2020 June 03 Wednesday
കോവിഡിനെതിരെ പ്രതിരോധം ശക്തമാക്കി ബഹ്റൈന്‍; രാജ്യത്ത് പരീക്ഷണാടിസ്ഥാനത്തില്‍ ഇനി പ്ലാസ്മ ചികിത്സയും

സ്വപ്നങ്ങളുടെ അകാശം വിശാലമെങ്കില്‍ പ്രതീക്ഷകളുടെ പൊന്‍പുലരികള്‍ അസ്തമിക്കുന്നില്ല

റിയാസ് ഫൈസി പാപ്ലശ്ശേരി

ദര്‍സ് അറബിക് കോളേജുകള്‍ കേരളത്തിന്റെ മതഭൗതിക വിദ്യാഭ്യാസ പുരോഗതില്‍ അത്ഭുതകരമായ പങ്ക് വഹിച്ച ഇടങ്ങള്‍ തന്നെയാണ്. മത പഠനത്തിന്റെ മഹത്തായ പാരമ്പര്യങ്ങളെ ചേര്‍ത്ത് പിടിച്ച് തന്നെ വിദ്യാഭ്യാസ രംഗത്ത് വിപ്ലവകരമായ മാറ്റങ്ങളും മുന്നേറ്റങ്ങളുമാണ് മത കലാലയങ്ങളില്‍ നിന്നും ഉയര്‍ന്ന് കേള്‍ക്കുന്നത്. സര്‍ഗ്ഗാത്മകതയുടെ നേര് വിളയുന്ന ഇടങ്ങളായി സ്ഥാപനങ്ങള്‍ ഇന്ന് മാറിക്കൊണ്ടിരിക്കുന്നു. സെമിനാറുകളും ടേബിള്‍ ടോക്കുകളും ആനുകാലിക ചര്‍ച്ചാ വേദികളും സിമ്പോസിയം ഉള്‍പ്പടെ ശ്രദ്ധേയ ഇടപെടലുകളും മത കലാലയങ്ങളുടെ അകത്തളങ്ങളെ കൂടുതല്‍ സജീവമാക്കുന്നുണ്ട്. കാലിഗ്രഫികളും ഭാഷാ സമാജ വേദികളും മാഗസിനുകളും കൈയ്യെഴുത്ത് കൃതികളും പതിപ്പുകളും ദര്‍സ് അറബിക് കോളേജുകളിലെ നിത്യവസന്തമായി പരിലസിച്ച് കൊണ്ടിരിക്കുന്നു. ഭൗതിക ക്യാമ്പസുകളെ പോലും മികച്ച് വെക്കുന്ന ചൂടേറിയ സംവാദങ്ങളുടേയും ടിബേറ്റുകളുടേയും തുറന്ന ചര്‍ച്ചകളുടേയും വിലയിരുത്തലുകളുടേയും വിശകലനങ്ങളുടേയും തുറന്ന വേദികളാണ് ദര്‍സ് അറബിക് കോളേജിന്റെ അകത്തളങ്ങളെ ഇന്ന് കൂടുതല്‍ പ്രൗഢമാക്കുന്നത്. മത താരതമ്യ പഠനങ്ങളിലെ ആശയ സംവാദങ്ങള്‍ ക്ലാസ് മുറികളെ പോലും ജീവസുറ്റത്താക്കുന്നുണ്ട്. സംഘടനാ പ്രവര്‍ത്തന രംഗത്തെ പരിശീലനക്കളരി എന്നതിനപ്പുറം വിശാല ചിന്തകളുടേയും വിപ്ലവകരമായ പ്രവര്‍ത്തനങ്ങളുടേയും കര്‍മ്മമണ്ഡലമായി മത കലാലയങ്ങള്‍ മാറിത്തുടങ്ങിയിരിക്കുന്നു.

മത വിദ്യാഭ്യാസ മേഖല തകര്‍ന്ന് കൊണ്ടിരിക്കുന്നു എന്ന ആശങ്കകളെ അസ്ഥാനത്താക്കുന്നതാണ് മാറ്റത്തിന്റെ പുതിയ മറ്റൊലികള്‍ നമ്മെ ബോധ്യപ്പെടുത്തുന്നു. ഒരാഴ്ചക്കാലം നീണ്ട് നില്‍ക്കുന്ന വെങ്ങപ്പള്ളി ശംസുല്‍ ഉലമാ ഇസ്ലാമിക് അക്കാദമിയിലെ അലിഫ് ലിറ്ററേച്ചര്‍ ഫെസ്റ്റ് വെലില്‍ ഇന്നലെ പങ്കെടുത്തപ്പോള്‍ ദര്‍സ് അറബിക് കോളേജ് മേഖലകളിലെ അത്ഭുതകരമായ മാറ്റങ്ങളെ വരച്ച് കാണിക്കുന്നതായി അനുഭവപ്പെട്ടു. മതരാഷ്ട്രീയസാമൂഹികസാംസ്‌കാരികമാധ്യമ രംഗത്തെ പ്രഗത്ഭരെ പങ്കെടുപ്പിച്ച് കൊണ്ടുള്ള ചര്‍ച്ചകളും സംവാദങ്ങളും സെമിനാറുകളും തുറന്ന ചര്‍ച്ചകളുടേയും അറിവിന്റെ അകം പൊരുള്‍ തേടിയുള്ള അന്വേഷണങ്ങളുടേയും ഇടമായി അനുഭവപ്പെട്ടു. മത കലാലയങ്ങള്‍ മാറ്റത്തിന്റെ മറ്റൊലികള്‍ മുഴക്കുന്നു. സമുദായത്തിന്റെ, സമൂഹത്തിന്റെ വളര്‍ച്ചയുടെ, പുരോഗതിയുടെ, മുന്നേറ്റങ്ങളുടെ, നന്മയുടെ നിറമുള്ള ചരിത്രങ്ങള്‍ ഇനിയും നാമേറെ സൃഷ്ടിക്കും.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.