2019 October 19 Saturday
ഏറ്റവും വലിയ പാപം ഞാന്‍ കഴിവുകെട്ടവനാണ് എന്ന വിചാരമാണ്.

ലൈസന്‍സ് ഇല്ലാതെ ഹെലികാം പറത്തരുത്, കലക്ടറുടെ അനുമതി വാങ്ങണം; സംസ്ഥാനത്തിന് കേന്ദ്രത്തിന്റെ കത്ത്

പ്രജോദ് കടയ്ക്കല്‍

തിരുവനന്തപുരം: സംസ്ഥാനത്ത് മുന്‍കൂട്ടി അനുമതി വാങ്ങാതെ ഹെലികാമറകള്‍ ഉപയോഗിക്കുന്നുവെന്നു ചൂണ്ടിക്കാട്ടി കേന്ദ്ര വ്യോമയാന ഡയറക്ടര്‍ ആഭ്യന്തരവകുപ്പിന് കത്തയച്ചു.

ഹെലികാമറകളും ഡ്രോണുകളും ഉപയോഗിക്കുന്നതു നിരോധിച്ചുകൊണ്ട് 2014 നവംബറില്‍ വ്യോമയാനമന്ത്രാലയം ഉത്തരവിട്ടിരുന്നു. എന്നാല്‍, സംസ്ഥാനത്ത് സിനിമ, ആല്‍ബം എന്നിവയുടെ ചിത്രീകരണത്തിനും ഉത്സവം, വിവിധ സംഘടനകളുടെ പരിപാടികള്‍ എന്നിവയ്ക്കും ഹെലികാമറകള്‍ ഉപയോഗിക്കുന്നത് ശ്രദ്ധയില്‍പ്പെട്ടതിനാലാണ് വ്യോമയാന ഡയറക്ടര്‍ കത്തയച്ചത്.

ഏതെങ്കിലും പ്രദേശത്ത് ഹെലികാമറകള്‍ ഉപയോഗിക്കുന്നത് ശ്രദ്ധയില്‍പ്പെട്ടാല്‍ പൊലിസ് സ്റ്റേഷന്‍ അധികൃതര്‍ അറിയിക്കണമെന്ന് വ്യോമയാന ഡയറക്ടര്‍ നേരത്തേ ആവശ്യപ്പെട്ടിരുന്നു. ഹെലികാമറ പ്രവര്‍ത്തിപ്പിക്കുന്നതിനു സിവില്‍ വ്യോമയാന ഡയറക്ടറേറ്റില്‍നിന്ന് പ്രത്യേക ലൈസന്‍സ് വാങ്ങണമെന്നും നിര്‍ദേശമുണ്ടായിരുന്നു. ഇതുകൂടാതെ ജില്ലാ ഭരണകൂടത്തിന്റെ പ്രത്യേകം അനുമതിയും വാങ്ങണം. തറനിരപ്പില്‍നിന്ന് 200 അടിയില്‍ കൂടുതല്‍ ഉയരത്തില്‍ പ്രവര്‍ത്തിപ്പിക്കാന്‍ പാടില്ല. 200 അടിയില്‍ കൂടുതല്‍ ഉയരത്തില്‍ പ്രവര്‍ത്തിപ്പിക്കണമെങ്കില്‍ സമീപത്തെ എയര്‍ട്രാഫിക് കണ്‍ട്രോള്‍ യൂനിറ്റില്‍നിന്ന് ക്ലിയറന്‍സ് വാങ്ങണം. ഹെലികാമറകള്‍ കൈമാറ്റം ചെയ്യാന്‍ പാടില്ലെന്നും നിര്‍മാതാക്കളുടെ അംഗീകൃത കേന്ദ്രങ്ങളില്‍ മാത്രമേ ഇവയുടെ അറ്റകുറ്റപ്പണികള്‍ നടത്താന്‍ പാടുള്ളൂവെന്നും നിര്‍ദേശത്തിലുണ്ട്. ഹെലികാമറകള്‍ പ്രവര്‍ത്തിപ്പിക്കുന്നവര്‍ക്ക് 18 വയസ് പൂര്‍ത്തിയാകണമെന്നും കേന്ദ്രം നിര്‍ദേശത്തിലുണ്ടായിരുന്നു.

അതേസമയം, സംസ്ഥാനത്ത് ഹെലികാമറകളുടെ ഉപയോഗം വര്‍ധിക്കുന്നതായാണ് റിപ്പോര്‍ട്ട്. 20,000 രൂപ മുതല്‍ വിപണിയില്‍ ലഭ്യമാകുന്ന ഹെലികാമറകള്‍ വിവാഹ ഫോട്ടോഗ്രാഫര്‍മാരടക്കം വ്യാപകമായി ഉപയോഗിക്കുന്നുണ്ട്. കഴിഞ്ഞവര്‍ഷം തിരുവനന്തപുരം പാങ്ങോട് സൈനിക ആസ്ഥാനത്തിനു സമീപം ഒരു ഹെലികാമറ തകര്‍ന്നുവീണിരുന്നു. തുടര്‍ന്ന് ഇവയുടെ ഉപയോഗം വിമാനങ്ങളുടെ പ്രവര്‍ത്തനത്തെ ബാധിക്കുന്നുവെന്നു ചൂണ്ടിക്കാട്ടി തിരുവനന്തപുരം വിമാനത്താവളം അധികൃതര്‍ വ്യോമയാന മന്ത്രാലയത്തിനു പരാതി നല്‍കിയിരുന്നു.

കേന്ദ്രസുരക്ഷാ ഏജന്‍സിയും ഡ്രോണുകളുടെ ഉപയോഗം നിരോധിക്കണമെന്ന് നിര്‍ദേശിച്ചിട്ടുണ്ട്. നിയമസഭാ തെരഞ്ഞെടുപ്പിനോടനുബന്ധിച്ച് പ്രധാനമന്ത്രി ഉള്‍പ്പെടെയുള്ളവരുടെ പ്രചാരണ പരിപാടികള്‍ ചിത്രീകരിക്കുന്നതിന് ചില ദേശീയ ചാനലുകള്‍ ഹെലികാമറ ഉപയോഗിക്കാന്‍ അനുമതി തേടിയെങ്കിലും സ്‌പെഷല്‍ പ്രൊട്ടക്ഷന്‍ വിഭാഗം നിഷേധിച്ചിരുന്നു.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Latest News