2018 November 21 Wednesday
ജനങ്ങളേ, നിങ്ങള്‍ക്ക് നിങ്ങളുടെ നാഥനിങ്കലില്‍നിന്നുള്ള തത്വോപദേശങ്ങളും ശമനവും മാര്‍ഗദര്‍ശനവും സത്യവിശ്വാസികള്‍ക്ക് കാരുണ്യവും വന്നെത്തിയിരിക്കുന്നു

പാര്‍ലമെന്റ് സ്തംഭനം: പ്രതിപക്ഷത്തിനെതിരേ മോദിയുടെ ഉപവാസം നാളെ

ന്യൂഡല്‍ഹി: പാര്‍ലമെന്റ് സ്തംഭനത്തില്‍ പ്രതിപക്ഷത്തിനെതിരെ പ്രധാനമന്ത്രി നരേന്ദ്ര മോദി നാളെ ഉപവാസമിരിക്കും. ദേശീയ അധ്യക്ഷന്‍ അമിത്ഷാ അടക്കമുള്ള ബി.ജെ.പി എം.പിമാരും ഉപവാസമിരിക്കുന്നുണ്ട്. പ്രതിപക്ഷം സഭ സ്തംഭിപ്പിച്ചുവെന്നു കാട്ടിയാണ് ബി.ജെ.പിയുടെ ഉപവാസ സമരം.

മോദി ഉപവാസമിരിക്കുമെങ്കിലും ചെന്നൈയില്‍ നടക്കുന്ന പ്രതിരോധ എക്‌സിബിഷന്‍ ഉദ്ഘാടനം ചെയ്യാന്‍ എത്തും. ചടങ്ങിനെത്തുന്ന പ്രതിരോധ മന്ത്രി നിര്‍മല സീതാരാമനും ഉപവാസം അനുഷ്ടിക്കുന്നുണ്ട്.

കര്‍ണാടകയില്‍ തെരഞ്ഞെടുപ്പ് പ്രചാരണത്തിലുള്ള അമിത്ഷാ ഹുബ്ബള്ളിയില്‍ പ്രവര്‍ത്തകര്‍ക്കൊപ്പം ഉപവാസിക്കും. അവരവരുടെ മണ്ഡലത്തില്‍ ഉപവാസമിരുന്നാല്‍ മതിയെന്നാണ് എം.പിമാര്‍ക്കു കിട്ടിയ നിര്‍ദേശം.

ഈമാസം ആറിന് അവസാനിച്ച ബജറ്റ് സമ്മേളനത്തിന്റെ രണ്ടാം ഘട്ടത്തിലെ 22 പ്രവര്‍ത്തിദിവസങ്ങളില്‍ ഒന്നുപോലും സഭാനടപടികള്‍ പൂര്‍ണമായി നടത്താനാവാതെയാണ് പിരിഞ്ഞത്. മൊത്തം 29 പ്രവര്‍ത്തി ദിവസങ്ങളിലായി 34 മണിക്കൂറും അഞ്ചു മിനിറ്റുമാണ് ആകെ സഭ സമ്മേളിച്ചത്.


Read More… ഇരുസഭകള്‍ക്കും നഷ്ടമായത് 250 മണിക്കൂര്‍


രണ്ടുഘട്ടങ്ങളിലും മൊത്തം 30 പ്രവര്‍ത്തിദിനങ്ങളാണ് രാജ്യസഭയ്ക്ക് ഉണ്ടായത്. എന്നാല്‍, ആകെ പ്രവര്‍ത്തിച്ചതാവട്ടെ 44 മണിക്കൂര്‍ മാത്രം. സഭയ്ക്ക് നഷ്ടമായത് 121 മണിക്കൂറും. 30ല്‍ 27 ദിവസം ചോദ്യോത്തരവേള ഉണ്ടായതേയില്ല. ഇരുസഭകള്‍ക്കും കൂടി ഈ ബജറ്റ് സമ്മേളനത്തില്‍ മൊത്തം നഷ്ടമായത് 250 മണിക്കൂറാണ്.

ഇത് ബി.ജെ.പിക്കും കേന്ദ്ര സര്‍ക്കാരിനും വലിയ ക്ഷതമേല്‍പ്പിച്ചിരുന്നു. കര്‍ണാടകയില്‍ തെരഞ്ഞെടുപ്പ് അടുത്ത പശ്ചാതലത്തില്‍ കോണ്‍ഗ്രസിന് ഇത് പ്രചരണായുധം കൂടിയായി. ഇതാണ് അത്യപൂര്‍വ്വമായ ഉപവാസ സമരത്തിലിരിക്കാന്‍ ബി.ജെ.പിയെ പ്രേരിപ്പിച്ചത്.


 

 

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.