2019 October 18 Friday
ഏറ്റവും വലിയ പാപം ഞാന്‍ കഴിവുകെട്ടവനാണ് എന്ന വിചാരമാണ്.

മുല്ലപ്പെരിയാര്‍ നിറയാന്‍ ഇനി 12 അടി കൂടി, ഇടുക്കിയില്‍ 40.4 ശതമാനം

ബാസിത് ഹസന്‍

തൊടുപുഴ: സംസ്ഥാനത്തെ ജലശേഖരം 46 ശതമാനമായി ഉയര്‍ന്നു. അണക്കെട്ടുകളിലേക്കുള്ള നീരൊഴുക്ക് പ്രതീക്ഷിച്ചതിന്റെ രണ്ടരയിരട്ടിയാണ്. ഓഗസ്റ്റ് ഒന്നു മുതല്‍ 12 വരെ 585.677 ദശലക്ഷം യൂനിറ്റ് വൈദ്യുതി ഉത്പ്പാദിപ്പിക്കാനുള്ള വെള്ളം ഒഴുകിയെത്തുമെന്നാണ് കെ.എസ്.ഇ.ബി പ്രതീക്ഷിച്ചിരുന്നത്. എന്നാല്‍ 1226.586 ദശലക്ഷം യൂനിറ്റിനുള്ള വെള്ളം എത്തിക്കഴിഞ്ഞു.

1866.92 ദശലക്ഷം യൂനിറ്റ് വൈദ്യുതി ഉത്പാദിപ്പിക്കാനുള്ള വെള്ളമാണ് എല്ലാ സംഭരണികളിലുമായി ഉള്ളത്. ഒരു ദിവസം കൊണ്ട് ഉയര്‍ന്നത് 1.3 ശതമാനമാണ്. കഴിഞ്ഞ വര്‍ഷം ഇതേ സമയം 95.89 ശതമാനമായിരുന്നു ജലനിരപ്പ്.
സംസ്ഥാനത്തിന്റെ മൊത്തം സംഭരണശേഷിയുടെ പകുതിയും ഉള്‍ക്കൊള്ളാന്‍ കഴിയുന്ന ഇടുക്കി അണക്കെട്ടിലെ ജലനിരപ്പ് ഇന്നലെ വൈകിട്ട് ഏഴിന് 2343.76 അടിയായി ഉയര്‍ന്നു. സംഭരണശേഷിയുടെ 40.4 ശതമാനമാണിത്. കഴിഞ്ഞ വര്‍ഷം ഇതേ സമയം 2397.78 അടിയായിരുന്നു.

മുല്ലപ്പെരിയാര്‍ അണക്കെട്ട് നിറഞ്ഞ് ഇടുക്കിയിലേക്ക് ജലം ഒഴുകാന്‍ ഇനി 12 അടി കൂടി ഉയര്‍ന്നാല്‍ മതി. അണക്കെട്ടിലെ ജലനിരപ്പ് ഇന്നലെ രാവിലെ 130 അടിയായി ഉയര്‍ന്നു.142 അടിയാണ് പരമാവധി സംഭരണശേഷി. അണക്കെട്ടിലേക്കുള്ള നീരൊഴുക്ക് ശക്തമായി തുടരുകയാണ്. സെക്കന്‍ഡില്‍ 2404 ഘന അടി ജലമാണ് ഇപ്പോള്‍ അണക്കെട്ടിലേക്ക് ഒഴുകിയെത്തുന്നത്. തമിഴ്‌നാട്ടിലേക്ക് 1700 ഘന അടി ജലം തുറന്നു വിട്ടിട്ടുണ്ട്.

പമ്പ, കക്കി അണക്കെട്ടുകളില്‍ 42 ശതമാനമാണ് ജലശേഖരം. ഒരു ദിവസം കൊണ്ട് നാല് ശതമാനത്തിന്റെ വര്‍ധനവ്. ഇടമലയാര്‍ 47, ഷോളയാര്‍ 52, മാട്ടുപ്പെട്ടി 30, കുറ്റ്യാടി 96, തരിയോട് 89, ആനയിറങ്കല്‍ 30, പൊന്മുടി 91, നേര്യമംഗലം 96, പെരിങ്ങല്‍കുത്ത് 40, ലോവര്‍ പെരിയാര്‍ 90, കക്കാട് 27 ശതമാനം എന്നിങ്ങനെയാണ് ജലനിരപ്പ്. പെരിങ്ങല്‍കുത്തിലാണ് കൂടുതല്‍ മഴ ലഭിച്ചത് 5.67 സെ.മീ. കുറവ് മാട്ടുപ്പെട്ടിയിലും, 0.08 സെ.മീ.
ദിവസങ്ങള്‍ക്ക് ശേഷം സംസ്ഥാനത്തെ വൈദ്യുതി ഉപഭോഗത്തില്‍ വര്‍ധനവുണ്ടായി. 54.8167 ദശലക്ഷം യൂനിറ്റാണ് ഇന്നലെ രാവിലെ ഏഴിന് അവസാനിച്ച 24 മണിക്കൂറില്‍ സംസ്ഥാനത്ത് ഉപയോഗിച്ചത്. കഴിഞ്ഞ ദിവസങ്ങളേക്കാള്‍ 714 ദശലക്ഷം യൂനിറ്റ് കൂടുതലാണിത്. സംസ്ഥാനത്തെ എല്ലാ വൈദ്യുത പദ്ധതികളിലും ഉത്പാദനം പുനരാരംഭിച്ചിട്ടുണ്ട്. 8.26 ദശലക്ഷം യൂനിറ്റ് വൈദ്യുതി യൂനിറ്റിന് ശരാശരി 3.28 രൂപയ്ക്ക് വിറ്റു. സ്വാപ്പ് വഴി കടം വാങ്ങിയ 2.0184 ദശലക്ഷം യൂനിറ്റ് വൈദ്യുതി തിരികെ നല്‍കി.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.