2018 November 21 Wednesday
ജനങ്ങളേ, നിങ്ങള്‍ക്ക് നിങ്ങളുടെ നാഥനിങ്കലില്‍നിന്നുള്ള തത്വോപദേശങ്ങളും ശമനവും മാര്‍ഗദര്‍ശനവും സത്യവിശ്വാസികള്‍ക്ക് കാരുണ്യവും വന്നെത്തിയിരിക്കുന്നു

ലോവര്‍ പെരിയാര്‍ തകര്‍ന്നത് പ്രളയത്തിലല്ല; ഉദ്യോഗസ്ഥര്‍ മറച്ചുവച്ചു

തകര്‍ച്ചയ്ക്ക് കാരണമായത് ടണല്‍ അടഞ്ഞിട്ടും  ഉല്‍പ്പാദനം തുടര്‍ന്നത്

ബാസിത് ഹസന്‍

തൊടുപുഴ: ലോവര്‍ പെരിയാര്‍ വൈദ്യുതി നിലയത്തിന്റെ തകര്‍ച്ചയ്ക്ക് കാരണമായത് എയര്‍ ബ്ലോക്കുണ്ടായി ടണല്‍ അടഞ്ഞിട്ടും വകവയ്ക്കാതെ ഉല്‍പ്പാദനം തുടര്‍ന്നതിനാല്‍. ഓഗസ്റ്റ് 11ന് രാത്രി 11.30 ഓടെയാണ് ടണലില്‍ എയര്‍ ബ്ലോക്കുണ്ടായി വന്‍ മര്‍ദം രൂപപ്പെട്ടതും 70 ടണ്‍ ഭാരമുള്ള ഗെയ്റ്റടക്കം തകര്‍ത്തെറിയപ്പെട്ടതും. എന്നാല്‍, ഇത് അവഗണിച്ച് 12നും 13നും ഉല്‍പ്പാദനം നടത്തിയതാണ് കല്ലും മണ്ണും ചെളിയും കയറി ടര്‍ബൈനുകളുടേതടക്കം തകര്‍ച്ചയ്ക്ക് വഴിവച്ചത്. 12ന് 2.56 ദശലക്ഷം യൂനിറ്റും 13ന് 1.312 ദശലക്ഷം യൂനിറ്റും ലോവര്‍ പെരിയാര്‍ പവര്‍ ഹൗസില്‍ ഉല്‍പ്പാദിപ്പിച്ചു. 14നാണ് ഉല്‍പ്പാദനം നടത്താനാവാത്ത അവസ്ഥയുണ്ടായത്. പ്രളയത്തിലാണ് ലോവര്‍ പെരിയാര്‍ വൈദ്യുതി നിലയം തകര്‍ന്നതെന്ന കെ.എസ്.ഇ.ബി ഉദ്യോഗസ്ഥരുടെ വാദം ഇതോടെ പൊളിയുകയാണ്. മന്ത്രി എം.എം മണിയും ഇത് ആവര്‍ത്തിച്ചിരുന്നു. ഓഗസ്റ്റ് 15 മുതലാണ് സംസ്ഥാനത്ത് പ്രളയം തീക്ഷ്ണമായത്. 

അണക്കെട്ടിലെ കൂറ്റന്‍ ട്രാഷ് റാക്ക് (അരിപ്പ) അടഞ്ഞതിനെത്തുടര്‍ന്ന് ടണല്‍ മുഖത്ത് ചെളിയടിഞ്ഞ് വെള്ളമൊഴുക്ക് നിലയ്ക്കുകയായിരുന്നു. തുടര്‍ന്നുണ്ടായ എയര്‍ ബ്ലോക്ക് വന്‍ മര്‍ദത്തോടെ തിരിച്ചടിച്ചു. ടണല്‍ ഗെയ്റ്റ് മൂന്ന് കഷണങ്ങളായി ചിന്നിച്ചിതറി വെള്ളം ടവറിന്റെ മുകളില്‍ പൊങ്ങി 25 മിനിറ്റോളം കറങ്ങിയടിച്ചു. ആറ് മീറ്ററിലധികം വ്യാസമുള്ള ട്രാഷ് റാക്ക് പൊടിഞ്ഞ നിലയില്‍ ഒലിച്ചുപോയി. ടണലില്‍ ഏതാണ്ട് 600 മീറ്ററോളം ഭാഗം ചെളിയടിഞ്ഞു.
സംഭവത്തിന്റെ ഉത്തരവാദിത്തം സംബന്ധിച്ച് സിവില്‍-ഇലക്ട്രിക്കല്‍ വിഭാഗം ഉദ്യോഗസ്ഥര്‍ തമ്മില്‍ പരസ്പരം പഴിചാരുകയാണ്. സിവില്‍ വിഭാഗം ഉദ്യോഗസ്ഥരുടെ പിഴവാണ് ട്രാഷ് റാക്ക് അടയുന്നതിലേക്ക് എത്തിച്ചതെന്ന് ഇലക്ട്രിക്കല്‍ വിഭാഗം ആരോപിക്കുന്നു. സംഭവം നടക്കുമ്പോള്‍ ഉത്തരവാദപ്പെട്ട ഉദ്യോഗസ്ഥരാരും അണക്കെട്ടില്‍ ഉണ്ടായിരുന്നില്ല. എതാനും കരാര്‍ സെക്യൂരിറ്റി ഉദ്യോഗസ്ഥരും രണ്ട് ഓപറേറ്റര്‍മാരും മാത്രമാണ് ഉണ്ടായിരുന്നത്. ഇത് സിവില്‍ വിഭാഗത്തിന്റെ ഗുരുതരമായ കൃത്യവിലോപമാണെന്നാണ് ഇലക്ട്രിക്കല്‍ വിഭാഗം ആരോപിക്കുന്നത്. എന്നാല്‍, സംഭവത്തിന്റെ പൂര്‍ണ ഉത്തരവാദിത്തം ഇലക്ട്രിക്കല്‍ വിഭാഗത്തിനാണെന്ന് സിവില്‍ വിഭാഗം പറയുന്നു. ടണല്‍ ഗെയ്റ്റ് തകര്‍ന്നതിനാല്‍ പവര്‍ ഹൗസ് ഓടിക്കുന്നത് അപകടമാണെന്നും ഷട്ട് ഡൗണ്‍ ചെയ്യണമെന്നും കാണിച്ച് ഓഗസ്റ്റ് 12ന് രാവിലെ 10 മണിക്ക് ജനറേഷന്‍ വിഭാഗത്തിന് അണക്കെട്ടിന്റെ ചുമതലയുള്ള സിവില്‍ സബ് ഡിവിഷന്‍ കത്ത് നല്‍കിയെന്നും ഇത് അവഗണിച്ച് ഉല്‍പ്പാദനം നടത്തിയതാണ് പവര്‍ ഹൗസിന്റെ തകര്‍ച്ചയ്ക്ക് വഴിവച്ചതെന്ന് സിവില്‍ വിഭാഗം പറയുന്നു.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.