2018 May 17 Thursday
അസൂയാര്‍ഹരായി രണ്ടുപേരേയുള്ളൂ. വിദ്യ നേടിയ ശേഷം അത് പഠിപ്പിക്കുകയും അതുകൊണ്ട് നീതി കല്‍പ്പിക്കുകയും ചെയ്യുന്നവന്‍. പിന്നെ ധനം നേടിയ ശേഷം അത് ഇലാഹി മാര്‍ഗത്തില്‍ ചെലവഴിക്കുന്നവന്‍.
-മുഹമ്മദ് നബി (സ)

തായിഫില്‍ അനുഗ്രഹം തേടല്‍ മരം അധികൃതര്‍ മുറിച്ചുമാറ്റി

ജിദ്ദ: തായിഫിനു സമീപം ബനീസഅദിലെ അനുഗ്രഹം തേടല്‍ മരം അധികൃതര്‍ മുറിച്ചൊഴിവാക്കി. മലയാളികളടക്കം നിരവധി ഉംറ തീര്‍ഥാടകര്‍ തായിഫിന് സമീപമുള്ള ബനീസഅദിലെ ഒരു മരത്തിന് സമീപത്തുനിന്ന് അനുഗ്രഹം തേടുന്നതിന്റെ ദൃശ്യങ്ങള്‍ സോഷ്യല്‍ മീഡിയ വഴി പ്രചരിച്ചതിനെ തുടര്‍ന്നാണ് നടപടി സ്വീകരിച്ചത്.

മലയാളി ഉംറ തീര്‍ഥാടകര്‍ കൂടുതലായുള്ള വീഡിയോ ദൃശ്യം നിരവധി അറബി വെബ്‌സൈറ്റുകള്‍ പ്രസിദ്ധീകരിച്ചിരുന്നു. ഉംറ സംഘത്തെ സംബന്ധിച്ച് അന്വേഷണം നടത്തുമെന്നും അധികൃതര്‍ വ്യക്തമാക്കി.

തിരുഗേഹങ്ങളുടെ സേവകന്‍ സല്‍മാന്‍ രാജാവിന്റെ ഉപദേഷ്ടാവും മക്ക ഗവര്‍ണറുമായ ഖാലിദ് അല്‍ഫൈസല്‍ രാജകുമാരനാണ് മരവും കല്ലുകളും അടക്കമുള്ള ഈ അടയാളങ്ങള്‍ നീക്കം ചെയ്യാന്‍ ബന്ധപ്പെട്ട വകുപ്പുകള്‍ക്ക് നിര്‍ദേശം നല്‍കിയത്.

താഇഫിലെ മീസാന്‍ പ്രവിശ്യയിലെ ബനൂ സഅദിലെ നാല് സ്ഥലങ്ങളില്‍നിന്നും ഇവ നീക്കി. വിവിധ രാജ്യങ്ങളില്‍ നിന്നുള്ള ഉംറ തീര്‍ഥാടകര്‍ പുണ്യകേന്ദ്രമെന്നോണം ബനീസഅദിലേക്ക് പ്രവഹിക്കുന്നതും ഇവിടുത്തെ മരത്തില്‍നിന്നും കല്ലുകളില്‍നിന്നും അനുഗ്രഹം തേടുന്നതും ശ്രദ്ധയില്‍പെട്ടതിനെ തുടര്‍ന്നാണ് നടപടി.


 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.