2019 October 18 Friday
ഏറ്റവും വലിയ പാപം ഞാന്‍ കഴിവുകെട്ടവനാണ് എന്ന വിചാരമാണ്.

റിസര്‍വ് ബാങ്കിന്റെ ഇടക്കാല ലാഭവിഹിതത്തിലും കേന്ദ്രത്തിന് കണ്ണ്; ധനക്കമ്മി മറികടക്കാന്‍ 30,000 കോടി ആവശ്യപ്പെട്ടേക്കും

 

ന്യൂഡല്‍ഹി: റിസര്‍വ് ബാങ്ക് ഓഫ് ഇന്ത്യയുടെ (ആര്‍.ബി.ഐ) കരുതല്‍ധന ശേഖരത്തില്‍ കൈവച്ചതിന് പിന്നാലെ അതിന്റെ ഇടക്കാല ലാഭവിഹിതത്തിലും കണ്ണുവച്ച് കേന്ദ്രസര്‍ക്കാര്‍. ധനക്കമ്മി നികത്തുക എന്ന ലക്ഷ്യത്തോടെ ആര്‍.ബി.ഐയില്‍ നിന്ന് ഇടക്കാല ലാഭവിഹിതമായി 30,000 കോടി രൂപ കൂടി കേന്ദ്രസര്‍ക്കാര്‍ ആവശ്യപ്പെട്ടേക്കുമെന്നാണ് റിപ്പോര്‍ട്ട്. ഔദ്യോഗിക വാര്‍ത്താ ഏജന്‍സി പി.ടി.ഐയാണ് ഇക്കാര്യം റിപ്പോര്‍ട്ട്‌ചെയ്തത്. ആവശ്യമായി വരികയാണെങ്കില്‍ റിസര്‍വ് ബാങ്കില്‍ നിന്ന് ഇടക്കാല ലാഭവിഹിതമായി 25,000 മുതല്‍ 30,000 കോടിരൂപ വരെ കേന്ദ്രസര്‍ക്കാര്‍ ആവശ്യപ്പെട്ടേക്കുമെന്ന് സര്‍ക്കാര്‍ വൃത്തങ്ങളെ ഉദ്ധരിച്ച് പി.ടി.ഐ റിപ്പോര്‍ട്ട് ചെയ്തു.

2019- 20 സാമ്പത്തിക വര്‍ഷത്തില്‍ ധനക്കമ്മി 3.3 ശതമാനത്തില്‍ തന്നെ നിലനിര്‍ത്തുക എന്ന ലക്ഷ്യം കൈവരിക്കാനാണ് കേന്ദ്രസര്‍ക്കാര്‍ റിസര്‍വ് ബാങ്കിന്റെ ഇടക്കാല ലാഭവിഹിതം (ഇന്ററിം ഡിവിഡന്റ്) ആവശ്യപ്പെടുന്നത്. എന്നാല്‍, സര്‍ക്കാരിന് കൂടുതല്‍ ലാഭവിഹിതം നല്‍കണമോ എന്നതു സംബന്ധിച്ച് ജനുവരിയിലാവും റിസര്‍വ് ബാങ്ക് തീരുമാനമെടുക്കുക. കഴിഞ്ഞ സാമ്പത്തിക വര്‍ഷത്തില്‍ ഇടക്കാല ലാഭവിഹിതമായി 28,000 കോടിരൂപ കേന്ദ്രസര്‍ക്കാരിന് റിസര്‍വ് ബാങ്ക് കൈമാറിയിരുന്നു.

രാജ്യത്തിന്റെ പൊതുകടം നടപ്പു സാമ്പത്തിക വര്‍ഷത്തില്‍ 7.10 ലക്ഷം കോടിക്ക് മുകളില്‍ പോകാതിരിക്കാന്‍ കേന്ദ്രസര്‍ക്കാര്‍ പാടുപെടുന്നതിനിടെയാണ് പുതിയ നീക്കം. കഴിഞ്ഞവര്‍ഷത്തെ കണക്ക് പ്രകാരം രാജ്യത്തെ ഒരു പൗരന്‍ 1402 ഡോളര്‍ (1,00,944 രൂപ) കടക്കാരനാണ്. സര്‍ക്കാരിന്റെ കടം കൂടിയിട്ടും നിലവിലെ സാമ്പത്തിക വര്‍ഷത്തെ ധനക്കമ്മിയില്‍ മാറ്റമൊന്നും ഉണ്ടായിട്ടില്ല.

നേരത്തെ റിസര്‍വ് ബാങ്കിന്റെ കരുതല്‍ ധനശേഖരത്തില്‍ നിന്ന് 1.76 ലക്ഷം കോടി രൂപയാണ് കേന്ദ്രസര്‍ക്കാര്‍ ആവശ്യപ്പെട്ടിരുന്നത്. പ്രതിപക്ഷത്തിന്റെ കടുത്ത എതിര്‍പ്പ് നേരിട്ട ഈ നീക്കത്തിന് പിന്നാലെയാണ് റിസര്‍വ് ബാങ്കിന്റെ ഇടക്കാല ലാഭവിഹിതം വാങ്ങി ധനക്കമ്മി നികത്താന്‍ സര്‍ക്കാര്‍ ശ്രമിക്കുന്നത്.

Centre may seek ?30,000-crore interim dividend from RBI to meet fiscal target


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.