2019 June 20 Thursday
കുറഞ്ഞ ഗുണത്തിനു നന്ദി ചെയ്യാത്തവന്‍ അധിക ഗുണങ്ങള്‍ക്കും നന്ദി ചെയ്യുകയില്ല. ജനങ്ങളോട് നന്ദി ചെയ്യാത്തവര്‍ക്ക് അല്ലാഹുവിനോടും നന്ദിയുണ്ടാവുകയില്ല -മുഹമ്മദ് നബി(സ)

‘മറ്റൊരു അധികാരി വിഭാഗമുണ്ട്, എളുപ്പത്തെ അവര്‍ പ്രയാസമാക്കുന്നു’; യു.എ.ഇ ഭരണാധികാരിയുടെ ട്വീറ്റ് വൈറലാവുന്നു

മോദിയെ ഉന്നംവച്ചുള്ളതാണെന്ന് ട്വീറ്റുകളെന്നാണ് സാമൂഹ്യമാധ്യമങ്ങളില്‍ പ്രചരിക്കുന്നത്

അബുദബി: യു.എ.ഇ ഭരണാധികാരി ഹിസ് ഹൈനസ് ശൈഖ് മുഹമ്മദിന്റെ രണ്ട് ട്വീറ്റുകള്‍ സാമൂഹ്യമാധ്യമ ലോകത്ത് ചര്‍ച്ചയാവുകയാണ്. ഇന്നലെ അറബിയില്‍ പോസ്റ്റ് ചെയ്ത ട്വീറ്റുകളാണ് വലിയ ചര്‍ച്ചയിലേക്കു വഴിവച്ചിരിക്കുന്നത്.

കേരളത്തിലേക്ക് പ്രളയദുരിതാശ്വാസമായി യു.എ.ഇ 700 കോടി പ്രഖ്യാപിച്ചതും തുടര്‍ന്നുണ്ടായ വിവാദങ്ങളിലും മുനവച്ചാണ് ട്വീറ്റുകളെന്നാണ് സാമൂഹ്യമാധ്യമങ്ങളില്‍ പ്രചരിക്കുന്നത്. അങ്ങനെയാണെങ്കില്‍, കേന്ദ്ര സര്‍ക്കാരിനെയും പ്രധാനമന്ത്രി നരേന്ദ്ര മോദിയെയും കണക്കിനു വിമര്‍ശിക്കുകയാണിത്.

ജീവിതം എന്നെ പഠിപ്പിച്ചത് എന്ന ഹാഷ്ടാഗോടെയാണ് രണ്ടു ട്വീറ്റുകളും.

ട്വീറ്റ് ഒന്ന്

ഉത്തരവാദിത്തങ്ങള്‍ വഹിക്കുന്നവര്‍ (ഭരണാധികാരികള്‍) രണ്ടു തരക്കാരാണ്. ഒന്നാം വിഭാഗം നന്മകള്‍ക്ക് വഴിതുറക്കുന്നവരാണ്. അവര്‍ ജനങ്ങളെ സേവിക്കുന്നത് ഇഷ്ടപ്പെടുന്നു. ജനജീവിതം എളുപ്പകരമാക്കുന്നതിലാണ് അവരുടെ സൗഭാഗ്യം. മനുഷ്യന് നല്‍കുന്നതിലും അവന് വേണ്ടി സമര്‍പ്പിക്കുന്നതിനെയുമാണ് അവര്‍ അമൂല്യമായി കണക്കാക്കുന്നത്. അവരുടെ യഥാര്‍ത്ഥ നേട്ടം ജനങ്ങളുടെ ജീവിതം ഏറ്റവും ശ്രേഷ്ഠമാക്കുന്നതാണ്. അവര്‍ വാതിലുകള്‍ തുറക്കുന്നു (അവസരങ്ങള്‍ സൃഷ്ടിക്കുന്നു), പ്രശ്‌നങ്ങള്‍ക്ക് പരിഹാരം കാണുന്നു, ജനങ്ങള്‍ക്ക് ഉപകാരം ചെയ്യുന്നതിനായി എപ്പോഴും നെട്ടോട്ടമോടുന്നു.

ട്വീറ്റ് രണ്ട്

രണ്ടാം വിഭാഗക്കാര്‍ എല്ലാ നന്മകളെയും കൊട്ടിയടക്കുന്നവരാകുന്നു. എളുപ്പത്തെ അവര്‍ പ്രയാസകരമാക്കുന്നു, സമൃദ്ധിയെ അവര്‍ ദുര്‍ലഭമാക്കുന്നു, ജനജീവിതം അങ്ങേയറ്റം ദുസ്സഹമാക്കുന്നതിന് കെട്ടിക്കുടുക്കുകളും നൂലാമാലകളുമുണ്ടാക്കുന്നു. ജനങ്ങളെ ചൂഷണം ചെയ്യുന്നതിലാണവര്‍ തങ്ങളുടെ ജീവിത സൗഭാഗ്യം കണ്ടെത്തുന്നത്. ആവശ്യങ്ങള്‍ നിവര്‍ത്തിക്കാന്‍ ജനം
തങ്ങളുടെ വാതില്‍പ്പടിയിലും ഓഫീസുകളിലുമായി കെട്ടിക്കിടക്കണമെന്ന് അവര്‍ ആഗ്രഹിക്കുന്നു.
രണ്ടാം വിഭാഗത്തേക്കാള്‍ ആദ്യ വിഭാഗം വര്‍ധിക്കാത്ത കാലത്തോളം ഏതൊരു രാജ്യവും സര്‍ക്കാരുകളും വിജയിക്കാന്‍ പോകുന്നില്ല.


 

 

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.