2018 January 10 Wednesday
കാത്തിരിക്കുന്നിടത്തോളം കാലം ഒന്നും സംഭവിക്കില്ല
സാമുവല്‍ ബെക്കറ്റ്

സഊദിയില്‍ പുതിയ ലെവി തിങ്കളാഴ്ച മുതല്‍: വിദേശികള്‍ക്ക് പുതുവര്‍ഷം ആഘോഷമാവില്ല

അബ്ദുസ്സലാം കൂടരഞ്ഞി

റിയാദ്: സഊദിയിലെ സ്വകാര്യ മേഖലയിലെ വിദേശികള്‍ക്ക് ഏര്‍പ്പെടുത്തിയ പുതിയ ലെവി അടുത്ത വര്‍ഷം ജനുവരി തുടക്കത്തില്‍ തന്നെ നിലവില്‍ വരുമെന്നു തൊഴില്‍ സാമൂഹിക വികസന മന്ത്രാലയം വ്യക്തമാക്കി. നേരത്തേയുണ്ടായിരുന്നതിനേക്കാളും ഇരട്ടിയായി ഉയര്‍ത്തിയ പുതിയ ലെവിയാണ് തിങ്കളാഴ്ച മുതല്‍ നിലവില്‍ വരിക. ഇഖാമ പുതുക്കുന്നതിന്റെ ഭാഗമായുള്ള വര്‍ക്ക് പെര്‍മിറ്റ് പുതുക്കുമ്പോഴാണ് ലെവി അടക്കേണ്ടതെന്നും ഇഖാമ പുതുക്കിയവരടക്കം ആരും തന്നെ ലെവിയില്‍ നിന്നും ഒഴിവാകില്ലെന്നും മന്ത്രാലയം വാര്‍ത്താകുറിപ്പില്‍ വ്യക്തമാക്കി.

ഇതുവരെ പ്രതിമാസം വിദേശ തൊഴിലാളികള്‍ നല്‍കേണ്ടിയിരുന്ന 200 റിയാല്‍ 400 റിയാലായാണ് ഉയര്‍ത്തിയത്. ഇത് പ്രകാരം വര്‍ഷത്തില്‍ 2400 റിയാലിന് പകരം 4800 റിയാല്‍ ലെവി മാത്രമായി അടക്കേണ്ടി വരും. എന്നാല്‍ വിദേശികളേക്കാള്‍ കൂടുതല്‍ സ്വദേശികളുള്ള സ്ഥാപനങ്ങള്‍ക്ക് പ്രതിമാസ ലേവിയില്‍ നിന്നും 100 റിയാല്‍ വീതം ഇളവ് ലഭിക്കും.

2019 ല്‍ പ്രതിമാസ ലെവി 600 റിയാലും 2020 ല്‍ ഇത് 800 റിയാല്‍ ആയും വര്‍ധിക്കും. ഇതിനു പുറമെ ഇഖാമ ഫീസ് വേറെയുമുണ്ട്. ജനുവരിക്ക് മുന്‍പ് വര്‍ക്ക് പെര്‍മിറ്റ് എടുത്തവര്‍ക്ക് 2018 ല്‍ അവര്‍ എത്ര ദിവസ കാലാവധി വര്‍ക്ക് പെര്‍മിറ്റില്‍ ഉണ്ടോ അത്രയും ദിവസത്തേക്കുള്ള ലെവി അടക്കണമെന്നും പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. 2018 ഏപ്രിലിന് മുന്‍പായി സ്ഥാപനങ്ങള്‍ ലെവി അടക്കണമെന്നും അല്ലാത്ത സ്ഥാപനങ്ങള്‍ക്ക് തൊഴില്‍ സാമൂഹിക വികസന മന്ത്രാലയങ്ങളുടെ സേവനങ്ങളും നിര്‍ത്തി വെക്കുമെന്നും മുന്നറിയിപ്പുണ്ട്.

ഇതോടൊപ്പം വിദേശികളുടെ ആശ്രിതര്‍ക്കുള്ള ഫീസുകളിലും ജനുവരി തുടക്കം മുതല്‍ വാന്‍ വര്‍ധനവാണ് ഉണ്ടാവുക. കൂടാതെ വിവിധ ഇനങ്ങള്‍ക്കുള്ള സബ്‌സിഡികള്‍ എടുത്തു കളയുന്നതോടെ സഊദിയില്‍ വൈദ്യുതി, വെള്ളം എന്നിവക്കും വില വര്‍ധിക്കും. വാല്യൂ ആഡഡ് ടാക്‌സ് (വാറ്റ്) കൂടി തിങ്കളാഴ്ച മുതല്‍ പ്രാബല്യത്തില്‍ വരുന്നതോടെ സഊദിയിലെ മലയാളിയക്കടക്കമുള്ള പ്രവാസികള്‍ക്ക് പുതുവര്‍ഷം അത്ര സന്തോഷകരമായിരിക്കില്ല.


 

 

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.