2020 January 20 Monday
യുദ്ധഭീതിയോടെ ഗൾഫ് മേഖല; മറ്റൊരു ഗൾഫ് യുദ്ധം താങ്ങാൻ ലോകത്തിനു ശേഷിയുണ്ടാകില്ലെന്ന് യു എൻ

പ്രതിപക്ഷ ഐക്യത്തിന്റെ പുതിയവേദി: കര്‍ണാടക മുഖ്യമന്ത്രിയായി കുമാരസ്വാമി സത്യപ്രതിജ്ഞ ചൊല്ലി, പരമേശ്വര ഉപമുഖ്യമന്ത്രി

ബംഗളൂരു: പ്രതിപക്ഷ മഹാഐക്യത്തെ സാക്ഷിയാക്കി കര്‍ണാടക മുഖ്യമന്ത്രിയായി എച്ച്.ഡി കുമാരസ്വാമിയും ഉപമുഖ്യമന്ത്രിയായി ജി പരമേശ്വരവും സത്യപ്രതിജ്ഞ ചൊല്ലി അധികാരമേറ്റു.

ബംഗളൂരു: പ്രതിപക്ഷ മഹാഐക്യത്തെ സാക്ഷിയാക്കി കര്‍ണാടകയുടെ 24-ാം മുഖ്യമന്ത്രിയായി ജെ.ഡി.എസ് നേതാവ് എച്ച്.ഡി കുമാരസ്വാമി സത്യപ്രതിജ്ഞ ചൊല്ലി അധികാരമേറ്റു. ഉപമുഖ്യമന്ത്രിയായി കെ.പി.സി.സി അധ്യക്ഷന്‍ ജി പരമേശ്വരയും സത്യപ്രതിജ്ഞ ചെയ്തു.

 

കര്‍ണാടക നിയമസഭയായ വിധാന്‍ സൗധയുടെ പുറത്ത് നടത്തിയ വലിയ ചടങ്ങില്‍ കര്‍ണാടക ഗവര്‍ണര്‍ വാജുഭായ് വാലയാണ് സത്യപ്രതിജ്ഞ ചൊല്ലിക്കൊടുത്തത്.

 

രാജ്യത്തെ എല്ലാ പ്രതിപക്ഷ കക്ഷികളും ഒരുമിക്കല്‍ വേദി കൂടിയായി മാറിയിരിക്കുകയാണ് ചടങ്ങ്. യു.പി.എ അധ്യക്ഷ സോണിയാ ഗാന്ധി, കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി, മുഖ്യമന്ത്രി പിണറായി വിജയന്‍, ബഹുജന്‍ സമാജ്‌വാദി പാര്‍ട്ടി അധ്യക്ഷ മായാവതി, പശ്ചിമബംഗാള്‍ മുഖ്യമന്ത്രി മമതാ ബാനര്‍ജി, ആര്‍.ജെ.ഡി നേതാവ് തേജസ്വി യാദവ്, ആന്ധ്രപ്രദേശ് മുഖ്യമന്ത്രി എന്‍ ചന്ദ്രബാബു നായിഡു, സി.പി.എം ജനറല്‍ സെക്രട്ടറി സീതാറാം യെച്ചൂരി, എന്‍.സി.പി നേതാവ് ശരദ് പവാര്‍, പി.കെ കുഞ്ഞാലിക്കുട്ടി എം.പി, ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍ എന്നിവര്‍ കൈകള്‍ കോര്‍ത്ത് വേദിയിലെത്തി.

പ്രതിപക്ഷ ഐക്യത്തിന്റെ വലിയ വേദിയില്‍ ഉത്തര്‍പ്രദേശിലെ ബദ്ധവൈരികളായ മായാവതിയും എസ്.പി നേതാവ് അഖിലേഷ് യാദവും പരസ്പരം ചിരിച്ച് ക്യാമറയ്ക്ക് മുന്നില്‍ പോസ് ചെയ്തു. മമതാ ബാനര്‍ജിയും സീതാറാം യെച്ചൂരിയും പരസ്പരം ചിരിച്ചതും ശ്രദ്ധേയമായി.

കോണ്‍ഗ്രസിന് 22 ഉം ജെ.ഡി.എസിന് 12 ഉം എന്ന നിലയ്ക്ക് 34 മന്ത്രിമാരാണ് സഭയിലുണ്ടാവുക. സ്പീക്കര്‍ സ്ഥാനം കോണ്‍ഗ്രസിലെ രമേശ് കുമാറിനും ഡെപ്യൂട്ടി സ്പീക്കര്‍ സ്ഥാനം ജെ.ഡി.എസിനുമായിരിക്കും.

കര്‍ണാടകയിലെ വലിയ ഒറ്റകക്ഷിയായ ബി.ജെ.പിയില്‍ നിന്ന് മുഖ്യമന്ത്രിയായി സത്യപ്രതിജ്ഞ ചെയ്ത യെദ്യൂരപ്പ രാജിവച്ചതിനു പിന്നാലെയാണ് കോണ്‍ഗ്രസ്- ജെ.ഡി.എസ് സര്‍ക്കാര്‍ അധികാരത്തിലേറുന്നത്. 117 അംഗങ്ങളുടെ പിന്തുണ സഖ്യത്തിനുണ്ട്.

അതേസമയം, ബി.ജെ.പി ഇന്ന് ‘ജനവിരുദ്ധ അധികാരമേല്‍ക്കല്‍ ദിന’മായി പ്രതിഷേധിക്കുകയാണ്.


 

 

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.