2019 July 18 Thursday
നിങ്ങളുടെ അമ്മയോട് സംസാരത്തില്‍ മൂര്‍ച്ചയുള്ള വാക്കുകള്‍ ഉപയോഗിക്കരുത്. നിങ്ങളെ സംസാരിക്കാന്‍ പഠിപ്പിച്ചത് ആ അമ്മയാണെന്ന് മറക്കരുത്.

ഇടുക്കി അടച്ചു; ഒഴുക്കിയത് 620 കോടിയുടെ വൈദ്യുതിക്കുള്ള വെള്ളം

ഉല്‍പ്പാദിപ്പിച്ചത് 171
കോടിയുടെ വൈദ്യുതി

ബാസിത് ഹസന്‍

തൊടുപുഴ: ജലനിരപ്പ് 2,390.98 അടിയിലെത്തിയതോടെ ഇടുക്കിയിലെ എല്ലാ ഷട്ടറുകളും അടച്ചു. അണക്കെട്ടിന്റെ തുറന്നിരുന്ന മൂന്നാം നമ്പര്‍ ഷട്ടര്‍ ഇന്നലെ ഉച്ചയ്ക്ക് 1.02 നാണ് അടച്ചത്. കഴിഞ്ഞ 29 ദിവസം കൊണ്ട് 1063.266 ദശലക്ഷം ഘനമീറ്റര്‍ വെള്ളമാണ് പുറത്തേക്ക് ഒഴുക്കിയത്. 1550.6 ദശലക്ഷം യൂനിറ്റ് വൈദ്യുതി ഇത്രയും വെള്ളം കൊണ്ട് ഉല്‍പ്പാദിപ്പിക്കാം. ശരാശരി വിലയായ നാലുരൂപ കണക്കാക്കിയാല്‍ 620 കോടി രൂപയുടെ വൈദ്യുതിക്കുള്ള വെള്ളമാണിത്.

2017 സെപ്റ്റംബറില്‍ പവര്‍ എക്‌സ്‌ചേഞ്ചില്‍നിന്നു കേരളം വൈദ്യുതി വാങ്ങിയത് യൂനിറ്റിന് 9.90 നിരക്കിലാണ്. ഇതുവച്ച് കണക്കുകൂട്ടിയാല്‍ 1,534.5 കോടി രൂപയുടെ വൈദ്യുതിക്കുള്ള വെള്ളമുണ്ട്. ഈ വെള്ളം എറണാകുളം, ഇടുക്കി ജില്ലകളിലുണ്ടാക്കിയ നാശനഷ്ടവും ചെറുതല്ല. ഇക്കാലയളവില്‍ പദ്ധതിയുടെ മൂലമറ്റം പവര്‍ ഹൗസില്‍ ഉല്‍പ്പാദിപ്പിച്ചത് 42.8 കോടി യൂനിറ്റ് വൈദ്യുതിയാണ്. ഇതിന് 171.2 കോടി രൂപയാണ് ശരാശരി വില. 

ഓഗസ്റ്റ് ഒന്‍പതിന് ഉച്ചക്ക് 12.32ന് ട്രയല്‍ റണ്ണിനായാണ് ചെറുതോണി അണക്കെട്ടിന്റെ മൂന്നാം നമ്പര്‍ ഷട്ടര്‍ 50 സെന്റിമീറ്റര്‍ ഉയര്‍ത്തിയത്. നാലു മണിക്കൂറിനുശേഷം അടയ്ക്കാനായിരുന്നു ഉദ്ദേശം. എന്നാല്‍ ജലനിരപ്പ് ക്രമാതീതമായി ഉയര്‍ന്നതോടെ രാത്രി മുഴുവന്‍ ഷട്ടര്‍ തുറന്നുവച്ചു. 10 ന് രാവിലെ ഏഴിനു അണക്കെട്ടിന്റെ രണ്ടും നാലും ഷട്ടറുകള്‍ 40 സെന്റിമീറ്റര്‍ വീതം ഉയര്‍ത്തി. ഒപ്പം ആദ്യം തുറന്ന ഷട്ടര്‍ 10 സെന്റിമീറ്റര്‍ താഴ്ത്തി. പിന്നീട് 11.30നു മൂന്നു ഷട്ടറും കുറേക്കൂടി ഉയര്‍ത്തി. എന്നിട്ടും ജലനിരപ്പ് വര്‍ധിച്ചു കൊണ്ടിരിക്കുകയായിരുന്നു.

ഉച്ചക്ക് 1.05നു ഒന്നാമത്തെ ഷട്ടര്‍ ഒരുമീറ്റര്‍ ഉയര്‍ത്തി. 1.45നു അഞ്ചാമത്തെ ഷട്ടറും ഉയര്‍ത്തി. ഉച്ചകഴിഞ്ഞു 3.30നു രണ്ടും മൂന്നും നാലും ഷട്ടറുകള്‍ ഒന്നര മീറ്ററായും ഉയര്‍ത്തി. പിന്നീട് പടിപടിയായി ഷട്ടര്‍ കൂടുതല്‍ ഉയര്‍ത്തി വെള്ളം ഒഴുക്കുകയായിരുന്നു. ദിവസങ്ങളോളം 1,500 ക്യുമെക്‌സ്(സെക്കന്റില്‍ 15 ലക്ഷം ലിറ്റര്‍) വെള്ളം ഒഴുക്കി. ഓഗസ്റ്റ് 15, 16, 17 തിയതികളില്‍ 1,600 ക്യുമെക്‌സ് വെള്ളമൊഴുക്കി. മൂലമറ്റം പവര്‍ ഹൗസില്‍ പ്രതിദിനം ശരാശരി ഒന്നരക്കോടി യൂനിറ്റ് ഉല്‍പ്പാദനം നടത്തി. എന്നിട്ടും ഓഗസ്റ്റ് 19ന് 2,402.3 അടിവരെ ജലനിരപ്പ് ഉയര്‍ന്നത് കടുത്ത ആശങ്കയാണ് സൃഷ്ടിച്ചത്.

ഇടുക്കി പദ്ധതി 1976ല്‍ കമ്മിഷന്‍ ചെയ്തതിന് ശേഷം ഏറ്റവും അധികം വെള്ളം ഒഴുകിയെത്തിയത് ഈ ഓഗസ്റ്റിലാണ്. എന്നാല്‍ ഇത് പൂര്‍ണമായും പ്രയോജനപ്പെടുത്താന്‍ കെ.എസ്.ഇ.ബിക്ക് കഴിഞ്ഞില്ല. 1,893.041 ദശലക്ഷം യൂനിറ്റ് വൈദ്യുതി ഉല്‍പ്പാദിപ്പിക്കാനുള്ള വെള്ളം നിലവില്‍ അണക്കെട്ടിലുണ്ട്. സംഭരണശേഷിയുടെ 86 ശതമാനമാണിത്. സംസ്ഥാനത്തെ ഏറ്റവും വലിയ ജലവൈദ്യുത പദ്ധതിയായ ഇടുക്കിയില്‍ 2,190 ദശലക്ഷം യൂനിറ്റ് വൈദ്യുതിക്കാനാവശ്യമായ വെള്ളമാണ് സംഭരിക്കാനാകുക.


 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.