2019 September 17 Tuesday
ദാരിദ്ര്യത്തെക്കുറിച്ച് ലജ്ജിക്കാനില്ല. അതില്‍ ലജ്ജതോന്നുന്നതാണ് ലജ്ജാകരം.

റൗണ്ടപ്പ് ഉള്‍പ്പെടെയുള്ള കള-കീടനാശിനികള്‍ക്ക് കേരളത്തില്‍ നിരോധനം

ജാഫര്‍ കല്ലട

മലപ്പുറം: സംസ്ഥാനത്ത് ജൈവ കാര്‍ഷികനയം നടപ്പാക്കുന്നതിന്റെ ഭാഗമായി റൗണ്ടപ്പ് ഉള്‍പ്പെടെയുള്ള കള-കീടനാശിനികള്‍ നിരോധിച്ചു. മാര്‍ക്കറ്റിലെ മുഴുവന്‍ കളനാശിനികളും വില്‍പന നടത്തുന്നതിനുള്ള മൊത്ത, ചില്ലറ വിതരണങ്ങളുടെ ലൈസന്‍സ് റദ്ദാക്കിയാണ് കൃഷി ഡയറക്ടര്‍ ഉത്തരവിറക്കിയത്. ഗ്ലൈഫോസേറ്റും, ഗ്ലൈഫോസേറ്റ് അടങ്ങിയ കളനാശിനികളുമാണ് നിരോധിച്ചത്.
ഇനി ഇവ വില്‍പന നടത്തിയാല്‍ അകത്താവുമെന്നാണ് മുന്നറിയിപ്പ്. കൂടുതല്‍ കീടനാശിനികളുടെ ഉപയോഗം നിയന്ത്രിച്ച് കഴിഞ്ഞ ഫെബ്രുവരിയില്‍ 60 ദിവസത്തേക്ക് സര്‍ക്കാര്‍ ഉത്തരവിറക്കിയിരുന്നു. ഇതിനിടയിലും ഇവയുടെ വില്‍പന തകൃതിയായി . റൗണ്ടപ്പും നിരോധിച്ചവയിലുള്‍പ്പെടും. ചുവന്ന ലേബലോടുകൂടിയ ചില കീടനാശിനികളുടെ ഉപയോഗം പൂര്‍ണമായും നിരോധിച്ചിരുന്നുവെങ്കിലും കൃഷി വകുപ്പ് തന്നെ ചുവന്ന ലേബലോട് കൂടിയ എലിവിഷം ഉള്‍പ്പെടെ കീടനാശിനികളും കൃഷിഭവന്‍ മുഖേന കര്‍ഷകര്‍ക്ക് നല്‍കിയതും വിവാദമായിരുന്നു.

മഞ്ഞ, നീല ലേബലോടെയുള്ളവയും ചില കളനാശിനികളുടെയും വില്‍പനയും ഉപയോഗവും അത്യാവശ്യ ഘട്ടങ്ങളില്‍ കൃഷി ഓഫിസറുടെ കുറിപ്പടിയുടെ അടിസ്ഥാനത്തില്‍ മാത്രമായി പരിമിതപ്പെടുത്തിയിരുന്നു. റബര്‍ തോട്ടങ്ങളിലാണ് റൗണ്ട് അപ്പ് വ്യാപകമായി ഉപയോഗിക്കുന്നത്. നെല്‍കൃഷിയിലും പച്ചക്കറി തോട്ടങ്ങളിലും തളിക്കുന്ന ക്രോട്ടോ ഫോസും വ്യാപകമാണ്. പച്ചക്കറി തോട്ടങ്ങളില്‍ ഉപയോഗിക്കുന്ന ലിന്റയിന്‍, വാഴത്തോട്ടങ്ങളില്‍ ഉപയോഗിക്കുന്ന ഫ്യൂരിഡാന്‍, കാര്‍ബോറിന്‍ തുടങ്ങിയവയും ഹാനികരമാണ്. മാമ്പൂ കൊഴിയാതിരിക്കാനും പ്രാണികളെ അകറ്റാനും സെവിന്‍, സിംഫൂസ് എന്നീ മാരക കീടനാശിനികളാണ് യഥേഷ്ടം തളിക്കുന്നത്. കീടനാശിനികളുടെയും കളനാശിനികളുടേയും ഉപയോഗം വര്‍ധിച്ചതോടെയാണ് കഴിഞ്ഞ ദിവസം കൃഷി ഡയറക്ടര്‍ ഇവയുടെ വില്‍പന നിരോധിച്ചും, ലൈസന്‍സ് റദ്ദു ചെയ്തും ഉത്തരവിട്ടത്.
കൃഷിപ്രദേശം മാസത്തിലൊരിക്കല്‍ പരിശോധിച്ച് അതത് ജില്ലാ കൃഷി ഓഫിസുകളില്‍ റിപ്പോര്‍ട്ട് നല്‍കാനും കൃഷി ഓഫിസര്‍മാര്‍ക്ക് നിര്‍ദേശം നല്‍കി. ഇവ ഒഴിവാക്കിയുള്ള പുതിയ ലൈസന്‍സാണ് ഇനി വ്യാപാരികള്‍ക്ക് നല്‍കുക. ഗ്ലൈഫോസേറ്റും, ഗ്ലൈഫോസേറ്റ് അടങ്ങിയ ലൈസന്‍സ് റദ്ദാക്കാന്‍ വ്യാപാരികളുടെ ലൈസന്‍സ് ഒറിജിനല്‍ കൃഷിഭവനുകളില്‍ ഹാജരാക്കണമെന്നും നിര്‍ദേശിച്ചിട്ടുണ്ട്. പ്രിന്‍സിപ്പല്‍ കൃഷി ഓഫിസര്‍മാര്‍, കൃഷി ഡെപ്യൂട്ടി ഡയറക്ടര്‍മാര്‍, ലൈസന്‍സ് എടുത്തിട്ടുള്ള മൊത്ത, ചെറുകിട വ്യാപാരികള്‍ എന്നിവര്‍ക്ക് ഉത്തരവിന്റെ പകര്‍പ്പയച്ചിട്ടുണ്ട്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.