2019 May 24 Friday
നമ്മുടെ ഭാവിയുടെ സ്രഷ്ടാക്കള്‍ മറ്റാരുമല്ല; നമ്മള്‍ തന്നെയാണ്! -മഹാവീരന്‍

കനത്ത മഴ: വിദ്യാഭ്യാസ സ്ഥാപനങ്ങള്‍ക്ക് ഇന്ന്‌ അവധി, പരീക്ഷകള്‍ മാറ്റി, ഗതാഗത നിരോധനം

10 UPDATES

 

രണ്ടു ദിവസമായി തിമിര്‍ത്തു പെയ്യുന്ന മഴയില്‍ സംസ്ഥാനത്തൊട്ടാകെ കനത്ത നാശനാഷ്ടം. വെള്ളപ്പൊക്കവും ഉരുള്‍പ്പൊട്ടലും കാരണം ഭീതിയിലായതോടെ സര്‍ക്കാര്‍ ജാഗ്രതാ നിര്‍ദേശം പുറപ്പെടുവിച്ചു. കനത്ത മഴ അടുത്ത മൂന്നു ദിവസങ്ങള്‍ കൂടി തുടരുമെന്നാണ് കേന്ദ്രത്തില്‍ നിന്നുള്ള മുന്നറിയിപ്പ്.

 

1. മഴ കനത്തതു കാരണം സംസ്ഥാനത്തെ എല്ലാ വിദ്യാഭ്യാസ സ്ഥാപനങ്ങള്‍ക്കും തിങ്കളാഴ്ച അവധി പ്രഖ്യാപിച്ചു. വിദ്യാഭ്യാസ സെക്രട്ടറിയാണ് അവധി പ്രഖ്യാപിച്ചത്.


2. നേരത്തെ ചില ജില്ലകളിലെ വിദ്യാഭ്യാസ സ്ഥാപനങ്ങള്‍ക്കു മാത്രം കലക്ടര്‍മാര്‍ അവധി പ്രഖ്യാപിച്ചിരുന്നു. പിന്നാലെ, സംസ്ഥാനത്തെ എല്ലാ വിദ്യാഭ്യാസ സ്ഥാപനങ്ങള്‍ക്കും അവധി നല്‍കാന്‍ സംസ്ഥാന ദുരന്ത നിവാരണ അതോറിറ്റി നിര്‍ദേശം നല്‍കി. ഇതോടെയാണ് എല്ലായിടത്തും അവധി പ്രഖ്യാപിച്ചത്. പ്രൊഫഷണല്‍ സ്ഥാപനങ്ങള്‍ക്കും അവധിയായിരിക്കും.


3. കാലിക്കറ്റ്, എം.ജി, കണ്ണൂര്‍, കുസാറ്റ്, ആരോഗ്യ സര്‍വകലാശാലകള്‍ തിങ്കളാഴ്ച നടത്താനിരുന്ന എല്ലാ പരീക്ഷകളും മാറ്റിവച്ചു. പുതിയ തിയ്യതി പിന്നീട് അറിയിക്കുമെന്ന് പരീക്ഷാ കണ്‍ട്രോളര്‍മാര്‍ അറിയിച്ചു. സമസ്ത നടത്തുന്ന സ്‌കൂള്‍ വര്‍ഷ മദ്‌റസകളിലെ തിങ്കളാഴ്ചത്തെ പരീക്ഷ സ്‌കൂള്‍ അവധി പ്രഖ്യാപിച്ചത് കാരണം മാറ്റി വച്ചതായി ജനറല്‍ മാനേജര്‍ അറിയിച്ചു. മാറ്റി വച്ച പരീക്ഷ അവസാന പരീക്ഷയ്ക്ക് ശേഷമുള്ള പ്രവൃത്തി ദിവസം നടക്കും.


4. മഴ കാരണം രാത്രി ഏഴു മുതല്‍ രാവിലെ ഏഴു വരെയുള്ള യാത്രകള്‍ക്ക് സംസ്ഥാന ദുരന്ത നിവാരണ അതോറിറ്റി നിയന്ത്രണം ഏര്‍പ്പെടുത്തി. അടിയന്തര ആവശ്യത്തിനു പോകുന്ന വാഹനങ്ങള്‍ മാത്രമേ ഈ സമയത്ത് മലയോര മേഖലയിലേക്ക് കടത്തിവിടുകയുള്ളൂ.


5. മൂന്നാറിലേക്കുള്ള ഗതാഗതം പൂര്‍ണമായും നിരോധിച്ചു. ഇനിയൊരു അറിയിപ്പു ലഭിക്കുന്നതു വരെ നിരോധനമുണ്ടാവും. വാഹനങ്ങളെല്ലാം നേര്യമംഗലത്താണ് തടയുന്നത്.


6. കോഴിക്കോട്- താമരശ്ശേരി ചുരത്തില്‍ മരം വീണ് ഗതാഗതം തടസ്സപ്പെട്ടിരിക്കുകയാണ്. കൊച്ചി- ധനുഷ്‌കോടി ദേശീയപാത, പാലക്കാട് മണ്ണാര്‍കാട്- അട്ടപ്പാടി ചുരം റോഡ് എന്നിവിടങ്ങളിലും ഗതാഗതം നിരോധിച്ചു.


7. ജനങ്ങള്‍ക്കും ഉദ്യോഗസ്ഥര്‍ക്കും സര്‍ക്കാര്‍ ജാഗ്രതാ നിര്‍ദേശം നല്‍കി. ആറു താലൂക്കുകളിലെ തഹസില്‍ദാര്‍മാര്‍ രാത്രിയിലും കണ്‍ട്രോള്‍ റൂമില്‍ ഉണ്ടായിരിക്കണമെന്ന് നിര്‍ദേശമുണ്ട്. കോഴിക്കോട്, പാലക്കാട്, ഇടുക്കി, കോട്ടയം, കുട്ടനാട്, താലൂക്കിലെ തഹസില്‍ദാര്‍മാര്‍ക്കാണ് നിര്‍ദേശം. കലക്ടര്‍മാരെ ഏകോപിപ്പിക്കാന്‍ റെവന്യൂ അഡി. ചീഫ് സെക്രട്ടറിക്ക് ചുമത നല്‍കി.


8. മഴക്കെടുതി മൂലം മരിച്ചവരുടെ എണ്ണം രണ്ടായി. കണ്ണൂര്‍ ഇരിണാവ് മടക്കരയില്‍ തെങ്ങ് വീണ് മുഹമ്മദ് കുഞ്ഞി (75) മരിച്ചു. കണ്ണൂര്‍ പാനൂരിലെ ക്വാറിയില്‍ പാറ ഇടിഞ്ഞു വീണ് കര്‍ണാടക സ്വദേശി ക്രിസ്തുരാജ് (20) മരിച്ചിരുന്നു.


9. മലയോര മേഖലയില്‍ മണ്ണിടിച്ചിലും ഉരുള്‍പ്പൊട്ടലും ഉണ്ടാവാന്‍ സാധ്യതയുണ്ടെന്നും മുന്നറിയിപ്പുണ്ട്. പാലക്കാട് ആനക്കല്‍- തൊട്ടിയാക്കര പ്രദേശത്ത് ഉരുള്‍പ്പൊട്ടലുണ്ടായി. നാലു വീടുകള്‍ ഭാഗികമായി തകര്‍ന്നു. ആര്‍ക്കും പരുക്കില്ല. മുല്ലപ്പെരിയാര്‍ അണക്കെട്ടിലെ ജലനിരപ്പ് 126 അടി ആയി ഉയര്‍ന്നു. കനത്ത മഴ തുടരുന്നതിനാല്‍ ഇനിയും ജലനിരപ്പ് കൂടാന്‍ സാധ്യതയുണ്ട്.


10. കോട്ടയം- ചങ്ങനാശ്ശേരി റൂട്ടില്‍ പാളത്തില്‍ മണ്ണിടിഞ്ഞു വീണ് ട്രെയിന്‍ ഗതാഗതം കുറച്ചുസമയത്തേക്ക് തടസ്സപ്പെട്ടു. ഈ ഭാഗത്തുകൂടി ട്രെയിനുകള്‍ വേഗത കുറച്ചാണ് ഓടുന്നത്.


 

 

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.