിലാണ് കൂടുതല്‍ അന്വേഷണത്തിന് സി.ബി.ഐ എത്തുന്നത്. സി.ബി.ഐ എത്തുന്നതോടെ ഇതുവരെയുള്ള കേസ് വിവരങ്ങള്‍ ഡി.ആര്‍.ഐ സി.ബി.ഐക്ക് കൈമാറും. അഴിമതി, കള്ളക്കടത്ത് കേസുകളില്‍ കേന്ദ്രസര്‍ക്കാര്‍ ജീവനക്കാര്‍ ഉള്‍പ്പെട്ടാല്‍ സി.ബി.ഐക്ക് സ്വമേധയാ കേസെടുക്കാനാകും.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.