2019 July 17 Wednesday
നിങ്ങളുടെ അമ്മയോട് സംസാരത്തില്‍ മൂര്‍ച്ചയുള്ള വാക്കുകള്‍ ഉപയോഗിക്കരുത്. നിങ്ങളെ സംസാരിക്കാന്‍ പഠിപ്പിച്ചത് ആ അമ്മയാണെന്ന് മറക്കരുത്.

ലിബിയന്‍ തീരത്ത് രക്ഷകനായി ‘അലന്‍ കുര്‍ദി’; രക്ഷിച്ചത് 44 അഭയാര്‍ഥികളെ

 

ട്രിപ്പോളി: അഭയാര്‍ഥി ബോട്ടുകള്‍ മറിഞ്ഞുള്ള അപകടം പതിവായ മെഡിറ്ററേനിയന്‍ സമുദ്രത്തില്‍ അഭയാര്‍ഥി ബോട്ടുകള്‍ക്ക് രക്ഷകനായി അലന്‍ കുര്‍ദി കപ്പല്‍. ലിബിയന്‍ തീരത്ത് അപകടത്തില്‍ പെട്ട മരം കൊണ്ടുള്ള ബോട്ടില്‍ നിന്ന് നവജാത ശിശുവടക്കം 44 പേരെയാണ് 2015 സപ്തംബറില്‍ അഭയാര്‍ഥി ബോട്ട് മുങ്ങി മരിച്ച മൂന്നു വയസുകാരനായ സിറിയന്‍ ബാലന്‍ അലന്‍ കുര്‍ദിയുടെ പേരിലുള്ള കപ്പല്‍ രക്ഷിച്ചത്.

രക്ഷപ്പെട്ടവരില്‍ മൂന്ന് സ്ത്രീകളും അവരുടെ മൂന്നു മക്കളും ഉള്‍പ്പെടുന്നു. ഇതില്‍ ഒരു കുഞ്ഞിന് 15 മാസമേ പ്രായമുള്ളൂ. മൂന്നും അഞ്ചും വയസുള്ളവരാണ് മറ്റു രണ്ടു കുട്ടികള്‍. ബോട്ടിലുണ്ടായിരുന്നവര്‍ സിറിയ, പാകിസ്താന്‍, ബംഗ്ലാദേശ്, ഗ്വിനിയ എന്നീ രാജ്യങ്ങളില്‍ നിന്നുള്ളവരാണ്. കഴിഞ്ഞയാഴ്ച യൂറോപ്പിലേക്കുള്ള യാത്രയ്ക്കിടെ കപ്പല്‍ തകര്‍ന്ന് അപകടത്തില്‍ പെട്ട 65 പേരെ അലന്‍ കുര്‍ദി രക്ഷിച്ചിരുന്നു.

അഭയാര്‍ഥികളെ രക്ഷിക്കുന്നതിനായി മെഡിറ്ററേനിയന്‍ സമുദ്രത്തില്‍ പ്രവര്‍ത്തിക്കുന്ന ഈ ജര്‍മന്‍ കപ്പലിന് തുര്‍ക്കി തീരത്ത് സിറിയന്‍ ബാലനായ അലന്‍ കുര്‍ദിയെ മരിച്ച നിലയില്‍ കണ്ടെത്തിയതോടെയാണ് പേരു മാറ്റിയത്. കപ്പലിന് തന്റെ മകന്റെ പേരു കൊടുത്തതില്‍ വളരെ സന്തോഷവാനാണെന്ന് അലന്‍ കുര്‍ദിയുടെ പിതാവ് അബ്ദുല്ലാ കുര്‍ദി പറഞ്ഞിരുന്നു.
കാനഡയിലേക്ക് കുടിയേറുന്നതിനായി സിറിയയില്‍ നിന്ന് യാത്ര ചെയ്യുന്നതിനിടെ അലന്‍ കുര്‍ദിയുടെ കുടുംബം സഞ്ചരിച്ച അഭയാര്‍ഥി ബോട്ട് അപകടത്തില്‍ പെടുകയായിരുന്നു.

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.