2020 February 26 Wednesday
മധ്യേഷ്യൻ സമാധാന കരാർ ചൊവ്വാഴ്ച്ച പ്രഖ്യാപിക്കുമെന്ന് ട്രംപ്

അഴിമതി: സഊദിയിൽ വീണ്ടും ഉദ്യോഗസ്ഥരെ അറസ്‌റ്റ് ചെയ്‌തു, ഇത്തവണ പിടിയിലായത് മുനിസിപ്പാലിറ്റി ഉദ്യോഗസ്ഥരും കരാറുകാരും

    റിയാദ്: സഊദിയിൽ അഴിമതി പോരാട്ടത്തിന്റെ ഭാഗമായി വീണ്ടും ഉദ്യോഗസ്ഥരെ അറസ്‌റ്റ് ചെയ്‌തു. ഏതാനും മുനിസിപ്പാലിറ്റി ഉദ്യോഗസ്ഥരെയും കരാറെടുത്ത കരാറുകാരുമാണ് അധികൃതർ അറസ്റ്റ്‌ ചെയ്‌തത്‌. ദക്ഷിണ ജിസാനിലെ രണ്ടു മുനിസിപ്പാലിറ്റികളിലെ മുൻ മേധാവികളും അറസ്റ്റിലായവരിൽ ഉൾപ്പെടും. അഞ്ചു മുനിസിപ്പാലിറ്റി ഉദ്യോഗസ്ഥരും ഏതാനും കരാറുകാരും കേസിൽ അറസ്റ്റിലായിട്ടുണ്ട്.
          അറസ്‌റ്റ് ചെയ്‌ത ഇവരെ സഊദി പബ്ലിക് പ്രോസിക്യൂഷൻ കോദയം ചെയ്‌തു വരികയാണ്.

ഇല്ലാത്ത പദ്ധതികളുടെ പേരിൽ കരാറുകൾ അനുവദിക്കൽ, വ്യാജ രേഖകൾ നിർമിച്ച് വെട്ടിപ്പുകൾ നടത്തൽ എന്നീ ആരോപണങ്ങളാണ് ഇവർ നേരിടുന്നത്. ലൈസൻസില്ലാത്ത സ്ഥാപനങ്ങൾക്കും രേഖകളിൽ മാത്രമുള്ള വ്യാജ സ്ഥാപനങ്ങൾക്കും അടച്ചുപൂട്ടിയ സ്ഥാപനങ്ങൾക്കും കരാറുകൾ നൽകിയാണ് പ്രതികൾ അഴിമതി നടത്തിയത്. ജിസാൻ പ്രവിശ്യയിലെ മുനിസിപ്പാലിറ്റി മുൻ മേധാവിയും നിലവിലുള്ള ജീവനക്കാരനും പിന്നീട് മറ്റൊരു ബലദിയയുടെ മേധാവിയായി സ്ഥാനക്കയറ്റം ലഭിക്കുകയും ചെയ്ത വ്യക്തിയും അഞ്ചു ജീവനക്കാരും ഏതാനും കരാറുകാരുമാണ് കേസിലെ പ്രതികൾ. അഴിമതിയുമായി ബന്ധപ്പെട്ട അന്വേഷണത്തിനിടെ ദേശീയ അഴിമതി വിരുദ്ധ കമ്മീഷൻ ഉദ്യോഗസ്ഥരെ ആക്രമിച്ചെന്ന ആരോപണവും പ്രതികളിൽ ചിലർ നേരിടുന്നുണ്ട്. 

            അഴിമതിക്കെതിരെ ശക്തമായ പോരട്ടം നടത്തുന്ന സഊദി അറേബ്യയിൽ നേരത്തെയും ഇതേ കേസിൽ നിരവധി പ്രമുഖരെ അറസ്‌റ്റ് ചെയ്‌തു അന്താരാഷ്‌ട്ര ശ്രദ്ധ നേടിയിരുന്നു. കിരീടാവകാശിയുടെ നേതൃത്വത്തിൽ നേരത്തെ രൂപീകരിതമായ അഴിമതി വിരുദ്ധ സമിതി സഊദി രാജ കുടുംബാംഗങ്ങൾ, മന്ത്രിമാർ, മുൻ മന്ത്രിമാർ, ലോക കോടീശ്വരൻ എന്നിങ്ങനെ വിവിധ തലങ്ങളിൽ നിന്നുള്ള മുന്നൂറോളം പേരെ ഒറ്റത്തവണ അറസ്‌റ്റ് ചെയ്‌തതോടെയാണ്‌ അഴിമതി വിരുദ്ധതക്കെതിരെ സഊദിയുടെ നടപടികൾ ആഗോള ശ്രദ്ധ നേടിയത്. ഇവരിൽ പലരും പിന്നീട് അഴിമതിപ്പണമെന്ന് കണ്ടെത്തിയ തുക ഖജനാവിലേക്ക് തിരിച്ചടച്ചാണ്‌ പുറത്തിറങ്ങിയത്. ഇതിനു തയ്യാറാകാത്തവർ ഇപ്പോഴും ശിക്ഷ അനുഭവിക്കുകയാണ്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.