2019 September 20 Friday
ദാരിദ്ര്യത്തെക്കുറിച്ച് ലജ്ജിക്കാനില്ല. അതില്‍ ലജ്ജതോന്നുന്നതാണ് ലജ്ജാകരം.

തീര്‍ത്ഥാടകര്‍ക്കായുള്ള സേവനങ്ങള്‍ മെച്ചപ്പെടുത്താന്‍ മക്കയില്‍ 12 പദ്ധതികള്‍ നടപ്പാക്കുന്നു

മക്ക: മക്കയിലെത്തുന്ന തീര്‍ത്ഥാടകര്‍ക്ക് കൂടുതല്‍ സേവനങ്ങള്‍ക്കായി വിവിധ പദ്ധതികള്‍ നടപ്പാക്കുന്നു. മക്ക മുനിസിപ്പാലിറ്റിയുടെ കീഴിലാണ് ദശലക്ഷങ്ങളുടെ പുതിയ പന്ത്രണ്ടു പദ്ധതികള്‍ നടപ്പാക്കുന്നത്. മക്കയിലെയും പുണ്യസ്ഥലങ്ങളിലെയും പാലങ്ങളുടെ മോടിപിടിപ്പിക്കല്‍, പാലങ്ങളുടെ പുനരുദ്ധാരണം, തുരങ്കങ്ങളില്‍ ഗതാഗത സുരക്ഷ വര്‍ധിപ്പിക്കല്‍ എന്നിവ അടക്കമുള്ള പദ്ധതികള്‍ അടുത്ത ഹജ്ജിനു മുന്‍പേ തന്നെ പൂര്‍ത്തിയാക്കാനാണ് ശ്രമിക്കുന്നത്.

പുണ്യസ്ഥലങ്ങളില്‍ 13.7 കോടി റിയാലിന്റെയും മക്കയില്‍ നാലു കോടി റിയാലിന്റെയും പദ്ധതികളാണ് അടുത്ത ഹജ്ജിനു മുമ്പായി പൂര്‍ത്തിയാക്കുന്നതെന്ന് മക്ക നഗരസഭയിലെ പബ്ലിക് റിലേഷന്‍സ് മേധാവി എന്‍ജിനീയര്‍ റായിദ് സമര്‍ഖന്ദി പറഞ്ഞു. ഹജ്ജ് കാലത്ത് മക്കയിലും പുണ്യസ്ഥലങ്ങളിലും ശുചീകരണ ജോലികള്‍ നടത്തുന്നതില്‍ വീഴ്ചകള്‍ വരുത്തുന്ന കരാറുകാരെ കുറിച്ച് ഫോട്ടോകള്‍ സഹിതം എളുപ്പത്തില്‍ പരാതികള്‍ നല്‍കുന്നതിന് പൊതുജനങ്ങളെ സഹായിക്കുന്ന സ്മാര്‍ട്ട് ഫോണ്‍ ആപ്ലിക്കേഷന്‍ മക്ക നഗരസഭ പുറത്തിറക്കിയിട്ടുണ്ടെന്നും എന്‍ജിനീയര്‍ റായിദ് സമര്‍ഖന്ദി പറഞ്ഞു.

പാലങ്ങളുടെ പുനരുദ്ധാരണത്തിനും മോടിപിടിപ്പിക്കലിനുമായി 73 ദശലക്ഷം റിയാല്‍, തുരങ്കങ്ങളിലും പാലങ്ങളിലും ഗതാഗത സുരക്ഷ വര്‍ധിപ്പിക്കുന്നതിനുള്ള പദ്ധതി 29 ദശലക്ഷം റിയാല്‍, തുരങ്കങ്ങളില്‍ ജനറേറ്ററുകള്‍ സ്ഥാപിക്കുന്നതിനുള്ള പദ്ധതി 46 ദശലക്ഷം, തെരുവുവിളക്ക് നവീകരണ പദ്ധതി 29 ലക്ഷം, ഡ്രൈനേജ് പദ്ധതികളുടെ അറ്റകുറ്റപ്പണിക്ക് മിനായില്‍ 26 ലക്ഷം, അറഫയില്‍ 22 ലക്ഷം, മുസ്ദലിഫയില്‍ 17 ലക്ഷം, തെരുവു വിളക്കുകളുടെ അറ്റകുറ്റപ്പണിക്ക് മിനായില്‍ 38 ലക്ഷം, അറഫയിലും മുസ്ദലിഫയിലും 40 ലക്ഷം റിയാലും ചെലവഴിക്കുമെന്നും മക്ക മുനിസിപ്പാലിറ്റി അറിയിച്ചു. ഇതിനു പുറമെ മക്കയിലെ മറ്റിടങ്ങളിലായി 11 ലക്ഷം റിയാലും നഗരസഭ ചെലവഴിക്കുന്നുണ്ട്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Latest News