2018 November 15 Thursday
ഒരു കടമ നിര്‍വഹിച്ചുകഴിഞ്ഞാലുള്ള പ്രതിഫലം മറ്റൊന്ന് നിറവേറ്റാനുള്ള ശക്തിയാണ്.

പ്രളയക്കെടുതിയില്‍ ഒരു ‘കാള്‍’ സഹായവുമായി ടെലികോം കമ്പനികള്‍

കൊച്ചി: സംസ്ഥാനം കണ്ടതില്‍ വെച്ചേറ്റവും വലിയ പ്രളയ ദുരന്തത്തില്‍ വിറങ്ങലിക്കുമ്പോള്‍ സഹായഹസ്തവുമായി ടെലികോം കമ്പനികളും. സൗജന്യ കോളുകളും ഡാറ്റയും നല്‍കിയാണ് വൊഡാഫോണ്‍, എയര്‍ടെല്‍, ഐഡിയ, ബി.എസ്.എന്‍.എല്‍ തുടങ്ങി കമ്പനികള്‍ ദുരിത ബാധിതര്‍ക്ക് കൈത്താങ്ങാകുന്നത്.

വെള്ളപ്പൊക്കത്തെ തുടര്‍ന്ന് തകരാറിലായ നെറ്റ്‌വര്‍ക്കുകള്‍ അതിവേഗം പുനസ്ഥാപിച്ച് ഐഡിയയാണ് ദുരിതാശ്വാസ പ്രവര്‍ത്തനങ്ങള്‍ക്ക് ആദ്യം തണലായത്. ഇതിനൊപ്പം പത്തു രൂപയുടെ എമര്‍ജന്‍സി ടോക് ടൈമും ഐഡിയ പ്രഖ്യാപിച്ചു. *150*150# ഡയല്‍ ചെയ്താല്‍ പത്തു രൂപ ഐഡിയ ഉപഭോക്താക്കളുടെ അക്കൌണ്ടിലെത്തും. ഇതോടൊപ്പം ഏഴു ദിവസത്തെ കാലാവധിയില്‍ ഒരു ജിബി ഡാറ്റയും ഉപഭോക്താക്കള്‍ക്ക് ലഭിക്കും. ബില്‍ ഡേറ്റ് കഴിഞ്ഞ പോസ്റ്റ്‌പെയ്ഡ് ഉപഭോക്താക്കളുടെ സേവനം തല്‍ക്കാലം നിര്‍ത്തിവെക്കില്ലെന്നും ഐഡിയ അറിയിച്ചു. പ്രളയബാധിത മേഖലകളിലെ ഐഡിയ സ്റ്റോറുകള്‍ വഴി ദുരിത ബാധിതര്‍ക്ക് അവരുടെ മൊബൈല്‍ ഫോണുകള്‍ ചാര്‍ജ് ചെയ്യാനും കഴിയും.

പരിധികളില്ലാത്ത സൗജന്യ നെറ്റ് വോയിസ് കോളും മറ്റു ഓപ്പറേറ്റര്‍മാരുടെ നെറ്റ്‌വര്‍ക്കിലേക്ക് ദിവസം 20 മിനിറ്റ് സൗജന്യ കോളുമാണ് ബി.എസ്.എന്‍.എല്‍ ലഭ്യമാക്കിയിരിക്കുന്നത്. ഏഴു ദിവസത്തേക്ക് പരിധികളില്ലാത്ത ഡാറ്റയും എസ്.എം.എസും ബി.എസ്.എന്‍.എല്‍ ലഭ്യമാക്കിയിട്ടുണ്ട്.

വൊഡാഫോണും 30 രൂപയുടെ ടോക് ടൈം നല്‍കുന്നുണ്ട്. പ്രീപെയ്ഡ് ഉപഭോക്താക്കള്‍ക്കാണ് ഈ സേവനം ലഭിക്കുക. ഇതിനായി CREDIT എന്ന് 144 ലേക്ക് എസ്.എം.എസ് അയക്കുകയോ *130*1# എന്ന നമ്പര്‍ ഡയല്‍ ചെയ്യുകയോ മതിയാകും. ഇതിനൊപ്പം ഒരു ജിബി മൊബൈല്‍ ഡാറ്റയും സൗജന്യമായി ലഭിക്കും.

ഏഴു ദിവസത്തെ കാലപരിധിയില്‍ ഒരു ജിബി സൌജന്യ ഡാറ്റയും സൗജന്യ കോളുമാണ് എയര്‍ടെല്‍ വാഗ്ദാനം ചെയ്തിരിക്കുന്നത്.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.