2020 February 16 Sunday
മധ്യേഷ്യൻ സമാധാന കരാർ ചൊവ്വാഴ്ച്ച പ്രഖ്യാപിക്കുമെന്ന് ട്രംപ്

കപ്പൽ സഞ്ചാര സംരക്ഷണത്തിന് ഗൾഫ് രാജ്യങ്ങളുടെ സഖ്യവുമായി അമേരിക്ക; കപ്പൽ സംരക്ഷണത്തിന് അതത് രാജ്യങ്ങൾ കൂടി മുന്നോട്ട് വരണമെന്ന് ട്രംപ് 

അബ്‌ദുസ്സലാം കൂടരഞ്ഞി 

റിയാദ്: ലോകത്തെ ഏറ്റവും കൂടുതൽ  എണ്ണക്കപ്പൽ സഞ്ചാര മേഖലയിൽ അടിക്കടിയുണ്ടാകുന്ന ആക്രമണങ്ങൾ നേരിടാൻ കപ്പൽ സഞ്ചാര സംരക്ഷണത്തിന് ഗൾഫ് രാജ്യങ്ങളുടെ സഖ്യവുമായി അമേരിക്ക രംഗത്ത്. എണ്ണക്കപ്പൽ സഞ്ചാരത്തിന് ഭീഷണയായി ഇറാൻ ഭാഗത്തു നിന്നാണ് ആക്രമണങ്ങൾ ഉണ്ടാകുന്നതെന്നും അതിനാൽ ഇതിനെ നേരിടാൻ മേഖലയിലെ രാജ്യങ്ങളുമായി ചേർന്ന് സഖ്യമുണ്ടാക്കി നേരിടാനാണ് അമേരിക്കയുടെ തീരുമാനം. അമേരിക്കൻ വിദേശ കാര്യാലയത്തിലെ മുതിർന്ന ഉദ്യോഗസ്ഥനാണ് ഇത് സംബന്ധിച്ച സൂചന നൽകിയത്. ഗള്‍ഫ് ഉള്‍ക്കടലില്‍ കപ്പലുകളുടെ നീക്കങ്ങള്‍ നിരീക്ഷിച്ച് കപ്പല്‍ പാതകള്‍ക്ക് സംരക്ഷണം നല്‍കുന്നതിന് മേഖലയിലെ രാജ്യങ്ങളുമായി ചേര്‍ന്ന്  സഖ്യം സ്ഥാപിച്ചുവരികയാണെന്ന് അമേരിക്കന്‍ വിദേശ മന്ത്രാലയത്തിലെ മുതിര്‍ന്ന ഉദ്യോഗസ്ഥനെ ഉദ്ധരിച്ച് അറബ് മാധ്യമങ്ങൾ റിപ്പോർട്ട് ചെയ്‌തു.  

മേഖലയിലൂടെ കടന്നു പോകുന്ന കപ്പലുകളുടെ സുരക്ഷ ഉറപ്പുവരുത്തുന്നതിന് ആവശ്യമായ മുൻകരുതൽ സ്വീകരിച്ച് നേരിടുകയാണ് സഖ്യം ചെയ്യുക. ഇതിനായുള്ള വിഭവങ്ങളും സാമ്പത്തിക സഹായവും സഖ്യം ലഭ്യമാക്കും. ആക്രമണ പദ്ധതികള്‍ മുന്‍കൂട്ടി കണ്ടെത്തി ചെറുക്കുന്നതിനാണ് സഖ്യ രൂപീകരണത്തിലൂടെ ലക്ഷ്യമിടുന്നത്. ആക്രമണങ്ങള്‍ നടത്തുകയും ഉത്തരവാദിത്തം കൈയൊഴിയുകയുമാണ്  ഇറാനികള്‍ ചെയ്യുന്നതെന്നും അമേരിക്കന്‍ ഉദ്യോഗസ്ഥന്‍ പറഞ്ഞു. അമേരിക്കൻ സ്‌റ്റേറ്റ് സിക്രട്ടറി മൈക്ക് പോംപിയോ കഴിഞ്ഞ ദിവസം നടത്തിയ സഊദി, യു എ ഇ അടക്കമുള്ള ഗൾഫ് രാഷ്‌ട്രങ്ങളിലെ അടിയന്തിര സന്ദർശനത്തിൽ രാഷ്‌ട്ര നേതാക്കളുമായുള്ള കൂടിക്കാഴ്ചയിൽ ഇത് സംബന്ധിച്ച ചർച്ചകൾ ഉയർന്നതായാണ് വിവരം. 

അതേസമയം, എണ്ണക്കപ്പലുകളുടെ സുഗമമായ സഞ്ചാരത്തിന് കപ്പലുകൾക്ക് സംരക്ഷണം നൽകാൻ അതത് രാജ്യങ്ങൾ കൂടി മുന്നോട്ട് വരണമെന്നു അമേരിക്കൻ പ്രസിഡന്റ് ഡൊനാൾ ട്രംപ് പറഞ്ഞു. ചൈന, ജപ്പാൻ തുടങ്ങിയ രാജ്യങ്ങൾ തങ്ങളുടെ കപ്പലുകൾ സംരക്ഷിക്കണമെന്ന് അദ്ദേഹം ആവശ്യപ്പെട്ടു. വര്ഷങ്ങളായി യാതൊരു പ്രതിഫലവുമില്ലാതെ വിവിധ രാജ്യങ്ങളുടെ കപ്പലുകൾ തങ്ങൾ മേഖലയിൽ സംരക്ഷിക്കുകയാണ്. കപ്പലുകളുടെ സംരക്ഷണം അതത് രാജ്യങ്ങൾ തന്നെ നിർവഹിക്കണമെന്നു ട്രംപ് തന്റെ ട്വിറ്റർ സന്ദേശനത്തിൽ ആവശ്യപ്പെട്ടു. ഇറാനോട് അമേരിക്കയുടെ ആവശ്യം വളരെ ലളിതമാണ്. ആണവായുധം ഉപേക്ഷിക്കുക. തീവ്രവാദ സഹായം അവസാനിപ്പിക്കുക. ട്വിറ്ററിൽ അദ്ദേഹം കുറിച്ചു. 

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Latest News