2019 October 22 Tuesday
ഏറ്റവും വലിയ പാപം ഞാന്‍ കഴിവുകെട്ടവനാണ് എന്ന വിചാരമാണ്.

കേന്ദ്രസര്‍ക്കാര്‍ ജീവനക്കാരുടെ ക്ഷാമബത്ത വര്‍ധിപ്പിച്ചു; കൂട്ടിയത് 5 ശതമാനം

 

ന്യൂഡല്‍ഹി: കേന്ദ്രസര്‍ക്കാര്‍ ജീവനക്കാര്‍ക്കും പെന്‍ഷന്‍കാര്‍ക്കും ക്ഷാമബത്ത (ഡി.എ) അഞ്ച് ശതമാനം വര്‍ധിപ്പിച്ചു. നിലവില്‍ 12 ശതമാനമാണ് കേന്ദ്രസര്‍ക്കാര്‍ ജീവനക്കാരുടെ ക്ഷാമബത്ത. വര്‍ധന പ്രഖ്യാപിച്ചതോടെ ഇനിയിത് 17 ശതമാനമാകും. ഏഴാം ശമ്പള കമ്മീഷന്റെ ശുപാര്‍ശകള്‍ പരിഗണിച്ചാണ് വര്‍ധന നടപ്പാക്കുന്നത്.

പ്രധാനമന്ത്രി നരേന്ദ്ര മോദിയുടെ അധ്യക്ഷതയില്‍ ചേര്‍ന്ന കേന്ദ്രമന്ത്രിസഭാ യോഗമാണ് ക്ഷാമബത്ത അഞ്ച് ശതമാനം വര്‍ധിപ്പിക്കാന്‍ തീരുമാനമെടുത്തത്.

പെന്‍ഷന്‍കാര്‍ക്കുള്ള ഡിയര്‍നെസ് റിലീഫും (ഡി.ആര്‍) വര്‍ധിപ്പിച്ചിട്ടുണ്ട്. കേന്ദ്രമന്ത്രി പ്രകാശ് ജാവദേക്കറാണ് വാര്‍ത്താ സമ്മേളനത്തില്‍ ഇക്കാര്യം പ്രഖ്യാപിച്ചത്. 50 ലക്ഷത്തോളം കേന്ദ്രസര്‍ക്കാര്‍ ജീവനക്കാര്‍ക്കും 62 ലക്ഷം പെന്‍ഷന്‍കാര്‍ക്കും ഇതിന്റെ പ്രയോജനം ലഭിക്കുമെന്നും ക്ഷാമബത്ത വര്‍ധന കേന്ദ്രസര്‍ക്കാര്‍ ജീവനക്കാര്‍ക്കും പെന്‍ഷന്‍കാര്‍ക്കുമുള്ള ദീപാവലി സമ്മാനമാണെന്നും പ്രകാശ് ജാവദേക്കര്‍ പറഞ്ഞു. വര്‍ധന 2019 ജൂലൈ മുതലുള്ള മുന്‍കാല പ്രാബല്യത്തോടെ കേന്ദ്രസര്‍ക്കാര്‍ ജീവനക്കാര്‍ക്കും പെന്‍ഷന്‍കാര്‍ക്കും ലഭ്യമാകും.

ആശ വര്‍ക്കര്‍മാരുടെ വേതനം ഇരട്ടിയാക്കാനും കേന്ദ്രമന്ത്രിസഭാ യോഗം തീരുമാനിച്ചതായി പ്രകാശ് ജാവദേക്കര്‍ അറിയിച്ചു. ആയിരം രൂപയില്‍ നിന്ന് രണ്ടായിരം രൂപയായാണ് ആശ വര്‍ക്കര്‍മാറുടെ വേതനം ഉയര്‍ത്തുക. പ്രധാനമന്ത്രി കൃഷി സമ്മാന്‍ നിധിയുടെ ആനുകൂല്യം ലഭിക്കുന്നതിനായി ആധാര്‍ നമ്പര്‍ ചേര്‍ക്കേണ്ട അവസാന തീയതി നവംബര്‍ 30 വരെ നീട്ടാനും മന്ത്രിസഭാ യോഗം തീരുമാനിച്ചതായും പ്രകാശ് ജാവദേക്കര്‍ അറിയിച്ചു.


 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.