2018 January 11 Thursday
അത്യാഗ്രഹിക്ക് ഒരിക്കലും പണമില്ല
ബെന്‍ജോണ്‍സണ്‍

ആദര്‍ശ വിപ്ലവം: പതിനായിരങ്ങള്‍ പങ്കെടുത്ത് സമസ്ത ആദര്‍ശ സമ്മേളനം

ഇസ്മാഈല്‍ അരിമ്പ്ര

സൈനുല്‍ ഉലമാ നഗര്‍ (കൂരിയാട്): മതനവീകരണ പ്രസ്ഥാനങ്ങളുടെ ആശയ വൈകല്യങ്ങള്‍ക്കെതിരെ അഹ്‌ലു സുന്നയുടെ പ്രതിരോധപര്‍വ്വം തീര്‍ത്ത് സമസ്ത ആദര്‍ശ സമ്മേളനം ഉജ്വലമായി. മുസ്‌ലിം നവോത്ഥാനത്തിന്റെ ചരിത്ര പാരമ്പര്യത്തെ കാത്തുസൂക്ഷിക്കാന്‍ സമസ്ത പ്രതിജ്ഞാബദ്ധമാണെന്ന് പ്രഖ്യാപിച്ച സമ്മേളനം, പുത്തന്‍ വാദികളോട് സമസ്ത സ്വീകരിച്ച പ്രഖ്യാപിത നിലപാടിന്റെ പ്രസക്തി വിളിച്ചോതി. മത നവീകരണവാദികളുമായി സംഘടനാ ആദര്‍ശ സഹകരണങ്ങള്‍ പാടില്ലെന്ന് സമ്മേളനം പ്രഖ്യാപിച്ചു.

രാജ്യത്ത് ഈയിടെ തല പൊക്കിയ ധ്രുവീകരണ പ്രവണതകളും ദലിത് പീഡനമുറകളും ഫാസിസ്റ്റ് ചിന്താഗതികളോടുള്ള അനാരോഗ്യകരമായ ചായ്‌വുകളും ഇതിനു ചൂട്ടുപിടിക്കുന്ന സര്‍ക്കാര്‍, പൊലിസ് നീക്കങ്ങള്‍ക്കുമെതിരേ ജാഗ്രത പുലര്‍ത്തണമെന്നും സമ്മേളനം പ്രമേയത്തിലൂടെ പ്രഖ്യാപിച്ചു.

സമ്മേളനം സമസ്ത കേരള ജംഇയ്യത്തുല്‍ ഉലമാ ഉപാധ്യക്ഷ്യന്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്തു. സമസ്ത കേരള ജംഇയ്യത്തുല്‍ ഉലമാ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ അധ്യക്ഷനായി.

സമസ്ത കേരള ജംഇയ്യത്തുല്‍ ഉലമാ ജനറല്‍ സെക്രട്ടറി കെ. ആലിക്കുട്ടി മുസ്‌ലിയാര്‍ മുഖ്യപ്രഭാഷണം നടത്തി. സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് ജനറല്‍ സെക്രട്ടറി എം. ടി അബ്ദുല്ല മുസ്‌ലിയാര്‍ പ്രസംഗിച്ചു. കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി പ്രാര്‍ഥനക്ക് നേതൃത്വം നല്‍കി. അബ്ദുല്‍ ഹമീദ് ഫൈസി അമ്പലക്കടവ്, അബ്ദുസ്സമദ് പൂക്കോട്ടൂര്‍, ഓണംപിള്ളി മുഹമ്മദ് ഫൈസി, സത്താര്‍ പന്തലൂര്‍, മുസ്തഫ അശ്‌റഫി കക്കുപടി എന്നിവര്‍ വിഷയാവതരണം നടത്തി. സ്വാഗത സംഘം ജനറല്‍ കണ്‍വീനര്‍ ഡോ.ബഹാഉദ്ദീന്‍ മുഹമ്മദ് നദ്‌വി സ്വാഗതവും കോഡിനേറ്റര്‍ കെ.മോയിന്‍കുട്ടി മാസ്റ്റര്‍ നന്ദിയും പറഞ്ഞു. സമസ്ത മുശാവറ അംഗങ്ങളും പോഷക സംഘടനാ നേതാക്കളും സംബന്ധിച്ചു.


 

 

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.