2019 August 23 Friday
നീ വിധിപറയുകയാണെങ്കില്‍ നീതിപൂര്‍വം വിധിപറയുക. നിശ്ചയം, അല്ലാഹു നീതിമാന്മാരെ സ്‌നേഹിക്കുന്നു. ഖുര്‍ആന്‍ (5:42)

മലപ്പുറത്തെ കുട്ടികള്‍ നല്ല കഴിവുള്ളവര്‍; അവര്‍ കോപ്പിയടിച്ചാണ് ജയിക്കുന്നതെന്ന പരാമര്‍ശം തെറ്റ്: കെ.കെ.എന്‍ കുറുപ്പ്

 

കോഴിക്കോട്: മലപ്പുറത്തെ കുട്ടികള്‍ നല്ല കഴിവുള്ളവരാണെന്നും അവര്‍ കോപ്പിയടിച്ചാണ് ജയിക്കുന്നതെന്ന പരാമര്‍ശം തെറ്റാണെന്നും ചരിത്രകാരനും കാലിക്കറ്റ് സര്‍വകലാശാല മുന്‍ വൈസ് ചാന്‍സലറുമായ ഡോ. കെ.കെ.എന്‍ കുറുപ്പ്. മലപ്പുറം ജില്ലയുടെ പുരോഗതിക്ക് കാരണം അവിടത്തെ ശക്തമായ നേതൃത്വമാണ്. കാലിക്കറ്റ് സര്‍വകലാശാലയെ വികസനത്തിലേക്ക് നയിക്കാന്‍ കഴിഞ്ഞതില്‍ ചാരിതാര്‍ഥ്യമുണ്ട്. താന്‍ വി.സി ആയിരുന്നപ്പോള്‍ ഒട്ടേറെ കോഴ്‌സുകള്‍ ആരംഭിക്കാനും വികസനം നടപ്പാക്കാനും കഴിഞ്ഞു. മലപ്പുറത്തെ കുട്ടികള്‍ കോപ്പിയടിച്ചാണ് ജയിക്കുന്നതെന്ന പരാമര്‍ശത്തെ ശക്തമായി എതിര്‍ത്തയാളാണ് താന്‍. സര്‍വകലാശാലയില്‍ പ്രവേശനം നേടിയ മലപ്പുറത്തെ കുട്ടികള്‍ നല്ല കഴിവുള്ളവരാണ്. കോപ്പിയടിച്ചല്ല മാര്‍ക്ക് നേടിയതെന്ന് അറിയാവുന്നതുകൊണ്ടാണ് അത്തരം പ്രസ്താവനയെ അന്ന് എതിര്‍ത്തതെന്നും അദ്ദേഹം കൂട്ടിച്ചേര്‍ത്തു. സുപ്രഭാതം ഓഫിസില്‍ നല്‍കിയ സ്വീകരണത്തില്‍ സംസാരിക്കുകയായിരുന്നു കെ.കെ.എന്‍ കുറുപ്പ്.

അധിനിവേശത്തിനെതിരായ പോരാട്ടങ്ങള്‍ക്ക് സൈനുദ്ദീന്‍ മഖ്ദൂമിന്റെ ഓര്‍മകള്‍ ശക്തിയാവണമെന്നും അദ്ദേഹം പറഞ്ഞു. മഖ്ദൂമിന്റെ സ്മരണയ്ക്കായി ശൈഖ് സൈനുദ്ദീന്‍ മഖ്ദൂം ഇന്റര്‍നാഷനല്‍ സെന്റര്‍ ഫോര്‍ ഇന്‍ഡോ അറബ് റിലേഷന്‍സ് ആന്‍ഡ് സ്ട്രാറ്റജീസ് എന്ന പേരിലുള്ള ഗവേഷണ കേന്ദ്രം തന്റെ സ്വപ്‌ന പദ്ധതിയാണെന്നും അദ്ദേഹം പറഞ്ഞു. ഈ ആശയം തന്റെ കാലത്ത് പൂവണിയണമെന്നില്ല. എനിക്ക് ശേഷം മറ്റാരെങ്കിലും ഇത് ഏറ്റെടുത്ത് നടപ്പാക്കുമെന്നാണ് വിശ്വാസം. മഖ്ദൂമിന്റെ ആശയങ്ങള്‍ക്ക് എന്നും പ്രാധാന്യമുണ്ട്.
ചരിത്രത്തെ മാനിക്കാത്ത ശക്തികള്‍ തങ്ങള്‍ക്ക് അനുകൂലമാക്കി ചരിത്ര രചന നടത്തുകയാണ്. രാജ്യത്ത് സെക്കുലര്‍ ചരിത്രകാരന്‍മാര്‍ ഇല്ലാതായെന്നും അദ്ദേഹം പറഞ്ഞു. ചരിത്രരേഖകള്‍ പരിശോധിക്കാതെയാണ് ടിപ്പു സുല്‍ത്താനെ ചിലര്‍ വിമര്‍ശിക്കുന്നത്. ദേശീയത ഇല്ലാത്ത കാലത്താണ് അദ്ദേഹം മൈസൂരുവും കൂര്‍ഗും കീഴടക്കിയത്. ക്ഷേത്രങ്ങള്‍ തകര്‍ത്തെന്ന് പറയുമ്പോഴും ടിപ്പു ഗുരുവായൂര്‍ ക്ഷേത്രത്തെ സഹായിച്ചതിന് രേഖകള്‍ ഉണ്ടെന്നും അദ്ദേഹം പറഞ്ഞു.

മാനേജിങ് എഡിറ്റര്‍ നവാസ് പൂനൂര്‍ അധ്യക്ഷനായി. സി.ഇ.ഒ മുസ്തഫ മുണ്ടുപാറ, എക്‌സിക്യൂട്ടീവ് എഡിറ്റര്‍ എ. സജീവന്‍, ഡെപ്യൂട്ടി സി.ഇ.ഒ ഐ.എം അബ്ദുറഹ്മാന്‍ സംബന്ധിച്ചു.

kkn kurup counter vs’s allegation on malappuram students


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.