2019 April 18 Thursday
ഒരാളുടെ ഉപദ്രവത്തില്‍ നിന്നും അവന്റെ അയല്‍വാസി നിര്‍ഭയനായില്ലെങ്കില്‍ അവന്‍ സ്വര്‍ഗത്തില്‍ പ്രവേശിക്കുകയില്ല -മുഹമ്മദ് നബി (സ)

പൊതുമേഖല തലപ്പത്ത് അഴിച്ചുപണി

ബാസിത് ഹസന്‍

തൊടുപുഴ: വ്യവസായ വകുപ്പിന് കീഴിലെ പൊതുമേഖലാ സ്ഥാപനങ്ങളില്‍ അഴിച്ചുപണി തുടങ്ങി. 

പൊതുമേഖലാ സ്ഥാപനങ്ങളുടെ മോണിറ്ററിങ് ചുമതലയുള്ള പബ്ലിക്ക് സെക്ടര്‍ റീസ്ട്രക്ച്ചറിങ് ഇന്റേണല്‍ ഓഡിറ്റ് ബോര്‍ഡ് (റിയാബ്) ചെയര്‍മാന്‍ ഡോ. എം.പി സുകുമാരന്‍ നായരെ നീക്കി. എന്‍.ശശിധരന്‍ നായരെ നിയമിച്ചു.
സി.പി.എം. നേതാവ് എളമരം കരീം വ്യവസായ മന്ത്രി സ്ഥാനം വഹിച്ചപ്പോള്‍ പ്രൈവറ്റ് സെക്രട്ടറിയായിരുന്നു ശശിധരന്‍ നായര്‍. റിയാബ് സെക്രട്ടറി സുരേഷിനെ മാറ്റി കെ.ജി.വിജയകുമാരന്‍ നായരേയും, മലബാര്‍ സിമന്റ്‌സ് എം.ഡി യായി എം. മുരളീധരന്‍, കാഷ്യു ഡവലപ്‌മെന്റ് കോര്‍പ്പറേഷന്‍ എം.ഡി യായി രാജേഷ് രാമകൃഷ്ണന്‍ എന്നിവരേയും നിയമിച്ച് വ്യവസായ വകുപ്പ് സെക്രട്ടറി സഞ്ജയ് എം. കൗള്‍ തിങ്കളാഴ്ച ഉത്തരവിറക്കി.
തൃശൂര്‍, കൊല്ലം, കോട്ടയം പ്രിയദര്‍ശനി, കുറ്റിപ്പുറം മാല്‍കോടെക്‌സ് എന്നിവിടങ്ങളില്‍ മുഴുവന്‍സമയ എം.ഡിമാരെ നിയമിക്കാനായി പട്ടിക തയാറായിക്കഴിഞ്ഞു. ഇവിടങ്ങളിലെ എം.ഡി മാരെല്ലാം അധിക ചുമതലയില്‍ എം.ഡി സ്ഥാനത്ത് തുടരുന്നവരാണ്. വിജിലന്‍സ് ക്ലിയറന്‍സ്, വിദ്യാഭ്യാസ യോഗ്യത എന്നിവയില്ലാത്തതിനാല്‍ അധിക ചുമതല എം.ഡി നിയമനം റദ്ദ് ചെയ്യണമെന്നാവശ്യപ്പെട്ട് കേരള ഹൈകോടതിയില്‍ സമര്‍പ്പിച്ച റിട്ട് പെറ്റീഷനില്‍ സര്‍ക്കാരിനു നോട്ടീസ് അയച്ചിരുന്നു.
വ്യവസായ വകുപ്പിന് കീഴിലുള്ള 40 പൊതുമേഖലാ സ്ഥാപനങ്ങളില്‍ ചീഫ് എക്‌സിക്യൂട്ടീവ് -എം.ഡി തസ്തികയില്‍ ഇരിക്കുന്നവരുടെ യോഗ്യത, വിജിലന്‍സ് ക്ലിയറന്‍സ് ഉള്‍പ്പെടെയുള്ള വിശദാംശങ്ങള്‍ വ്യവസായ വകുപ്പ് മന്ത്രിയുടെ ഓഫിസ് വിശദമായി പരിശോധിച്ച് വരികയാണ്.
ഇതില്‍ സര്‍വിസില്‍ നിന്നും വിരമിച്ചവര്‍, വകുപ്പ്തല അന്വേഷണം, വിജിലന്‍സ് അന്വേഷണം എന്നിവ നേരിടുന്നവരുമുണ്ട്. രണ്ടുതവണ വ്യവസായ വകുപ്പ് സെക്രട്ടറി ഉത്തരവിലൂടെ നീക്കം ചെയ്തയാള്‍ കെല്‍ടെക്‌സ് എം.ഡി സ്ഥാനത്ത് തുടരുന്നത് അടിയന്തരമായി തടയുവാനും തുടര്‍ അന്വേഷണത്തിനും വ്യവസായ മന്ത്രി ഉത്തരവിട്ടു.
അസംസ്‌കൃത വസ്തുക്കള്‍ വാങ്ങുന്നതിലും ഉല്‍പ്പന്നങ്ങളുടെ വില്‍പ്പനയിലും ഉന്നതങ്ങളില്‍ നടക്കുന്ന വ്യാപക അഴിമതിയാണ് പൊതുമേലാ സ്ഥാപനങ്ങള്‍ വലിയ നഷ്ടത്തിലാവാന്‍ കാരണം. വ്യവസായ വകുപ്പിന് കീഴിലുള്ള 40 ല്‍ 26 പൊതുമേഖലാ സ്ഥാപനങ്ങളും നഷ്ടത്തിലാണ്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.