2019 April 23 Tuesday
പുറമെ നിന്ന് അടിച്ചേല്‍പിക്കാവുന്ന ഒന്നല്ല ജനാധിപത്യം എന്നത്. അത് ഉള്ളില്‍ നിന്നുതന്നെ വരേണ്ടതാണ് -മഹാത്മാഗാന്ധി

പ്രവാസികളെ വഞ്ചിച്ചാല്‍ കടുത്ത ശിക്ഷ

#വി.എസ് പ്രമോദ്

തിരുവനന്തപുരം: ജീവിത സാഹചര്യങ്ങള്‍ നല്‍കുന്ന വെല്ലുവിളികള്‍ നേരിടാന്‍ തൊഴില്‍തേടി വിദേശ രാജ്യങ്ങളില്‍ പോകുന്ന പ്രവാസികളെ വഞ്ചിക്കുന്നവര്‍ക്ക് കടുത്ത ശിക്ഷ ഉറപ്പാക്കി എമിഗ്രേഷന്‍ ആക്ട് 2019ന്റെ കരട് തയാറായി. മികച്ച തൊഴിലും മറ്റു സാഹചര്യങ്ങളും വാഗ്ദാനം ചെയ്ത് തൊഴിലിനായി വിദേശത്തെത്തിച്ച് പാവങ്ങളെ വഞ്ചിക്കുന്നവര്‍ക്ക് തടവും പിഴയും വ്യവസ്ഥ ചെയ്യുന്നതാണ് പുതിയ നിയമം.

നിയമാനുസൃതമുള്ള ലൈസന്‍സ് ഇല്ലാതെ പണത്തിനു വേണ്ടിയോ അല്ലാതെയോ വിദേശത്ത് തൊഴില്‍ വാഗ്ദാനം ചെയ്ത് പരസ്യം ചെയ്യല്‍ , തൊഴില്‍മേഖലയിലെ ചൂഷണം, തൊഴിലാളിയെ വാടകയ്‌ക്കെടുക്കല്‍, കരാര്‍ സേവനം തുടങ്ങിയവയെല്ലാം നിയമവിരുദ്ധമാക്കുന്നതാണ് കരടു ബില്ലിലെ പ്രധാന വ്യവസ്ഥ. ഇതനുസരിച്ച് മൂന്നു മുതല്‍ ഏഴു വര്‍ഷം വരെ തടവോ ഒരു ലക്ഷം രൂപയില്‍ കുറയാത്തതും അഞ്ചു ലക്ഷത്തില്‍ കൂടാത്തതുമായ പിഴയോ ശിക്ഷയായി ലഭിക്കും. ജോലിക്കോ പഠനത്തിനോ വിദേശത്തു പോകുന്നവര്‍ സര്‍ക്കാരില്‍ രജിസ്റ്റര്‍ ചെയ്തിരിക്കണമെന്നതും ബില്ലില്‍ പ്രധാന വ്യവസ്ഥയുണ്ട്.

കുടിയേറ്റക്കാരുടെയും പ്രവാസികളുടെയും അവകാശങ്ങള്‍ സംരക്ഷിക്കപ്പെടുമെന്നു കരുതുന്ന ബില്‍ പാര്‍ലമെന്റിന്റെ ബജറ്റ് സമ്മേളനത്തില്‍ പരിഗണിക്കപ്പെട്ടേക്കും. പൊതുജനങ്ങള്‍ക്കും സംഘടനകള്‍ക്കും അഭിപ്രായം അറിയിക്കുന്നതിനുവേണ്ടി ബില്ലിന്റെ കരട് കേന്ദ്ര വിദേശകാര്യ മന്ത്രാലയം പുറത്തുവിട്ടിട്ടുണ്ട്.
സ്വന്തം പൗരന്റെ കുടിയേറ്റത്തിനും പ്രവാസത്തിനും സുരക്ഷിതത്വം ഉറപ്പുവരുത്തുന്നതിനായി എമിഗ്രേഷന്‍ മാനേജ്‌മെന്റ് അതോറിറ്റി എന്ന പേരില്‍ പുതിയ സംവിധാനം ഉള്‍പ്പെടെ രൂപീകരിക്കാനാണ് എമിഗ്രേഷന്‍ ആക്ട് 2019 എന്ന പേരില്‍ കുടിയേറ്റ നിയമത്തിന്റെ കരടിനു രൂപം നല്‍കിയിരിക്കുന്നത്.
കുടിയേറ്റത്തിന്റെ കാര്യത്തില്‍ ഇന്നു നിലനില്‍ക്കുന്ന സാഹചര്യം പൂര്‍ണമായി ഉള്‍ക്കൊണ്ടുകൊണ്ടാണ് 1983ല്‍ നിലവില്‍ വന്ന എമിഗ്രേഷന്‍ ആക്ടില്‍ കേന്ദ്ര സര്‍ക്കാര്‍ സമഗ്രമായ മാറ്റം കൊണ്ടുവരുന്നത്.

എമിഗ്രേഷന്‍ മാനേജ്‌മെന്റ് അതോറിറ്റി വിദേശത്ത് കുടിയേറിപ്പാര്‍ക്കുന്നവരുടെ ക്ഷേമവും സുരക്ഷിതത്വവും ഉറപ്പുനല്‍കുമെന്നും ഇത്തരത്തിലുള്ള ദൈനംദിന കാര്യങ്ങള്‍ നോക്കാനായി പ്രത്യേക ബ്യൂറോകള്‍ ഒരുക്കുമെന്നും കരടു നിയമത്തില്‍ പറയുന്നു.

മടങ്ങിവരുന്ന കുടിയേറ്റ തൊഴിലാളിയുടെ പ്രശ്‌നങ്ങളില്‍ ഉള്‍പ്പെടെ കേന്ദ്ര സര്‍ക്കാര്‍ സംവിധാനങ്ങളുമായി ചേര്‍ന്നുള്ള പ്രവര്‍ത്തനത്തിനായി സംസ്ഥാനങ്ങളിലും കേന്ദ്ര ഭരണ പ്രദേശങ്ങളിലും നോഡല്‍ അതോറിറ്റികള്‍ രൂപീകരിക്കണമെന്നും കരടു നിയമം അനുശാസിക്കുന്നു.

വിദേശത്തേക്ക് ആളുകളെ റിക്രൂട്ട് ചെയ്യുന്നതിനുള്ള ഏജന്‍സി എങ്ങനെ രജിസ്റ്റര്‍ ചെയ്യണമെന്നും അവയുടെ പ്രവര്‍ത്തനത്തിന്റെ അടിസ്ഥാനത്തില്‍ എങ്ങനെ വിലയിരുത്തപ്പെടണമെന്നും വിശദമാക്കുന്നുമുണ്ട്.

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.