2018 February 19 Monday
ശത്രുവിനോടു പൊരുതിയിട്ടാണൊരാളുടെ ജീവിതം നടന്നുപോകുന്നതെങ്കില്‍, ശത്രുവിന്റെ ജീവിതം നിലനിര്‍ത്തുന്നതിലും അയാള്‍ക്കൊരു താല്‍പര്യമുണ്ടാവും.
ഫ്രെഡറിക് നീഷെ

അഴിമതിക്കേസ്: പ്രതികളുടെ വിദേശ അക്കൗണ്ടുകള്‍ മരവിപ്പിച്ചു; വിട്ടയച്ചവരില്‍ രാജകുമാരന്മാര്‍ ഉള്‍പ്പെട്ടിട്ടില്ല

സലാം കൂടരഞ്ഞി

റിയാദ്: സഊദി അഴിമതി വിരുദ്ധ സമിതിയുടെ നേതൃത്വത്തില്‍ പിടികൂടിയ പ്രതികളുടെ വിദേശ ബാങ്ക് അക്കൗണ്ടുകളും മരവിപ്പിച്ചു. സഊദിയുടെ അഭ്യര്‍ഥന മാനിച്ച യു.എ.ഇ, ബഹ്‌റൈന്‍, ലബനോന്‍ എന്നീ രാജ്യങ്ങളാണ് പ്രതികളായവരുടെ അക്കൗണ്ടുകള്‍ മരവിപ്പിച്ചത്. ഇവരുടെ സഊദി അക്കൗണ്ടുകള്‍ നേരത്തെ തന്നെ സഊദി മോണിറ്ററിങ് ഏജന്‍സി മരവിപ്പിച്ചിരുന്നു. അഴിമതിക്കേസില്‍ കുറ്റം ചുമത്തപ്പെട്ട പിടിയിലായവരുടെ സ്വന്തം പേരിലുള്ള അക്കൗണ്ടുകള്‍ മാത്രമാണ് സഊദിയും വിദേശ രാജ്യങ്ങളും മരവിപ്പിച്ചിരിക്കുന്നത്. ഇവരുടെ പൂര്‍ണ ഉടമസ്ഥതയിലുള്ള കമ്പനികളുടെയോ ഓഹരി പങ്കാളിത്തമുള്ള കമ്പനികളുടെയും അകൗണ്ടുകള്‍ക്ക് ഇപ്പോഴും പ്രവര്‍ത്തന സജ്ജമാണ്.

എന്നാല്‍, ഇങ്ങനെയുള്ള അക്കൗണ്ടുകളില്‍ പിടിയിലായവര്‍ക്ക് യാതൊരു വിധ കൈകാര്യവും അനുവദിക്കുകയില്ല. നിലവില്‍ അക്കൗണ്ടുകള്‍ മരവിപ്പിച്ച വിദേശ രാജ്യങ്ങള്‍ക്ക് പുറമെ ജി.സി.സി അംഗ രാജ്യമായ കുവൈത്തും ഇതിനായുള്ള ശ്രമങ്ങള്‍ ആരംഭിച്ചതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. സഊദിയില്‍ അറസ്റ്റിലായവരുടെ വിവരങ്ങള്‍ കുവൈത്ത് സെന്‍ട്രല്‍ ബാങ്ക് ശേഖരിക്കാന്‍ തുടങ്ങിയിട്ടുണ്ട്. എന്നാല്‍, ഇത് വരെ നടപടികള്‍ കൈക്കൊണ്ടിട്ടില്ല.

കഴിഞ്ഞ ശനിയാഴ്ച്ച രാത്രി മുതലാണ് സഊദി രാജകുമാരന്മാരടക്കം നിരവധി പേരെ അഴിമതി വിരുദ്ധ സമിതിയുടെ നേതൃത്വത്തില്‍ പിടികൂടിയത്. 208 പേരെയാണ് ഇത് വരെ പിടികൂടിയതെന്ന് അറ്റോര്‍ണി ജനറല്‍ ശൈഖ് സഊദ് അല്‍ മുഅജബ് കഴിഞ്ഞ ദിവസം വെളിപ്പെടുത്തിയിരുന്നു. ഇതില്‍ മതിയായ തെളിവുകള്‍ ഇലാത്തതിനാല്‍ ഏഴു പേരെ വിട്ടയക്കുകയും ചെയ്തിട്ടുണ്ട്. എന്നാല്‍, അഴിമതി കേസില്‍ അറസ്റ്റ് ചെയ്ത ശേഷം തെളിവില്ലെന്ന് വ്യക്തമായതിനെ തുടര്‍ന്ന് വിട്ടയക്കപ്പെട്ടവരുടെ കൂട്ടത്തില്‍ രാജകുമാരന്മാരോ മന്ത്രിമാരോ ഇല്ലെന്ന് സഊദി മാധ്യമങ്ങള്‍ റിപ്പോര്‍ട്ട് ചെയ്തു.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.