2020 February 19 Wednesday
മധ്യേഷ്യൻ സമാധാന കരാർ ചൊവ്വാഴ്ച്ച പ്രഖ്യാപിക്കുമെന്ന് ട്രംപ്

ഗൗരി ലങ്കേഷ് വധം: പ്രതികളെ തിരിച്ചറിഞ്ഞെന്ന് കര്‍ണാടക സര്‍ക്കാര്‍

ബംഗളൂരു: പ്രമുഖ മാധ്യമ പ്രവര്‍ത്തക ഗൗരി ലങ്കേഷിന്റെ കൊലയാളികളെ തിരിച്ചറിഞ്ഞെന്ന് കര്‍ണാടക സര്‍ക്കാര്‍. എന്നാല്‍ അവര്‍ക്കെതിരായ കുറ്റം സ്ഥാപിക്കാനാവശ്യമായ തെളിവുകള്‍ ഇനിയും ലഭിക്കേണ്ടതുണ്ടെന്നും ആഭ്യന്തര മന്ത്രി രാമലിംഗ റെഡ്ഢി പറഞ്ഞു.

ഗൗരിയുടെ വീട്ടില്‍ സ്ഥാപിച്ചിരുന്ന രണ്ട് സി.സി.ടി.വി ക്യാമറകളിലെ ദൃശ്യങ്ങള്‍ വിദഗ്ധ പരിശോധനയ്ക്കായി അമേരിക്കയിലെ ഡിജിറ്റല്‍ ലാബിലേക്ക് അയച്ചിരുന്നു. പ്രതികളുടെ ചിത്രങ്ങള്‍ക്ക് കൂടുതല്‍ വ്യക്തത വരുത്താനാണ് അന്വേഷണ സംഘം ദൃശ്യങ്ങള്‍ യു.എസിലെ ലാബിലേക്ക് അയച്ചത്. ഗൗരി ലങ്കേഷ് വധക്കേസിന്റെ അന്വേഷണത്തില്‍ ഏറെ നിര്‍ണായകമാണ് സി.സി.ടി.വി ദൃശ്യങ്ങള്‍. ഇതിന്റെ വ്യക്തതക്കുറവ് അന്വേഷണ പുരോഗതിക്ക് തടസ്സമായിരുന്നു. ഇതേതുടര്‍ന്നാണ് ദൃശ്യങ്ങള്‍ യു.എസിലേക്ക് അയക്കാന്‍ തീരുമാനിച്ചത്.

ഐ.ജി ബി.കെ സിങിന്റെ മേല്‍നോട്ടത്തിലുള്ള 21 അംഗ പ്രത്യേക അന്വേഷണ സംഘമാണ് ( എസ്.ഐ.ടി) കേസ് അന്വേഷിക്കുന്നത്.

സെപ്തംബര്‍ അഞ്ച് ചൊവ്വാഴ്ചയാണ് ഗൗരി ലങ്കേഷ് വെടിയേറ്റ് കൊല്ലപ്പെട്ടത്. വീട്ടില്‍ വച്ച് രാത്രി എട്ടുമണിയോടെയായിരുന്നു സംഭവം. വീടിന് മുന്നിലെ പോര്‍ച്ചില്‍ ഗൗരിയുടെ മൃതദേഹം കണ്ടെത്തുകയായിരുന്നു.

ജോലി കഴിഞ്ഞ് വീട്ടില്‍ തിരികെയെത്തി അകത്ത് കയറാന്‍ ശ്രമിക്കുന്നതിനിടെ തൊട്ടടുത്ത് നിന്ന് അജ്ഞാതര്‍ വെടിയുതിര്‍ക്കുകയായിരുന്നു. മൂന്ന് വെടിയുണ്ടകള്‍ ഗൗരിയുടെ ദേഹത്ത് തുളഞ്ഞു കയറി ഒരെണ്ണം നെറ്റിയില്‍ തറച്ചു. ഫാസിസത്തിനെതിരെ ശക്തമായ നിലപാടെടുത്തിരുന്ന മാധ്യമപ്രവര്‍ത്തകയായിരുന്നു ഗൗരി.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Latest News