2019 April 22 Monday
കാലത്തില്‍നിന്ന് നിനക്കു നഷ്ടപ്പെട്ടതിന് ഇനി പകരമില്ല. അതില്‍നിന്ന് നേടിയെടുത്തതാകട്ടെ വിലമതിക്കപ്പെടുകയുമില്ല. -അത്വാഉല്ലാ സിക്കന്തറി

വടകരയില്‍ യു.ഡി.എഫിന്റെ സര്‍ജിക്കല്‍ സ്‌ട്രൈക്ക്: ജയരാജനോട് ഏറ്റുമുട്ടാന്‍ കെ. മുരളീധരന്‍

ന്യൂഡല്‍ഹി: കോണ്‍ഗ്രസില്‍ സീറ്റു തര്‍ക്കം കീറാമുട്ടിയായ വടകരയില്‍ അവസാനം കെ. മുരളീധരന്‍ സ്ഥാനാര്‍ഥിയായും. കോണ്‍ഗ്രസിന്റെ സിറ്റിംഗ് സീറ്റായ വടകരയെ നിലനിര്‍ത്താന്‍ നിലവില്‍ വട്ടിയൂര്‍ക്കാവില്‍ എം.എല്‍.എയായ കെ. മുരളീധരനെ രംഗത്തിറക്കാനാണ് തീരുമാനം.

ഇതോടെ മറ്റൊരു സിറ്റിംഗ് എം.എല്‍.എകൂടി കോണ്‍ഗ്രസില്‍ നിന്ന് ലോക്‌സഭ തിരഞ്ഞെടുപ്പിലേക്ക് വരികയാണ്. വടകരയില്‍ കെ. മുരളീധരനോട് സ്ഥാനാര്‍ഥിയാകാന്‍ താന്‍ ആവശ്യപ്പെട്ടിരുന്നതായും അദ്ദേഹം ഇക്കാര്യത്തില്‍ സമ്മതമറിയിച്ചതായും കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ അറിയിച്ചു. നേതാക്കള്‍ കെ. മുരളീധരനോട് സംസാരിച്ചിട്ടുണ്ട്. മത്സരിക്കാന്‍ സന്നദ്ധനാണെന്ന് കെ. മുരളീധരന്‍ ഹൈക്കമാന്‍ഡിനെ അറിയിക്കുകയും ചെയ്തിട്ടുണ്ട്. 

ചര്‍ച്ചകള്‍ക്കൊടുവില്‍ കെ. മുരളീധരനും സ്ഥാനാര്‍ഥി നിര്‍ണയത്തോട് പ്രതികരിച്ചു. പാര്‍ട്ടി നേതാക്കള്‍ മത്സരിക്കുമോ എന്നാരാഞ്ഞു. പാര്‍ട്ടി ഏല്‍പ്പിക്കുന്ന ഏതു ദൗത്യവും ഏറ്റെടുക്കാമെന്ന് സമ്മതവും അറിയിച്ചതായി മുരളീധരന്‍ പറഞ്ഞു.
കോണ്‍ഗ്രസ് സ്ഥാനാര്‍ഥികളെ പ്രഖ്യാപിക്കുന്നത് എല്ലാ ഫോര്‍മുലകളും നോക്കിയാണ്. ഇതുവരേ പ്രഖ്യാപിച്ച സ്ഥാനാര്‍ഥികളുടെ കാര്യത്തിലും അങ്ങനെതന്നെയാണ്. എതിര്‍സ്ഥാനാര്‍ഥി ആരാണെന്നത് തന്നെ സംബന്ധിച്ച് വിഷയമല്ലെന്നും എന്നാല്‍ വടകരയില്‍ വിജയം ഉറപ്പാണെന്നും മുരളീധരന്‍ പറഞ്ഞു.

ഔദ്യോഗികമായി പ്രഖ്യാപനം ഉടന്‍ ഉണ്ടാകുമെന്നും അത് കോണ്‍ഗ്രസ് നേതൃത്വമായിരിക്കും പ്രഖ്യാപിക്കുക എന്നും മുല്ലപ്പള്ളി പറഞ്ഞു.
 വടകരയില്‍ യു.ഡി.എഫ് വിജയം ഉറപ്പിച്ചതായും തുടക്കത്തില്‍ തന്നെ ആ പ്രതീക്ഷ തനിക്കുണ്ടെന്നും മുല്ലപ്പള്ളി പറഞ്ഞു.

മുല്ലപ്പള്ളി പിന്‍മാറിയതോടെ കെ.പ്രവീണ്‍കുമാറിനെ സ്ഥാനാര്‍ഥിയാക്കാനുള്ള ചര്‍ച്ചകള്‍ പുരോഗമിക്കവേയാണ് കെ. മുരളീധരന്‍ നാടകീയമായി വടകരയില്‍ രംഗത്തുവരുന്നത്. ഇതോടെ കോണ്‍ഗ്രസിലെ സീറ്റ് തര്‍ക്കങ്ങള്‍ക്ക് പരിഹാരമായി. ഇനി ഔദ്യോഗിക പ്രഖ്യാപനം മാത്രമേ വരാനുള്ളൂ. അത് ഇന്നുതന്നെ ഉണ്ടാകും.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.