2020 January 22 Wednesday
യുദ്ധഭീതിയോടെ ഗൾഫ് മേഖല; മറ്റൊരു ഗൾഫ് യുദ്ധം താങ്ങാൻ ലോകത്തിനു ശേഷിയുണ്ടാകില്ലെന്ന് യു എൻ

പൗരത്വ ബില്‍: അസമിലും ത്രിപുരയിലും പട്ടാളമിറങ്ങി, പലയിടത്തും പ്രക്ഷോഭക്കാരും പട്ടാളവും ഏറ്റുമുട്ടി, അസമില്‍ ട്രെയിന്‍ സര്‍വിസുകള്‍ മുടങ്ങി

ഗുവാഹത്തി: ദേശീയ പൗരത്വ ഭേദഗതി ബില്ലിനെതിരേ വടക്കുകിഴക്കന്‍ സംസ്ഥാനങ്ങളില്‍ പ്രതിഷേധം കനത്തു. വന്‍ ജനകീയ പ്രക്ഷോഭങ്ങളെ നേരിടാന്‍ അസമിലും ത്രിപുരയിലും സൈന്യത്തെ വിന്യസിച്ചു. എന്നാല്‍, അസം, ത്രിപുര, സിക്കിം തുടങ്ങിയ സംസ്ഥാനങ്ങളില്‍ ഇന്നലെ രാത്രി വൈകിയും വന്‍ പ്രതിഷേധ പ്രകടനങ്ങളാണ് നടക്കുന്നത്.
ദിബ്രുഗഢ് ജില്ലയില്‍ മാത്രം ക്വിക്ക് റെസ്‌പോണ്‍സ് ടീമായി 5,000 അധിക പൊലിസുകാരെയാണ് വിന്യസിച്ചിരിക്കുന്നത്. അസം, ത്രിപുര എന്നിവിടങ്ങളിലേക്കായി നാലു ട്രൂപ്പ് പട്ടാളക്കാരെ അയച്ചിട്ടുണ്ട്. വന്‍ പ്രതിഷേധത്തെ തുടര്‍ന്ന് ഗുവാഹത്തിയില്‍ കര്‍ഫ്യൂ പ്രഖ്യാപിച്ചിരിക്കുകയാണ്. അസമിലെ പത്തു ജില്ലകളില്‍ 24 മണിക്കൂര്‍ നേരത്തേക്കു മൊബൈല്‍ ഇന്റര്‍നെറ്റ് സേവനം നിര്‍ത്തലാക്കിയിട്ടുമുണ്ട്.

ഗുവാഹത്തി വിമാനത്താവളത്തിലെത്തിയ അസം മുഖ്യമന്ത്രിയെ പ്രതിഷേധക്കാര്‍ തടഞ്ഞുവച്ചു. വിദ്യാര്‍ഥി സംഘടനകളുടെ കീഴില്‍ പ്രഖ്യാപിച്ച 11 മണിക്കൂര്‍ ബന്ദ് പൂര്‍ണമായിരുന്നു. കനത്ത പ്രതിഷേധത്തെ തുടര്‍ന്നു സംസ്ഥാനത്തെ സര്‍വകലാശാലാ പരീക്ഷകള്‍ മാറ്റിവച്ചിട്ടുമുണ്ട്.
വിവിധയിടങ്ങളില്‍ പ്രക്ഷോഭക്കാരും പൊലിസും ഏറ്റുമുട്ടി. ഒട്ടേറെ പേരെ പൊലിസ് കസ്റ്റഡിയിലെടുത്തിട്ടുണ്ട്. പ്രക്ഷോഭക്കാരെ പൊലിസ് വളഞ്ഞിട്ടുതല്ലിയതോടെ പ്രതിഷേധങ്ങള്‍ അക്രമാസക്തമാകുകയായിരുന്നു. ഇതോടെ പൊലിസ്, ഫയര്‍ഫോഴ്‌സ് വാഹനങ്ങള്‍ ജനങ്ങള്‍ അഗ്നിക്കിരയാക്കി. റോഡുകള്‍ ഏറെനേരം ഉപരോധിച്ചു. തുടര്‍ന്നാണ് സൈന്യത്തെ ഇറക്കിയത്.
പ്രക്ഷോഭം ശക്തമായതിനെ തുടര്‍ന്നു ത്രിപുരയില്‍ സര്‍ക്കാര്‍ കഴിഞ്ഞ ദിവസം ഇന്റര്‍നെറ്റ് സേവനങ്ങള്‍ നിയന്ത്രിച്ചിരുന്നു. 48 മണിക്കൂര്‍ നേരത്തേയ്ക്കായിരുന്നു നിയന്ത്രണം. സംസ്ഥാനത്തു സര്‍ക്കാര്‍ സ്ഥാപനങ്ങള്‍ക്കും പൊലിസിനും ബി.ജെ.പി കേന്ദ്രങ്ങള്‍ക്കും നേരെ ശക്തമായ പ്രതിഷേധങ്ങളാണ് അരങ്ങേറുന്നത്. സമരങ്ങള്‍ തങ്ങളെ ബാധിക്കില്ലെന്നായിരുന്നു കഴിഞ്ഞ ദിവസം ത്രിപുര സര്‍ക്കാരിന്റെ പ്രതികരണമെങ്കിലും പ്രക്ഷോഭം വ്യാപകമായതോടെ സര്‍ക്കാര്‍ പ്രതിരോധത്തിലായിട്ടുണ്ട്.

അസമില്‍ കനത്ത പ്രക്ഷോഭങ്ങളെ തുടര്‍ന്നു നിരവധി ട്രെയിന്‍ സര്‍വിസുകള്‍ നിര്‍ത്തിവയ്ക്കുകയും ചിലതു പുനഃക്രമീകരിക്കുകയും ചെയ്തു. ഇന്നലെ മാത്രം 14 ട്രെയിന്‍ സര്‍വിസ് നിര്‍ത്തിവച്ചതായി റെയില്‍വേ വ്യക്തമാക്കി. ചില സര്‍വിസുകള്‍ വിവിധയിടങ്ങളില്‍ പിടിച്ചിട്ടിരിക്കുകയാണ്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.