2018 September 18 Tuesday
പതിനായിരം ബന്ധുക്കള്‍ക്ക് പകരം നില്‍ക്കാന്‍ ഒരേയൊരു ആത്മാര്‍ഥ സുഹൃത്ത് മതി.
യൂറിപ്പിഡിസ്

വന്‍കിട ജലവൈദ്യുത പദ്ധതികള്‍ക്ക് സാധ്യതയില്ല; സൗരോര്‍ജമാണ് ഏക പരിഹാരം

ഒടുവില്‍ എം.എം മണിയും സമ്മതിച്ചു

തിരുവനന്തപുരം: സംസ്ഥാനത്ത് വന്‍കിട ജലവൈദ്യുത പദ്ധതികള്‍ക്ക് ഇനി സാധ്യതയില്ലെന്ന് വൈദ്യുതി മന്ത്രി എം.എം. മണി. അതിരപ്പിള്ളി ഉള്‍പ്പടെ എല്ലാ പദ്ധതികള്‍ക്കെതിരേയും എതിര്‍പ്പുയരുന്നുണ്ട്.
ഈ പശ്ചാത്തലത്തില്‍ സൗരോര്‍ജമാണ് ഏക പരിഹാരമെന്നും മൂന്നുവര്‍ഷത്തിനുള്ളില്‍ സൗരോര്‍ജം വഴി ആയിരം മെഗാവാട്ട് വൈദ്യുതി ഉല്‍പാദിപ്പിക്കാന്‍ കഴിയണമെന്നും അദ്ദേഹം പറഞ്ഞു. വൈദ്യുതി ബോര്‍ഡും അനര്‍ട്ടും ചേര്‍ന്ന് സംഘടിപ്പിച്ച പുരപ്പുറ സൗരോര്‍ജ്ജ പദ്ധതികളെ കുറിച്ചുള്ള ദ്വിദിന ശില്‍പശാല തിരുവനന്തപുരത്ത് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
1000 മെഗാവാട്ട് സൗരോര്‍ജ്ജ വൈദ്യുതി മൂന്ന് വര്‍ഷത്തിനകം ഉല്‍പാദിപ്പിക്കാനാണ് സര്‍ക്കാര്‍ ലക്ഷ്യമിടുന്നതെന്നും ഭൂതലങ്ങളിലും ജലോപരിതലങ്ങളിലും സോളാര്‍ പ്ലാന്റുകള്‍ സ്ഥാപിക്കാനുള്ള എല്ലാ സാധ്യതകളും സര്‍ക്കാര്‍ ഉപയോഗപ്പെടുത്തുമെന്നും മന്ത്രി പറഞ്ഞു.
സ്ഥല പരിമിതി അനുഭവപ്പെടുന്ന നമ്മുടെ സംസ്ഥാനത്ത് ഇറിഗേഷന്‍ കനാലുകള്‍, ജലസംഭരണികള്‍, ജലാശയങ്ങള്‍ തുടങ്ങിയ ഇടങ്ങളില്‍ ചെലവ് കുറഞ്ഞ രീതിയിലെ ഫ്‌ളോട്ടിങ് സോളാര്‍ പ്ലാന്റുകള്‍ സ്ഥാപിക്കാന്‍ പദ്ധതിയുണ്ട്.
അതോടൊപ്പം തരിശായി കിടക്കുന്ന ഭൂതലങ്ങളില്‍ നിന്ന് സൗരോര്‍ജ വൈദ്യുതി ഉല്‍പാദിപ്പിക്കാനാകുമെന്നും മന്ത്രി കൂട്ടിച്ചേര്‍ത്തു.
ശില്‍പശാലയില്‍ ഗോപാല്‍ കിഷന്‍ ഗുപ്ത മുഖ്യ പ്രഭാഷണം നടത്തി. കെ.എസ്.ഇ.ബി സി.എം.ഡി എന്‍.എസ്. പിള്ള, അനര്‍ട്ട് ഡയരക്ടര്‍ ഡോ. ഹരികുമാര്‍ എന്നിവര്‍ സംസാരിച്ചു.

 

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.