2018 November 21 Wednesday
ജനങ്ങളേ, നിങ്ങള്‍ക്ക് നിങ്ങളുടെ നാഥനിങ്കലില്‍നിന്നുള്ള തത്വോപദേശങ്ങളും ശമനവും മാര്‍ഗദര്‍ശനവും സത്യവിശ്വാസികള്‍ക്ക് കാരുണ്യവും വന്നെത്തിയിരിക്കുന്നു

സന്ധിവേദനയോടു വിട പറയാം

അശോക് പാറപൊയില്‍ ഓര്‍ത്തോപീഡിക് സര്‍ജന്‍, മലബാര്‍ ഹോസ്പിറ്റല്‍, കോഴിക്കോട്

നമ്മുടെ കുടുംബത്തില്‍ പലരെയും അലട്ടുന്ന ഒരു പ്രധാന പ്രശ്‌നമാണ് മുട്ടുവേദന. കൂടുതലും പ്രായമായവരിലും സ്ത്രീകളിലും കണ്ടുവരുന്ന ഒരു സര്‍വസാധാരണമായ അസുഖം. മുട്ടു മടക്കാനോ സ്റ്റെപ്പ് കയറുവാനോ സ്വന്തമായി നടക്കുവാന്‍പോലുമോ സാധിക്കാതെ ദിനചര്യങ്ങള്‍ക്കു പരസഹായം തേടുന്ന സാഹചര്യം വാര്‍ധക്യം ബാധിച്ച പലരിലും ഇപ്പോള്‍ കണ്ടുവരുന്നു.

മുട്ടുവേദനയ്ക്കുള്ള പ്രധാന കാരണം കാല്‍ മുട്ടിന്റെ തേയ്മാനമാണ്. പ്രായം കൊണ്ടുവരുന്ന തേയ്മാനം തന്നെയാണ് ഇതിനു പ്രധാന കാരണം. ഇതിന്റെ പ്രധാന ലക്ഷണം കാല്‍മുട്ടിലുണ്ടാകുന്ന വേദനയും വിങ്ങലുമാണ്. കൂടാതെ സന്ധികളിലെ നീര്, വേദന , സന്ധികള്‍ക്കുള്ളില്‍ കാണുന്ന ചൂട്, വഴക്കമില്ലായ്മ, പുറമെ കാണുന്ന നിറമാറ്റവും, വിരലുകള്‍ മടക്കാന്‍ കഴിയാത്തതും കൈ മുട്ടുകളില്‍ കാണുന്ന മുഴയും ഈ രോഗലക്ഷണങ്ങളുടെ തുടക്കത്തെ സൂചിപ്പിക്കുന്നു. ഇതു കൂടാതെ സന്ധികള്‍ക്ക് സംഭവിക്കുന്ന ഒടിവുകളും ചതവുകളും, അണുബാധ, ചില ജനന വൈകല്യങ്ങള്‍, വളര്‍ച്ചയിലുണ്ടാകുന്ന പ്രശ്‌നങ്ങള്‍ തുടങ്ങിയവയും ഇതിനു കാരണമാകാം. ഇതിനൊക്കെ പുറമെ അമിതമായ ശരീരഭാരം, വ്യായാമമില്ലായ്മ എന്നിവ വളരെ വേഗം നമ്മെ സന്ധി തേയ്മാനത്തിലേക്കു എത്തിക്കും. ആധുനിക ജീവിതത്തില്‍ നാം നേരിടുന്ന പിരിമുറുക്കങ്ങളും പുകവലി, മദ്യപാനം തുടങ്ങിയ ശീലങ്ങളും സന്ധികളുടെ ആരോഗ്യത്തെ കാര്‍ന്നു തിന്നുന്നവയാണ്.

നിരന്തരമായ ചലനം മൂലം സന്ധികളില്‍ തേയ്മാനം സംഭവിക്കുമ്പോള്‍ ഉണ്ടാകുന്ന രോഗമാണ് റുമാറ്റോയ്ഡ് ആര്‍ത്രൈറ്റിസ് (സന്ധിവാതം). ഇത് ചലനശേഷിയെയാണ് പ്രധാനമായി ബാധിക്കുന്നത്. പ്രധാനമായും കാല്‍മുട്ടുകളെ ബാധിക്കുന്ന ഈ രോഗം ക്രമേണ മറ്റു സന്ധികളെയും ബാധിച്ചു തുടങ്ങും. ശരിയായ ചികിത്സ യഥാസമയം നല്‍കിയില്ലെങ്കില്‍ സന്ധികള്‍ക്കിടയിലുള്ള തരുണാസ്ഥികളെ ബാധിക്കുകയും അവയുടെ കട്ടി കുറഞ്ഞു വരികയും ക്രമേണ ഇവ പൂര്‍ണമായി നശിച്ചു അസ്ഥികള്‍ ദ്രവിച്ചുതുടങ്ങുകയും ചെയ്യും. ഈ അവസ്ഥയില്‍ എത്തിയാല്‍ പിന്നെ മരുന്നുകള്‍ ഫലവത്താകില്ല.

തുടക്കത്തില്‍ ക്യത്യമായ ചികിത്സ ചെയ്താല്‍ വളരെ എളുപ്പം മാറ്റാവുന്ന രോഗമാണ് സന്ധിവാതം. മുട്ടിന് വേദനയോ വീക്കമോ തോന്നിയാല്‍ സന്ധി ചലിപ്പിക്കാതെ കുറച്ചു ദിവസത്തോളം വിശ്രമമെടുക്കുക. സന്ധികള്‍ക്ക് ആയാസമില്ലാത്ത വിധത്തില്‍ ഇരിക്കുകയോ കിടക്കുകയോ ചെയ്തുകൊണ്ടുമാത്രം ജോലി ചെയ്യുക. മധ്യവയസിലെത്തുമ്പോഴേക്കും ശരീര ഭാരം കൃത്യമായി ചിട്ടപ്പെടുത്തണം. ഡോക്ടറുടെ നിര്‍ദേശപ്രകാരമുള്ള വ്യായാമങ്ങള്‍ ശീലിക്കണം. വേദനയ്ക്കുള്ള ഓയിന്റ്‌മെന്റു തേച്ച് മൃദുവായി ഉഴിയുമ്പോള്‍ സന്ധികളിലേക്കുള്ള രക്തപ്രവാഹം വര്‍ധിക്കുകയും വേദനയ്ക്ക് കാര്യമായ ശമനമുണ്ടാവുകയും ചെയ്യും. വേദനയുള്ള ഭാഗത്ത് തുടക്കത്തില്‍ ചൂടുവയ്ക്കുന്നതും, കാലിലെ പേശികള്‍ ബലപ്പെടുത്താനുള്ള ഫിസിയോ തെറാപ്പികൂടി ചെയ്യുന്നതും നല്ലതായിരിക്കും.

മേല്‍പറഞ്ഞ ചികിത്സകൊണ്ടു വേദനയ്ക്കു മാറ്റം ഉണ്ടായില്ലെങ്കില്‍ മാത്രമേ ശസ്ത്രക്രിയയിലേയ്ക്കു കടക്കേണ്ടതുള്ളൂ. പ്രധാനമായും താക്കോല്‍ദ്വാര ശസ്ത്രക്രിയയും അലൈന്‍മെന്റ് ശരിയാക്കുന്ന ശസ്ത്രക്രിയയും  ആണ് ചെയ്യുന്നത്. ഈ ശസ്ത്രക്രിയയിലൂടെ മുട്ടിന്റെ ഉള്ളില്‍ തേയ്മാനം സംഭവിച്ച ഭാഗം ക്ലിയര്‍ ചെയ്യും. മുട്ടിന്റെ ഉള്ളിലെ മൂന്നു ഭാഗങ്ങള്‍ക്കും  കേടുപാടുകള്‍ സംഭവിച്ചാല്‍ മാത്രമേ ഡോക്ടറുടെ നിര്‍േദശ പ്രകാരം അവസാനഘട്ടമായി മുട്ടു മാറ്റിവയ്ക്കല്‍ ശസ്ത്രക്രിയ ചെയ്യേണ്ടതായുള്ളൂ. ശസ്ത്രക്രിയ ചെയ്തു കഴിഞ്ഞാല്‍ ഡോക്ടറുടെ നിര്‍േദശപ്രകാരം കുറച്ചു നാളത്തേയ്ക്കു വിശ്രമം എടുക്കേണ്ടതായും വരും.


 

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.