2019 March 22 Friday
തന്റെ അനുഗ്രഹങ്ങള്‍ കൊണ്ട് ഞങ്ങളെ ധാരാളം വെള്ളം കുടിപ്പിക്കുകയും ഞങ്ങളുടെ ദോശങ്ങള്‍ കാരണം അതിനെ ഉപ്പു രുചിയുള്ളതാക്കുകയും ചെയ്യാത്ത അല്ലാഹുവിനാണ് സര്‍വസ്‌തോത്രങ്ങളും -മുഹമ്മദ് നബി(സ)

ഭീകരാക്രമണത്തിനിടെ വെടിയേറ്റ യുവതി പ്രസവിച്ചു

ജമ്മു: സുന്‍ജുവാന്‍ സൈനികക്യാമ്പില്‍ ഭീകരാക്രമണത്തിനിടെ വെടിയേറ്റ ഗര്‍ഭിണിക്ക് പെണ്‍കുഞ്ഞ് പിറന്നു. റൈഫിള്‍മാന്‍ നസീര്‍ അഹ്മദിന്റെ ഭാര്യ ഷഹസാദ് ഘാന്‍ എന്ന 24കാരിയാണ കുഞ്ഞിന് ജന്മം നല്‍കിയത്.

എല്ലാവര്‍ക്കും നന്ദി..വെടിയൊച്ചകളുടെ ഭീകരതയും വെടിയുണ്ട തറച്ചു കയറിയ നോവും നിറഞ്ഞ ആശങ്കയുടെ മണിക്കൂറുകള്‍ താണ്ടി ഷഹസാദ് പറയുന്നു.

നടുവിനായിട്ടായിരുന്നു 28ആഴ്ച ഗര്‍ഭിണിയായിരുന്ന ഷഹസാദിന് വെടിയേറ്റത്. ഉടന്‍ തന്നെ ഇവരെ സറ്റ്വാരി സൈനികാശുപത്രിയിലെത്തിച്ചു.  പിന്നീട് ഡോക്ടര്‍മാര്‍ ഷഹസാദിനെ അടിയന്തര ശസ്ത്രക്രിയക്ക് വിധേയമാക്കുകയായിരുന്നു. കുഞ്ഞിന്റെയും ഉമ്മയുടെയും നില ഭദ്രമാണെന്ന് ആശുപത്രി അധികൃതര്‍ അറിയിച്ചു.

ആക്രമണത്തില്‍ ആറുസ്ത്രീകളും കുട്ടികളും ഉള്‍പ്പെടെ പത്തുപേര്‍ക്കാണ് പരുക്കേറ്റത്. ഇതില്‍, തലയ്ക്ക് വെടിയേറ്റ പതിനാലുകാരന്റെ പരുക്ക് ഗുരുതരമാണ്.

സുന്‍ജുവാനിലെ 36 ബ്രിഗേഡ്ക്യാമ്പില്‍നിന്ന് സൈനികരുടെ കുടുംബങ്ങളെ മാറ്റിപ്പാര്‍പ്പിക്കുമെന്ന് കരസേനാ വക്താവ് ലഫ്. കേണല്‍ ദേവേന്ദര്‍ ആനന്ദ് പറഞ്ഞു. സുരക്ഷ കണക്കിലെടുത്താണ് ഈ നടപടി. ക്യാമ്പിന് പുറമേ ധാരാളം കുടുംബങ്ങള്‍ വേറെയും താമസമുണ്ട്. ഇവരെയും മാറ്റാന്‍ നടപടി തുടങ്ങി.

ഞായറാഴ്ച ക്യാമ്പിലെത്തിയ എന്‍.ഐ.എ. ഉദ്യോഗസ്ഥര്‍ കരസേന കണ്ടെത്തിയ തെളിവുകള്‍ പരിശോധിച്ചു. ഭീകരാക്രമണക്കേസുകള്‍ അന്വേഷിക്കുന്ന ഏജന്‍സിയായ എന്‍.ഐ.എ.യ്ക്ക് അന്വേഷണം ഇതുവരെ കൈമാറിയിട്ടില്ല. പഠാന്‍കോട്ട്, നഗ്‌റോട്ട എന്നിവിടങ്ങളിലെ സൈനികക്യാമ്പിന് നേരേയുണ്ടായ ആക്രമണം അന്വേഷിക്കുന്നത് എന്‍.ഐ.എ.യാണ്.

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.