2019 September 18 Wednesday
ദാരിദ്ര്യത്തെക്കുറിച്ച് ലജ്ജിക്കാനില്ല. അതില്‍ ലജ്ജതോന്നുന്നതാണ് ലജ്ജാകരം.

സംസ്ഥാനത്ത് പനി പടരുന്നു; നാലു ദിവസത്തിനിടെ ചികിത്സതേടിയത് 31,429 പേര്‍, നാലു മരണം

  • കഴിഞ്ഞ മാസം പനി ബാധിച്ചത് ഒരു ലക്ഷത്തിലധികം പേര്‍ക്ക്
ശ്രുതി സുബ്രഹ്മണ്യന്‍

കോഴിക്കോട്: സംസ്ഥാനത്ത്് പകര്‍ച്ചപ്പനി പിടിമുറുക്കുന്നു. നാലു ദിവസങ്ങള്‍ക്കിടെ പനി ബാധിച്ച് ചികിത്സതേടിയത് 31,429 പേരാണ്. ഇവരില്‍ 109 പേര്‍ക്ക് ഡെങ്കിപ്പനി സ്ഥിരീകരിച്ചു. നാലു പേര്‍ മരിച്ചു. എലിപ്പനി ബാധിച്ച് മൂന്നു പേരും പനി ബാധിച്ച് ഒരാളുമാണ് മരിച്ചത്. മരിച്ചവരില്‍ മൂന്നു പേരും തിരുവനന്തപുരം സ്വദേശികളാണ്. നാലു ദിവസത്തിനുള്ളില്‍ 14 ടൈഫോയ്ഡും 22 എലിപ്പനിയുമാണ് സംസ്ഥാനത്ത്് റിപ്പോര്‍ട്ട്് ചെയ്തത്്.
മലേറിയ ബാധിച്ച് അഞ്ചുപേര്‍ ചികിത്സതേടി. ഏഴു പേര്‍ക്ക് ഹെപ്പറ്റൈറ്റിസ് എയും ഒന്‍പതു പേര്‍ക്ക് ഹെപ്പറ്റൈറ്റിസ് ബിയും സ്ഥിരീകരിച്ചുണ്ട്. അതേസമയം, കഴിഞ്ഞ മാസം മാത്രം പനി ബാധിച്ച് വിവിധ സര്‍ക്കാരാശുപത്രികളില്‍ ചികിത്സതേടിയത് 1,28,639 പേരാണ്. ഇവരില്‍ 4212 പേര്‍ കിടത്തി ചികിത്സതേടി. ഇതില്‍ 445 പേര്‍ക്ക്് ഡെങ്കിപ്പനിയാണെന്ന് സ്ഥിരീകരിച്ചു. ഡെങ്കിപ്പനി ബാധയാണെന്ന് സംശയിച്ച് 1222 പേരും ചികിത്സതേടി. വിവിധ പകര്‍ച്ച വ്യാധികള്‍ പിടിപെട്ട് കഴിഞ്ഞ മാസം നാലു പേര്‍ മരിച്ചു.
ഒരാള്‍ പനി ബാധിച്ചും ഒരാള്‍ എലിപ്പനി ബാധിച്ചും രണ്ടു പേര്‍ ഹെപ്പറ്റൈറ്റിസ് ബി ബാധിച്ചുമാണ് മരിച്ചത്. ഡെങ്കിപ്പനിക്കു പുറമെ ചിക്കുന്‍ഗുനിയയും സംസ്ഥാനത്ത് വ്യാപകമായി പടര്‍ന്നു പിടിച്ചിട്ടുണ്ട്. സംസ്ഥാനത്ത് 322 ടൈഫോയ്ഡ് ബാധയും റിപ്പോര്‍ട്ട് ചെയ്തു. 52 പേര്‍ക്ക് മലേറിയയും 126 പേര്‍ക്ക് എലിപ്പനിയും സ്ഥിരീകരിച്ചു. 99 പേര്‍ക്ക് ഹെപ്പറ്റൈറ്റിസ് എയും 91 പേര്‍ക്ക് ഹെപ്പറ്റൈറ്റിസ് ബി ബാധയും സംസ്ഥാനത്ത് റിപ്പോര്‍ട്ട് ചെയ്തു.
ഇടയിക്കിടെയുണ്ടായ വേനല്‍മഴയാണ് പകര്‍ച്ചവ്യാധികള്‍ പടരാന്‍ കാരണമായതെന്ന് അധികൃതര്‍ ചൂണ്ടിക്കാട്ടുന്നു. തിരുവനന്തപുരത്തും മലപ്പുറത്തുമാണ് ഏറ്റവും കൂടുതല്‍ പനി റിപ്പോര്‍ട്ട് ചെയ്തത്. മഴക്കാല പൂര്‍വ ശുചീകരണത്തിന്റെ ഭാഗമായി പനിയുള്‍പ്പെടെയുള്ള പകര്‍ച്ചവ്യാധികള്‍ തടയാനുള്ള എല്ലാ നടപടിയും ആരോഗ്യവകുപ്പ് സ്വീകരിക്കുമ്പോഴും പകര്‍ച്ചവ്യാധികള്‍ വ്യാപകമായി പിടിമുറുക്കുന്നത് ആരോഗ്യവകുപ്പ് അധികൃതരെ ആശങ്കയിലാക്കിയിട്ടുണ്ട്. സര്‍ക്കാര്‍ ആശുപത്രികളിലെ പനി ക്ലിനിക്ക് 24 മണിക്കൂറും പ്രവര്‍ത്തിക്കുമെന്നും താലൂക്ക് ആശുപത്രികളില്‍ ഒ.പിക്ക് ശേഷമുള്ള അത്യാഹിതവിഭാഗത്തിലും പനിബാധിതര്‍ക്ക് ചികിത്സ ലഭിക്കുമെന്നും അധികൃതര്‍ പറഞ്ഞു. ഡെങ്കിപ്പനി റിപ്പോര്‍ട്ട് ചെയ്ത പ്രദേശങ്ങളില്‍ ഫോഗിങ്ങും പ്രതിരോധമരുന്ന് വിതരണവും തുടങ്ങിയതായും ഹെല്‍ത്ത് സെന്ററുകള്‍ അടക്കം എല്ലായിടത്തും ഡെങ്കി, ചെള്ളുപനി പ്രതിരോധ മരുന്നുകള്‍ എത്തിച്ചതായും ആരോഗ്യവകുപ്പ് അധികൃതര്‍ ചൂണ്ടിക്കാട്ടി.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Latest News