2018 January 09 Tuesday
സൂക്ഷിക്കാതിരുന്നാല്‍ തഴക്കങ്ങള്‍ ജീവിതാവശ്യങ്ങളായി മാറും
സെന്റ് അഗസ്റ്റിന്‍

7.5 ലക്ഷം ഇന്ത്യക്കാര്‍ മടങ്ങേണ്ടി വരില്ല; എച്ച്-1ബി വിസയില്‍ കാലാവധി നീട്ടാം

വാഷിങ്ടണ്‍: ഇന്ത്യന്‍ ടെക്കികള്‍ക്ക് അമേരിക്കയില്‍ നിന്ന് ആശ്വാസ വാര്‍ത്ത. 7.5 ലക്ഷം ഇന്ത്യക്കാരെ ബാധിക്കുമായിരുന്ന എച്ച്-1ബി വിസ പദ്ധതി നടപ്പാക്കില്ലെന്നാണ് റിപ്പോര്‍ട്ടുകള്‍. എച്ച്-1ബി വിസയിലുള്ളവരെ സ്വദേശത്തേക്ക് തിരിച്ചയക്കാനായിരുന്നു യു.എസ് പദ്ധതി. വിസയുടെ കാലാവധി ദീര്‍ഘിപ്പിക്കുന്നതിന് നിയന്ത്രണം ഏര്‍പ്പെടുത്തുമെന്ന തീരുമാനം പരിഗണനയില്‍ ഇല്ലെന്ന് യു.എസ് അധികൃതര്‍ വ്യക്തമാക്കി.

നിയന്ത്രണം ഇങ്ങനെ

എച്ച്-1ബി വിസയുടമകളെ യു.എസില്‍ നിന്ന് പിരിയാന്‍ നിര്‍ബന്ധിക്കുന്ന തരത്തില്‍ നിയന്ത്രണം കൊണ്ടുവരാനായിരുന്നു പദ്ധതി. യു.എസ് പൗരന്മാര്‍ക്ക് കൂടുതല്‍ ജോലി നല്‍കാന്‍ വേണ്ടിയാണ് ഇതെന്നായിരുന്നു ട്രംപിന്റെ ന്യായീകരണം. ഇതിനു വേണ്ടി 21-ാം നൂറ്റാണ്ട് ആക്ടിലെ (എ.സി21) 104 സി വകുപ്പ് മാറ്റാനും അദ്ദേഹം പദ്ധതിയിട്ടിരുന്നു.

ഈ നിയമപ്രകാരം എച്ച്-1ബി വിസയുടെ കാലാവധി മൂന്നു വര്‍ഷമാണ്. ഇതു പിന്നീട് മൂന്നു വര്‍ഷം കൂടി നീട്ടിക്കിട്ടും. ഇതിനുശേഷം ഗ്രീന്‍ കാര്‍ഡിന് അപേക്ഷിക്കുന്നവര്‍ക്ക് അതു ലഭിക്കുന്നതു വരെ അമേരിക്കയില്‍ തുടരാം. ഈ ഇളവുകളാണ് ഒഴിവാക്കാന്‍ ട്രംപ് സര്‍ക്കാര്‍ തീരുമാനിച്ചിരുന്നത്.

യു.എസ് വ്യവസായ സംഘടനയുടെ എതിർപ്പ്

തീരുമാനത്തിനെതിരെ യു.എസ് വ്യവസായ സംഘടന തന്നെ നേരത്തെ രംഗത്തുവന്നിരുന്നു. കാലാവധി ദീര്‍ഘിപ്പിക്കാത്തത് യു.എസ് സര്‍ക്കാരിന്റെ തെറ്റായ നടപടിയാണെന്നും അമേരിക്കന്‍ വ്യവസായത്തെയും സമ്പദ് വ്യവസ്ഥയെയും ഇതും ബാധിക്കുമെന്നും സംഘടനാ വക്താവ് പറഞ്ഞു.


 

 

 

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.