2019 April 23 Tuesday
പുറമെ നിന്ന് അടിച്ചേല്‍പിക്കാവുന്ന ഒന്നല്ല ജനാധിപത്യം എന്നത്. അത് ഉള്ളില്‍ നിന്നുതന്നെ വരേണ്ടതാണ് -മഹാത്മാഗാന്ധി

ഉദ്യോഗസ്ഥനെതിരെ നടപടിയെടുത്തതിന് സംഘ്പരിവാര്‍ സൈബര്‍ ആക്രമണം: സുഷമാ സ്വരാജിന് പിന്തുണയുമായി കോണ്‍ഗ്രസ്

ന്യൂഡല്‍ഹി: വിദേശകാര്യ മന്ത്രി സുഷമാ സ്വരാജിനു നേരെ സ്വന്തം പാര്‍ട്ടിയില്‍ നിന്നു തന്നെ സൈബര്‍ ആക്രമണം. സംഘപരിവാര്‍, ബി.ജെ.പി പ്രവര്‍ത്തകര്‍ നടത്തുന്ന സൈബര്‍ ആക്രമണത്തേത്തുടര്‍ന്ന് സുഷമയ്ക്ക് പിന്തുണയുമായി കോണ്‍ഗ്രസ് രംഗത്തെത്തി.

മിശ്രവിവാഹിതരോട് മോശമായി പെരുമാറിയ ഉദ്യോഗസ്ഥനെതിരെ നടപടിയെടുത്തതാണ് സുഷമയ്‌ക്കെതിരെ സംഘ്പരിവാര്‍ തിരിയാന്‍ കാരണം. തനിക്കെതിരെ വന്ന മോശം കമന്റുകള്‍ സുഷമ സ്വരാജ് തന്നെയാണ് ട്വിറ്ററില്‍ പോസ്റ്റ് ചെയ്തത്.

ഉത്തര്‍പ്രദേശ് സ്വദേശികളായ മുഹമ്മദ് അനസ് സിദ്ദീഖി, ഭാര്യ തന്‍വി സേഥ് എന്നിവര്‍ പാസ്‌പോര്‍ട്ട് പുതുക്കാന്‍ എത്തിയപ്പോഴായിരുന്നു സംഭവം. ലഖ്‌നോവിലെ പാസ്‌പോര്‍ട്ട് സേവാ കേന്ദ്രത്തിലെത്തിയപ്പോള്‍, പുതുക്കണമെങ്കില്‍ മുഹമ്മദ് അനസ് ഹിന്ദുമതത്തിലേക്ക് മാറണമെന്ന് ആവശ്യപ്പെടുകയായിരുന്നു. വികാസ് മിശ്ര എന്ന ഉദ്യോഗസ്ഥനാണ് ഇങ്ങനെയൊരു ആവശ്യമുന്നയിച്ചത്.

ഇക്കാര്യം ചൂണ്ടിക്കാണിച്ച് ദമ്പതികള്‍ സുഷമയ്ക്ക് ട്വീറ്റ് ചെയ്തു. ഇതേത്തുടര്‍ന്ന് ഉദ്യോഗസ്ഥനെതിരെ നടപടിയെടുക്കുകയുമുണ്ടായി. ഇതാണ് സംഘ്പരിവാറിനെ ചൊടിപ്പിച്ചത്.

അതിനിടെ, സുഷമയ്ക്ക് പിന്തുണയുമായി കോണ്‍ഗ്രസ് രംഗത്തെത്തി. ഔദ്യോഗിക ട്വീറ്റിലൂടെ സുഷമയുടെ ട്വീറ്റ് റീട്വീറ്റ് ചെയ്താണ് പിന്തുണ അറിയിച്ചത്. വിദ്വേഷവും പരിഹാസവും നിറഞ്ഞ പരാമര്‍ശങ്ങളാണ് നിങ്ങളുടെ പാര്‍ട്ടിയില്‍ നിന്നു തന്നെ ഉയര്‍ന്നിരിക്കുന്നത്. ഈ അവസരത്തില്‍ നിങ്ങളുടെ തീരുമാനത്തെ ഞങ്ങള്‍ പിന്തുണയ്ക്കുന്നുവെന്ന് കോണ്‍ഗ്രസ് ട്വീറ്റില്‍ കുറിച്ചു.


 

 

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.