2019 April 19 Friday
കാലത്തില്‍നിന്ന് നിനക്കു നഷ്ടപ്പെട്ടതിന് ഇനി പകരമില്ല. അതില്‍നിന്ന് നേടിയെടുത്തതാകട്ടെ വിലമതിക്കപ്പെടുകയുമില്ല. -അത്വാഉല്ലാ സിക്കന്തറി

ഭരണം 732 ദിവസം, നുണകള്‍ 8158: ട്രംപിന്റെ നുണക്കഥാ പട്ടിക പുറത്തുവിട്ട് യു.എസ് പത്രം

വാഷിങ്ടണ്‍: അധികാരത്തിലേറിയിട്ട് രണ്ടു വര്‍ഷത്തോളമായി. കൃത്യമായി പറഞ്ഞാല്‍ 732 ദിവസം. ഇത്രയും ദിവസം കൊണ്ട് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് പറഞ്ഞ നുണകള്‍ 8158. അതായത് ഒരു ദിവസം ഏകദേശം 11 നുണകള്‍. വാഷിങ്ടണ്‍ പോസ്റ്റ് പത്രമാണ് വാര്‍ത്ത നല്‍കിയത്. രണ്ടു വര്‍ഷം കൊണ്ട് സത്യവിരുദ്ധവും തെറ്റിദ്ധാരണാജനകവുമായ 8158 പ്രസ്താവനകളാണ് ട്രംപ് നടത്തിയതെന്ന് രേഖകള്‍ സഹിതം പത്രം പറയുന്നു.

732 ദിവസത്തെ ഭരണകാലയളവില്‍ 11 ദിവസം മാത്രമാണേ്രത ഡൊണാള്‍ഡ് ട്രംപ് നുണ പ്രസ്താവനകള്‍ നടത്താതിരിന്നിട്ടൂള്ളൂവെന്ന് പത്രം പറയുന്നു. അധികാരത്തിലേറിയ ആദ്യ വര്‍ഷം ഒരു ദിവസം ആറു നുണകള്‍ എന്നായിരുന്നു കണക്ക്. എന്നാല്‍, രണ്ടാം വര്‍ഷം അത് ശരാശരി 16.5 നിലയിലേക്ക് ഉയര്‍ന്നു.

ഫാക്ട് ചെക്കേഴ്‌സ് ഡാറ്റാബേസ് മുന്‍നിര്‍ത്തിയാണ് ട്രംപിന്റെ തെറ്റിദ്ധാരണാജനകവും വ്യാജവുമായ പ്രസ്താവനകള്‍ വാഷിങ്ടണ്‍ പോസ്റ്റ് പ്രസിദ്ധീകരിച്ചത്. അധികാരത്തിലെത്തിയ ഇത്രയും ദിവസം കൊണ്ട് ഒരു ദിവസം 30 ലധികം നുണകള്‍ പറഞ്ഞ 74 ദിവസവുമുണ്ട് ട്രംപിനെന്ന് പത്രം റിപ്പോര്‍ട്ട് ചെയ്യുന്നു.

അധികാരത്തിന്റെ വിവിധ തലങ്ങളില്‍ ട്രംപ് നുണകള്‍ പറഞ്ഞു. അധികാരത്തിന്റെ ആദ്യ 100 ദിനങ്ങളില്‍ ഒരു ആധികാരികതയും ഇല്ലാത്ത 492 അവകാശവാദങ്ങളാണ് ട്രംപ് ഉന്നയിച്ചത്. വിദേശനയം സംബന്ധിച്ച് 900, വാണിജ്യ വ്യാപാര വിഷയത്തില്‍ 854, സാമ്പത്തിക മേഖലയില്‍ 790, തൊഴില്‍ വിഷയങ്ങളില്‍ 755, പിന്നെ 899 അല്ലറ ചില്ലറ നുണകള്‍. ഒരു രാഷ്ട്രതലവനും ഇത്രയധികം നുണകള്‍ പറഞ്ഞ ചരിത്രമില്ലെന്ന് പത്രം പറയുന്നു.


 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.