2018 September 24 Monday
ആത്മാവിനെ ആയുധങ്ങള്‍ മുറിവേല്‍പ്പിക്കുന്നില്ല അഗ്നി ദഹിപ്പിക്കുന്നില്ല. ജലം നനയ്ക്കുന്നില്ല. കാറ്റ് ഉണക്കുന്നുമില്ല.
-ഭഗവത്ഗീത

ബി.ജെ.പിയുടെ തകര്‍ച്ച തുടങ്ങി കഴിഞ്ഞു: എസ്. രാമചന്ദ്രന്‍ പിള്ള

മാണിയുമായുള്ള ബന്ധം ചര്‍ച്ച ചെയ്യും

കാസര്‍കോട്: ദേശീയതലത്തില്‍ ബി.ജെ.പിയുടെ തകര്‍ച്ച തുടങ്ങി കഴിഞ്ഞെന്നും, ബി.ജെ.പിയെ മുഖ്യ ശത്രുവായി കണ്ടു അവരെ അധികാരത്തിന് പുറത്താക്കാന്‍ സി.പി.എം പരിശ്രമിക്കുമെന്നും സി.പി.എം.പോളിറ്റ് ബ്യൂറോ അംഗം എസ്. രാമചന്ദ്രന്‍ പിള്ള പറഞ്ഞു. കാസര്‍കോട് പ്രസ്സ് ക്ലബില്‍ മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം. ബി.ജെ.പി സര്‍ക്കാറിന്റെ ഉദാരവല്‍ക്കരണ നയവും,വര്‍ഗീയതയും കാരണം എന്‍.ഡി.എയിലെ ഘടക കക്ഷികള്‍ തന്നെ അസംതൃപ്തരാണ്. ദേശീയ തലത്തില്‍ ബി.ജെ.പിയുടെ തകര്‍ച്ച തുടങ്ങി കഴിഞ്ഞു. അവരുടെ കക്ഷികളില്‍ പലരും പലരും കളം മാറി ചവിട്ടി തുടങ്ങി.

പ്രധാന കക്ഷിയായ ശിവസേന വിയോജിപ്പ് പ്രകടിപ്പിച്ചു കഴിഞ്ഞു. ടി.ഡി.പി പുറത്തുപോയി. വെറും മുപ്പത്തിമൂന്നു ശതമാനം വോട്ടിന്റെ ബലത്തിലാണ് ബി.ജെ.പി രാജ്യത്ത് ഭരണം നടത്തി വരുന്നത്. കോര്‍പ്പറേറ്റുകളെ സഹായിക്കുന്ന ഭരണത്തിനപ്പുറം മറ്റൊന്നും അവര്‍ക്കു കാഴ്ചവയ്ക്കാന്‍ സാധിച്ചിട്ടില്ല. ദേശീയ തലത്തില്‍ ബി.ജെ.പിയെ മുഖ്യ ശത്രുവായി കണ്ടു എതിര്‍ക്കുകയെന്നതാണ് പാര്‍ട്ടിയുടെ പ്രധാന അജണ്ട.

കോണ്‍ഗ്രസുമായി സഖ്യമോ, ധാരണയോ ഉണ്ടാക്കില്ല. അങ്ങനെ വരുമ്പോള്‍ ജനകീയ ആവശ്യങ്ങള്‍ ഉന്നയിച്ചുള്ള സമരം നടത്തുന്നതിനു സഖ്യം തടസമാകും. രാജ്യത്തെ പാര്‍ട്ടികളെ ഏകോപിപ്പിക്കുക എന്നത് ഇന്നത്തെ സാഹചര്യത്തില്‍ പ്രായോഗികമല്ല. ഇതിനു പകരം ചിതറിക്കിടക്കുന്ന വോട്ടുകള്‍ ഏകോപിക്കുകയെന്നതാണ് പ്രായോഗികം. കെ.എം.മാണിയെ ഇടതു മുന്നണിയില്‍ ചേര്‍ക്കുന്നതിനെ കുറിച്ച് ഘടകകക്ഷികളുമായി ചര്‍ച്ച ചെയ്ത് തീരുമാനിക്കുമെന്നും എസ്.ആര്‍.പി പറഞ്ഞു.

പി.കരുണാകരന്‍ എം.പി, ജില്ലാ സെക്രട്ടറി എം.വി ബാലകൃഷ്ണന്‍ എന്നിവരും അദ്ദേഹത്തോടൊപ്പം ഉണ്ടായിരുന്നു. ഇ.എം.എസ,് എ.കെ.ജി അനുസ്മരണ ചടങ്ങുകളില്‍ പങ്കെടുക്കുന്നതിനാണ് എസ്.ആര്‍.പി ജില്ലയിലെത്തിയത്.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.