2018 June 21 Thursday
ഇത് നിന്റെ പാത. നീ തനിച്ചും. മറ്റുള്ളവര്‍ ഒപ്പം നടന്നേക്കാം. എന്നാല്‍ നിനക്കുവേണ്ടി നടക്കാന്‍ നിനക്കല്ലാതെ മറ്റാര്‍ക്ക് കഴിയും
-ജലാലുദ്ദീന്‍ റൂമി

വീരേന്ദ്രകുമാര്‍ യു.ഡി.എഫ് വിട്ടാല്‍ സ്വീകരിക്കും: കോടിയേരി

കോഴിക്കോട്: എം.പി വീരേന്ദ്രകുമാറിന്റെ രാജിപ്രഖ്യാപനം സ്വാഗതാര്‍ഹമാണെന്നും പുനര്‍വിചിന്തനം നടത്തി ഇടതുപക്ഷത്തേക്ക് വന്നാല്‍ അദ്ദേഹത്തേയും ജെ.ഡി.യുവിനെയും സ്വീകരിക്കുമെന്നും സി.പി.എം സംസ്ഥാനസെക്രട്ടറി കോടിയേരി ബാലകൃഷ്ണന്‍.

യു.ഡി.എഫിന്റെ പടയൊരുക്കം കഴിയും മുന്‍പ് അവരുടെ രാജ്യസഭാ എം.പി സ്ഥാനം രാജിവയ്ക്കാന്‍ പോകുന്നത് മുന്നണിക്കുള്ളിലെ ചേരിതിരിവിന്റെയും പൊട്ടിത്തെറിയുടെയും ഫലമാണ്. എല്‍.ഡി.എഫിന്റെ വാതിലുകള്‍ അടച്ചിട്ടില്ലെന്നും തിരിച്ചുവരണമെന്നും അദ്ദേഹം മാധ്യമപ്രവര്‍ത്തകരോടു പറഞ്ഞു.

ബി.ജെ.പിയുമായി കേന്ദ്രത്തില്‍ ജെ.ഡി.യു സഖ്യംചെയ്യാന്‍ തീരുമാനിച്ചപ്പോള്‍ വീരേന്ദ്രകുമാര്‍ ലോക്‌സഭാ അംഗത്വം രാജിവയ്ക്കുമെന്നു പ്രഖ്യാപിക്കുകയായിരുന്നു. ആര്‍.എസ്.എസ് സംഘ്പരിവാര്‍ ശക്തികള്‍ക്കെതിരേ നിരന്തരം പ്രതിഷേധമറിയിക്കുന്ന വ്യക്തിയെന്ന നിലയ്ക്ക് ബി.ജെ.പി ബന്ധം പുലര്‍ത്താന്‍ വീരേന്ദ്രകുമാറിനാകില്ല. ഈ സാഹചര്യത്തില്‍ രാജിവയ്ക്കുന്നത് സ്വാഗതാര്‍ഹമാണ്. ഇടതുപക്ഷമുന്നണി സംവിധാനത്തിന്റെ ഭാഗമാകുന്നതിനെപ്പറ്റി ആദ്യം ആലോചിക്കേണ്ടത് അവരാണ്.

ഇടതുപക്ഷത്തേക്കു വന്നാല്‍ എല്‍.ഡി.എഫ് സീറ്റില്‍ വീരേന്ദ്രകുമാറിനെ മത്സരിപ്പിക്കുന്നത് ഉപതെരഞ്ഞെടുപ്പ് സമയത്ത് ആലോചിക്കും. എല്‍.ഡി.എഫ് വിട്ടുപോയ ആര്‍.എസ്.പിയും ജനതാദള്‍ വീരേന്ദ്രകുമാര്‍ വിഭാഗവും തിരിച്ചുവരണമെന്നു സി.പി.എം നേരത്തെ ആവശ്യപ്പെട്ടതാണ്. അദ്ദേഹം തീരുമാനം പ്രഖ്യാപിച്ചു കഴിഞ്ഞാല്‍ തുടര്‍നടപടികളിലേക്കു സി.പി..എം കടക്കുമെന്നും കോടിയേരി പറഞ്ഞു.


 

 

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.