2019 May 20 Monday
രാഷ്ട്രീയപാര്‍ട്ടി നേതാക്കളുടെയും പ്രധാനമന്ത്രിമാരുടെയും കളിപ്പാവകളായി മാറുന്നവരെയല്ല നിയമിക്കേണ്ടത്. അന്ധന്‍ അന്ധനെ നയിച്ചാല്‍ ഇരുവരും കുഴിയില്‍ വീഴും -യേശു

സഊദി ഹരിത കാര്‍ഡിന് മന്ത്രി സഭ അംഗീകാരം നല്‍കി

റിയാദ്: ബിസിനസുകാരെയും ഉന്നത പ്രൊഫഷണലുകളെയും ലക്ഷ്യമാക്കി അവതരിപ്പിക്കുന്ന പുതിയ ഇഖാമ സംവിധാനമായ ഹരിത ഇഖാമക്ക് സഊദി മന്ത്രി സഭ അംഗീകാരം നല്‍കി. തലസ്ഥാന നഗരിയായ റിയാദിലെ രാജകൊട്ടാരത്തില്‍ സഊദി ഭരണാധികാരി സല്‍മാന്‍ ബിന്‍ അബ്ദുല്‍ അസീസ് രാജാവിന്റെ അധ്യക്ഷതയില്‍ ചേര്‍ന്ന ക്യാബിനറ്റ് സമിതിയാണ് അംഗീകാരം നല്‍കിയത്.
മൂന്ന് മാസത്തിനുള്ളില്‍ ഇത് സംബന്ധിച്ച നടപടികള്‍ പൂര്‍ത്തിയാകും.
സഊദി പ്രവാസികളെ ഏറെ ആഹ്ലാദത്തിലാക്കിയ പുതിയ പ്രഖ്യാപനം ഏതാനും ദിവസങ്ങള്‍ക്ക് മുന്‍പ് പരമോന്നത സഭയായ ശൂറ കൗണ്‍സില്‍ ആണ് അംഗീകരിച്ചു പ്രഖ്യാപിച്ചത്. സഊദി സ്‌പോണ്‍സര്‍ ഇല്ലാതെ സ്വന്തമായി ബിസിനസുകള്‍ നടത്താനും വാഹനങ്ങളും കെട്ടിടങ്ങളും വാങ്ങാനും റിയല്‍ എസ്റ്റേറ്റ് മേഖലയിലടക്കം വിവിധ മേഖലയില്‍ നിക്ഷേപം നടത്താനും അനുവാദം നല്‍കുന്ന പ്രിവിലേജ് ഇഖാമ വരുന്നതില്‍ ബിസിനസ് പ്രമുഖര്‍ പരക്കെ സ്വാഗതം ചെയ്തിട്ടുണ്ട്.
വര്‍ഷം തോറും പുതുക്കാവുന്നതും ആജീവനാന്തകാലത്തേക്ക് ലഭിക്കാവുന്നതുമടക്കം രണ്ടു തരം വ്യത്യസ്ത ഹരിത ഇഖാമയാണ് അവതരിപ്പിക്കുന്നത്. ഇത് ലഭിക്കുന്നവര്‍ക്ക് തൊഴിലാളികളെ റിക്രൂട്ട് ചെയ്യാനും തൊഴിലുകള്‍ മാറാനും യഥേഷ്ടം അനുവാദം നല്‍കുന്നുണ്ട്. കൂടാതെ, മറ്റു പല സേവനങ്ങളും ലഭ്യമാകും.
സഊദി എണ്ണക്കപ്പലുകള്‍ക്ക് നേരെയും സഊദി അരാംകോ എണ്ണ ശുദ്ധീകരണ സംവിധാനങ്ങള്‍ക്ക് നേരെയും നടന്ന സ്‌ഫോടനത്തെ അതിശക്തമായ ഭാഷയില്‍ അപലപിച്ച മന്ത്രിസഭ ഇത്തരം പ്രവൃത്തികള്‍ക്കെതിരേ ലോകം ഒന്നിക്കണമെന്നും മന്ത്രിസഭ ആഹ്വാനം ചെയ്തു.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.