2018 December 13 Thursday
പരിഹസിക്കപ്പെടുന്നത് അവഗണിക്കപ്പെടുന്നതിനേക്കാള്‍ നല്ലതാണ് – ഹാരോള്‍ഡ് മാക്മില്ലന്‍

അവള്‍ അഞ്ചിലൊന്ന്; അവന്‍ പത്തിലൊന്ന്: കൗമാരക്കാരില്‍ മാനസിക രോഗങ്ങള്‍ക്ക് കാരണമായി സമൂഹ മാധ്യമങ്ങള്‍

കൊച്ചി: രാജ്യത്ത് വിദ്യാര്‍ഥികള്‍ക്കും യുവാക്കള്‍ക്കും ഇടയില്‍ മാനസിക രോഗങ്ങള്‍ വര്‍ധിച്ചുവരുന്നതായി പഠന റിപ്പോര്‍ട്ട്. ഇന്ത്യന്‍ സൈക്കാട്രി സൊസൈറ്റി കേരളയുടെ പഠനങ്ങള്‍ പ്രകാരം 20 ശതമാനത്തോളം യുവാക്കള്‍ക്ക് മാനസികമായ പ്രശ്‌നങ്ങളുണ്ട്.
സംസ്ഥാനത്തും ഇതുതന്നെയാണ് അവസ്ഥയെന്ന് പഠനങ്ങള്‍ ചൂണ്ടിക്കാട്ടുന്നു. 12നും 19നും ഇടയില്‍ പ്രായമുള്ള വിദ്യാര്‍ഥികളില്‍ അഞ്ചില്‍ ഒരാള്‍ക്ക് മാനസികാരോഗ്യ പ്രശ്‌നങ്ങള്‍ ഉണ്ട്. വൈകാരിക പീഡനം മൂലമാണ് എറ്റവും കൂടുതല്‍ മാനസികപ്രശ്‌നങ്ങള്‍ വിദ്യാര്‍ഥികളില്‍ കണ്ടുവരുന്നത് അതും 85 ശതമാനവും. ശാരീരിക പീഡനം മൂലം 75 ശതമാനം പേരും 21 ശതമാനം പേര്‍ ലൈംഗിക പീഡനം മൂലവും മാനസിക സമ്മര്‍ദം നേരിടുന്നു. മാനസികാരോഗ്യ പ്രശ്‌നങ്ങളുമായി ബന്ധപ്പെട്ട് ഇടപ്പള്ളി എറണാകുളം ആശുപത്രിയില്‍ നടന്ന സെമിനാറില്‍ അമൃത ആശുപത്രി സൈക്കാട്രി വിഭാഗം മേധാവി ഡോ. എന്‍. ദിനേശ് ആണ് ഇക്കാര്യം വ്യക്തമാക്കിയത്.
കുട്ടിക്കാലത്തുണ്ടാകുന്ന നിരന്തരമായ പ്രശ്‌നങ്ങള്‍, വിദ്യാഭ്യാസ പരാജയങ്ങള്‍, സ്‌കൂളിലും വീട്ടിലും ഉണ്ടാകുന്ന മാനസിക സംഘര്‍ഷങ്ങള്‍ ഇവയെല്ലാം മാനസിക പ്രശ്‌നങ്ങള്‍ക്ക് കാരണമാകുന്നു. മാനസിക സമ്മര്‍ദവുമായി പൊരുത്തപ്പെട്ടു പോകാന്‍ യുവാക്കള്‍ക്ക് മിക്കപ്പോഴും കഴിയാറില്ല. ഇതു ലഹരിയിലേക്കാണ് യുവതലമുറയെ നയിക്കുന്നത്. കേരളത്തില്‍ യുവാക്കളില്‍ 15 ശതമാനം പേര്‍ മദ്യം ഉപയോഗിക്കുന്നവരാണ്. ആണ്‍കുട്ടികളില്‍ 23 ശതമാനം പേരും പെണ്‍ കുട്ടികളില്‍ 6.5 ശതമാനം പേരും മദ്യം ഉപയോഗിക്കുന്നുവെന്നാണ് കണക്കുകള്‍. പുകയിലയുടെ ഉപയോഗം 6.9 ശതമാനമാണ്. 14 വയസു മുതലാണ് പുകയിലയുടെ ഉപയോഗം കണ്ടുവരുന്നത്.
യുവാക്കളില്‍ മയക്കുമരുന്ന് ഉപയോഗിക്കുന്നവരില്‍ 40 ശതമാനത്തോളം പേര്‍ 18 വയസില്‍ താഴെ ഉള്ളവരാണ്. വിദ്യാസമ്പന്നരായ ആളുകളാണ് പലപ്പോഴും മാനസിക സമ്മര്‍ദങ്ങള്‍ നിമിത്തം ലഹരിക്ക് അടിമകളാകുന്നതെന്ന് ഡോക്ടര്‍ ഡോ. എന്‍ ദിനേശ് പറഞ്ഞു. മയക്കു മരുന്നിന്റെ ഉപയോഗം മൂലം മോഷണം, സാമൂഹിക ചൂതാട്ടം, അടിപിടി കേസുകള്‍ എന്നിവയില്‍ യുവാക്കള്‍ പ്രതികളാകുന്നുണ്ട്. പലപ്പോഴും ഇത്തരം കേസുകളില്‍ പിടിക്കപ്പെടുമ്പോള്‍ മാത്രമാണ് മക്കള്‍ ലഹരിക്ക് അടിമയായിരുന്നുവെന്ന് മാതാപിതാക്കള്‍ അറിയുന്നതു പോലും.
വിശ്രമമില്ലാത്ത ജോലിയും സമ്മര്‍ദവും യുവാക്കളെ മാനസിക രോഗങ്ങള്‍ക്ക് അടിമയാക്കുന്നു. എല്ലാ തൊഴില്‍ മേഖലയിലും സമ്മര്‍ദം ഉണ്ടെങ്കിലും ജോലി സ്ഥലത്തെ മാനസിക സമ്മര്‍ദം അതിജീവിക്കാനാകാതെ ആത്മഹത്യ ചെയ്യുന്നവരില്‍ കൂടുതലും ഡോക്ടര്‍മാരാണെന്ന് അമൃത ആശുപത്രിയിലെ ഡോക്ടറായ ശബരീഷ് പറഞ്ഞു.
ജോലിയും കുടുംബവും ഒന്നിച്ചു കൊണ്ടുപോകാന്‍ പലര്‍ക്കും കഴിയുന്നില്ല. തൊഴിലിടങ്ങളില്‍ മാനസിക പിരിമുറക്കം കുറയ്ക്കുന്നതിനുള്ള കാര്യങ്ങള്‍ നിര്‍ബന്ധമായും സ്വീകരിക്കണം. അമിത ജോലി മൂലമുള്ള ഉറക്കക്കുറവും മാനസിക പ്രശനങ്ങളിലേക്ക് നയിക്കുന്നുണ്ട്. ജോലി സംബന്ധമായുണ്ടാകുന്ന സമ്മര്‍ദങ്ങള്‍ക്ക് സ്വയം പരിഹാരം കണ്ടു പിടിക്കണമെന്നും അദ്ദേഹം പറഞ്ഞു.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.